Зураб Куччаев делегациялущал ивунни чIаххуврайсса КIамахъаллал шяравун. Ххал бунни мизит, зилув, увккунни шяравух.

КIинттул чIумал шяраву инсан ацIлай акъар, гъинттул бигьалаглан нажагь букIларчагу.
«Шяраву рухI дакъахьурчагу, асар хъанай дия «заманалуву микIларчIсса» суратру. КIичIирттавух нанийни, асар хъанай бия нукIузаманнул хIахI. Ядурну дур буттахъал лащин – хIужрарду, тIаннул дарвазартту, дарвазарттал ялув Кьуръандалувасса аятирттал накьич дирхьу чартту. ЯбатIин къашайсса дур цIувцIучарил архитектура, эмаратсса тIабиаьт. ЦIанакулва кIункIу бан бюхъантIий бур шиккун тарих, тIабиаьт ва аьдат­ру кIул дан ччисса туристътал», – увкунни, шяравух увккун махъ Зураб Куччаевлул.
Шяраваллил бакIчи Расул ЦIаххаевлущал хIукму бунни ххал бигьин КIамахъаллал шяраву этнографический ва экологический туризм хьхьичIуннай дансса ххуллурду.