Лакрал райондалул бакIчи Зураб Куччаевлул оьвкуну ва ванал кабакьаврийну ЦIушинал бигьалагай гьантрай Гъумукун бувкIун бия Лакрал театрданул коллектив.

Райондалул магьирлугърал къатлуву уква ккаккан бунни кIива спектакль: оьрчIансса «Ччитул къатта» ва хъуниминнансса «Малла Насруттин».
Ва иширал чIарав бавцIуну бия 1975 шинал Гъумучиял школа къуртал бувсса МахIаммад Маккиев, Буниамин МахIаммадов, Низами МахIаммадов, Сайпулла Рамазанов, МахIаммад Апанниев, Ансар Къажлаев.

Кьини дяркъусса душиврух къабурувгун, спектакльлу ххал бан бувкIун бия зал сайки буцIинуксса оьрчIру ва хъуними. Лагма щархъавассагу оьрчIру бучIаншиврул, райондалул администрациялул дузал дурну дия транспорт.

Райондалул бакIчинал цалагу байбивхьуну байлитIунцIа ххал бунни кIивагу спектакль. Ша тийнмай къабувну, щала кьинигу гьан дурунни артистътуращал. Шиккува кIицI бан, цува республикалия архну ялапар хъанай унийгу, Зураб Куччаевлул мудангу хьуннасса къулагъас дикIайва театрданух, Пятигорскалийн гастрольлай лавгсса чIумал чIарав ацIайва тамашачитал батIин. Дагъусттаннайн зана хьуния махъ тIурча, сант дагьтари учIайва спектакльлайн. Вайннул лях тIивтIусса тIааьнсса ссупралух, куннахун кувгу руцлай, магьирлугърал зузалтрал ва театрданул артистътурал увкунни балайрду.

Лакрал театрданул гьану Гъумук бивзун бивкIшиврий чIурчIавгу дурну, Зураб Куччаевлул кIицI лавгунни, театрданул бакIщаращуй бивкIсса жула дакIурдива тачIав къагьантIисса артистътурал цалчинсса шаттирду лавсун бивкIсса Магьирлугърал къатта вайннал кIилчинсса ужагъирайн, бигьалагай «багъирайн» кIура баен бан ччай ушиву цува.

«Булухьхьияра жучIан, гастрольлай бакъасса, зувагу бигьалаган, Лаккуймигу бялахъан бан», – увкунни ванал.

Зулайхат Тахакьаева