ЦIусса шинал хьунийн Лакрал райондалул бакIчи Зураб Куччаев ивунни къуллугърал бурж биттур буллай оьрмурдацIа хьусса низам дуруччай органнал зузалтрал кулпатирттачIан.

Ванащал бия Аьрасатнал МВД-лул «Лакский» МО-лул каялувчинал хъиривчу МахIаммадхалил Аьлиев ва штабрал каялувчи МахIаммадзакир МухIадов.
Зураб Куччаевлул дакIнин бивчунни агьалинал ­мюхчаншиву дуруччаврил ххуллий жанну дуллусса полициялул зузалт.
ЦIушинал ссайгъатирттащал бунни арцуйнусса кумагругу.

«Жун тачIав дакIния къадуккантIиссар зул арсваврал, буттахъал, ласваврал къучагъшиву. Тай бия къуллугърайн дакIру тIайласса хIакьсса пишакартал. Жул яла къалагайсса буржри, тайгу дакIнин бивчуну, зул чIарав бацIаву», – увкунни Зураб Куччаевлул.
Зулайхат Тахакьаева