Вай гьантрай оьрмулул 90 шин хьунни ххаллилсса лаккучунан, ХIажинал арс Къаллаев Шамиллун. Ва увну ур КIямашав, шяраву икIу, Лаккуй икIу, цIа дурксса, бусравсса, хIурмат лавайсса Къаллал ХIажинал хъунмасса кулпатраву.
ЗахIматсса дяъвилул шиннардий Шамил, чIивисса оьрчI, хъуна адамина куна, зий ивкIун ур шардассагу, колхозравуссагу давурттай.
Шанна шинай Украиннай къуллугъгу бувну, зана ивкIун ур буттал шяравун. Зун ивкIун ур цанна ххуй дирзсса шофернал даврий. Машина ххуйну кIулсса, даву ххирасса, хасиятрал авкьусса Шамил, председательнал цала машиналий зун увцуну ур.
Цала оьрмулул дуснащал, аьпа биву, Фаридащал, Шамиллул эбратсса къатта-къуш бувну бур. Къатригу дурну, МахIачкъалалийн ивзун ур, ххаллилсса оьрчI ва душ хъуни бувну, минналми оьрчIру тарбия бувну, хъуни бувну бур. Яла, ххуйсса зузала-шофер хIисаврай, Шамил гьан увну ур цамур хIукуматрайн – Ливиянавун шоферну зун.
Шамил гьуртту хьуссар 1988 шинал дуниял сукку хьуну, левкьусса Спитак шагьру цIу буккан буллалийни ва 90-ку шиннардий Мичиххичнаву хьусса дяъвилий ппив бувсса Грозный шагьру цIу буккан буллалийни.
Пенсиялийн увккун махъгу, цIуллу-сагъшиву дуссаксса, Шамил бусраврай шоферну зий ивкIун ур. Цала ппу куна, шяраваллил аькьлукаргу ур Шамил.
Ванал бувсса хъунмасса захIматрах, дурсса даврих, ванияр тинайгу чIарав ацIаврих барчаллагьгу тIий, чIа тIий буру Шамиллун цIуллу-сагъсса оьрму, оьрчIаясса ва оьрчIал оьрчIаясса ххаришиву, Аллагьная цIими, барачат.
ГьунчIукьатIрал, КIямашрал жяматирттал чулуха барча дуллай Шамил увсса кьини, ванан, кулпатран чIа тIий буру ххари-хъиншивуртту.
ГьунчIукьатIрал Ккурандалул председатель
ХIажибутта ХIусайнов
Дагъусттан Республикалул бакIчинал Указрайн бувну, цIуну сакин бувсса, ДР-лул бакIчинацIунсса Хъунисриннал советрал председательнал хъиривчуну ивтунни Рамазаннул арс Шалласуев Шалласу.
Му хIурмат лавайсса даврил къуллугъгу барча буллай, чIа тIий буру жуна цинявннан ххирасса, бусравсса Шалласун цIуллушиву, цIу-цIусса ххуй-хъиншивуртту. Мукуна бюхъу-тяхъа ххинува итаннав ина – агьилминнавугу агьилну, жагьилминнавугу жагьилну!
«Илчилул» редакция
