Вай гьантрай «Дагестан» РИА-лул редакциялий хьусса пресс-конференция хас дурну дия «Сказочное наследство» тIисса кIулшиву дулаврил ва культуралул проектрал лагрулий дурсса даврил хIасиллан. Миллатрал фольклор ябаву мурадрай, ттизаманнул мультимедиалул сурсатру ишла дурну зузи дурсса проект дузрайн дуккан дурну дур Дагъусттаннал бакIчинал грантирттал кумаграйну.
Дагъусттаннал Анимация ва кинематография хьхьичIуннай давриха зузисса фондрал вакилтурал бувсунни проектрал хьхьичI бивхьусса мурадну региондалул культура, фольклор ва ирсирай нанимур ядаву хъанахъишиву. Мультимедиалул проект хIасул хьуну дур аудиолуттирдая, радиопостановкарттая, документал ва кутIасса кинордая, «Сказки, мифы и легенды Дагестана» тIисса темалун хас дурсса видеороликирттая.
Проектрал каялувчи Юрий Атаевлул бусаврийн бувну, 2025 шинал шиву гьуртту хьуну ур 700 инсан. Бувну бур республикалул вузирдал студентътал гьурттусса 16 интеллектуал тIуркIу ва 17 кастинг, ларсун дур 2 кино. Машан ларсун дур звукозаписьру дайсса оборудование. Проектрай яла чялишну гьуртту хьуми студентътал бур ДГПУ-лувасса. ЦIанасса ппурттуву ванил лагрулий хIадур бувну бур къумукьнал, лазгиял, яруссаннал, лакрал ва даргиял мазурдийсса 5 аудиолу.
Шикку кIицI лавгунни Дагъусттаннал фольклорданул авадансса хазналувасса 107 магьа, личIи бувну, мультимедиалул форматрайн бувцушиву. Проектравух, студентътал бакъассагу, гьуртту хьуну бур элмийсса, педагогикалул ва эксперт суккушиннардал вакилтал.
«Сказочное наследие» тIисса проект нирхиравун дутаврийну, Дагъусттаннал культуралул, фольклорданул ирс буруччаву бакъассагу, жагьилсса никиран Дагъусттаннал культура, аьдат-эбадатру лахьхьаврихсса гъира-шавкь рутавринсса сантгу ххишала хъанай дур.
Имара Саидова
