Лакрал райондалул бакIчи Зураб КуччаевлучIа хьунни ларгсса дуккаврил шиная шинмай лавкьун бивкIсса Ххюлуссунал школа цIунил зузи баврил ялувсса батIаву.
Ваний гьуртту хьунни райондалул КIулшиву дулаврил управлениялул каялувчинал буржру чIумуйну биттур буллалисса Сулайман Шахмилов ва Ххюлуссуннал шяраваллил бакIчи Сагъир Акаев.
БатIаврий ихтилат бия дуккаврил идара анаварсса чIумул мутталий зузи баврия. Зураб Куччаевлул тапшур бунни бюхъайсса сурсатру ишла дурну, ва мурад бартбигьин.
Хаснува агьамну ккавккунни школалий дуклакисса оьрчIал щаллушин даву. Масъала чулийн бутансса ца чаранну кIицI лавгунни шяраву яхьунсса гъанчу бусса оьрчIру шагьрурдая кIункIу баву.
«Ва хъинну агьамсса буруккинни. Школа – шяраваллил къюкIри, гьанур. Школа бусса кIанттай бучIантIимур буссар. Школа лакьирча, шяраву оьрму левщуну гьантIиссар, гьунттийнин шяравалу цурдагу духларгун гьантIиссар. Жунма чара бакъа аьркинссар зана дан оьрчIахьхьун шяраву дуклансса сант, шяраваллин тIурча – аргъ», – увкунни Зураб Куччаевлул.
Муния махъ райондалул бакIчи идарарттал каялувчитуращал даврил аьрххилий лавгунни Ххюлуссуннал шяравун.
Цалчинна-цалчин, Зураб Куччаевлул ххал дунни школалул тагьар. Архсса шяраваллаву кIулшиву дулаврил буруккинтту хьхьичIунсса ххуттай ккаккан багьлай бушиву кIицI лаглай, КIулшиву дулаврил управлениялул каялувчи Сулайман Шахмиловлуйн ва шяраваллил бакIчи Сагъир Акаевлуйн тапшур бунни ччясса чIумул мутталий школалул даву цIу дуккан дан.
Муния махъ шяраваллил агьалинащалсса хьунабакьаврий ххал бивгьунни агьамсса буруккинтту.
Зулайхат Тахакьаева
