Лакрал райондалул бакIчи Зураб Куччаев хьунаавкьунни хасъсса аьралий операция нанисса кIанттава игьалаган увкIсса аьралий хIакин Давид Учуевлущал.
2023 шинал контракт чирчуну, Давид Учуев уссар 136-мур гвардейский мотострелковый бригадалул медицинский подразделениялул командирну Бахмутрай аьралий мурадру биттур буллай.
Зураб Куччаевлул барчаллагь увкунни аьралийчунахь ватандалул ххуллий чумартну къуллугъ буллай ушиврухлу. ЦIувххунни аьрайсса тагьардания, подразделениялул буруккинттая.
«Укунсса хьунабакьавуртту жунна чара бакъа аьркинссар. Шикку хасъсса аьралий операциялий гьуртту хъанахъисса жула аьралийтурал зумату жунма баллай бур аьрайсса тагьардания, талатиминнал буруккинттая, жущава тIайланма аьркиннийн кумаг тIайла буккан бюхъаншиврул. ХIакьину жула хьхьичIххуттайсса бурж бур аьралийтурал ва вайннал кулпатирттал чIарав бацIаву», – увкунни райондалул бакIчинал.
