ХIурмат бусса «Илчи» кказитрал буккулт! Ларгунни ца ттигу шин ялату, жула оьрмулуву ххарисса ва пашмансса ишругу, ххуймунийн-хъинмунийнсса хьул-умудругу кьабивтун. Я Аллагь, барачатращал, буллугъшиврущал, рахIму-цIимилущал дуркIун лякъиннав цIусса шин. Хасъсса аьралий операция къуртал хьусса ххарисса хавар баяннав ччясса чIумул мутталий, Ватандалул мурадру буручлачисса цинявппагу жула къучагъталгу цIуллуну, сагъну цала-цала тIювайн зана хьуннав.

Аьдатравун багьсса куццуй, гьашинугу, ларгсса шинал хIасиллугу дурну, зугу барча бан, махъ буллай буру миллатрал лайкьсса вакилтурахьхьун.
Юсуп МахIаммадов, Лакрал райондалул бакIчи: (2007-2025 ш.ш.):
Ларгсса шин, гьарцаннангу аьрасатлувнан кунна, ттунгу дакIний лирчIунни Ххувшаврил 80 шинал юбилейрацIун ва Ватан дуруччул шинацIун дархIусса давурттайну. Вай кIивагу агьамсса иширан хасну райондалий къачансса дурссар Ватандалул мурадру буручлай чувшиврий жанну дуллуминнал аьпа абад баврил ва хъирив нанисса ник Ватан ххирану тарбия даврил ххуллийсса давуртту. Шяраваллаву цин лархьхьусса кIанттайн дурцуссар, цаппарасса цIу дуккан дурссар, Буттал кIанттул цIанийсса Хъун дяъвилия зана къавхьуминнан дацIан дурсса гьайкаллу. Школардай тIивтIуссар «Аьпалул чIиртту», «Аллея славы» акциялул лагрулий бувгьуссар вирттавран цIа кусса мурхьру. Гъумук бацIан бувссар Совет Союзрал Виричув Якьуб Сулаймановлул бюст. Му бакъассагу, гьурттушинна дурссар билаятрал лагрулий дан ккаккан дурсса гьарцагу акциялий.
ХьхьичIми шиннардий кунна, гьашинугу дагьайссаксса къулагъас дуссия Украиннал аьрщарай нанисса хасъсса аьралий операциялий Ватандалул мурадру буручлай чувшиврий жанну дуллусса ва хIакьину тийх талатисса аьралийтурал кулпатирттах.
Дурссар дан аьркинсса, аьпа буруччаврил ххуллийсса давуртту: тIиртIуссар аьпалул ултти, Вирттаврал партарду, бувгьуссар вирттавран цIа кусса мурхьру. СВО-лийн тIайла бувкссар шяраваллава гуманитар кумагру, дуклаки оьрчIал щаршссар къертту.
Ккалли дансса къулайшиннарду хьуссар агьалинал оьрмулувугу. ЦIахъардал ламуя байбивхьуну КIундиннал шяравун кIурабаллалисса ххуллийн бияннин асфальтгу бувтIуну, ххуллул лишанну дирхьуссар. Бакьин бувссар КIундив нанисса ххуллу. Гьартагу бувну, бакьин бувссар Буршайнсса ххуллу. КIанттул бюджетрава Гъумук кIичIирттавух бувтIуссар асфальт. Бакьин бувссар шяраваллавусса ххуллурдугу. Гъумуча Хьурив нанисса ххуллий бувссар цIусса ламу. Дя Гъумук бувцуссар ххисса щинаххуллу. Ванийну марцIсса хIачIай щинал дузалшин хьуссар агьалинан. Бакьин бувссар Ххюлусмату Гъумукун нанисса щинаххуллу. Ванийну щинал дузалшинна хьуссар Ххюлуссуннал, ЧIурттащиял, КIулушацIрал, Читтурдал, ШавкIуллал, ГьукIурдал ва Гъумучиял агьалинан.
Гьашину район ацIния ряххийлчин хьхьичIунсса кIанттайн дурккунни социал-экономикалул ккаккиярттаву лахъсса зунттал районнал дянив.
Ларгсса шинал на гьуртту хьура Ханты-Мансийск шагьрулий «Малая Родина – сила России» тIисса щалагу Аьрасатнал муниципалитетирттал форумрай. Республикалул бакIчи Сергей Меликовлул Указрайн бувну, ттун дуллунни паччахIлугърал ларайсса награда – орден «За заслуги перед Республикой Дагестан». Ва ца ттуллалусса награда дакъар, ваниву буссар ттул ххаллилсса коллективрал ва райондалул агьалинал захIматрал бутIа.
Ларгсса шинал ахирданий на кьабитав райондалул бакIчинал къуллугъ. Бусса оьрмулий асардай личIансса хьунни ацIния мяйра шинал манзилданий бивтсса ххуллул хIасиллу дуллалисса батIаврий ттухьва увкусса бюххансса барчаллагьрал махъру. Нагу барчаллагь тIий ура вай ацIния мяйрагу шинал манзилданий ттула чIарав бивкIсса даврил уртакьтурахь, райондалул агьалинахь.
Аьзизсса райондалун цIусса шинаву чIа тIий ура жагьилсса каялувчинащал цIу-цIусса хьхьичIуннайшивуртту. Гьарцагу лаккучувнал ужагърайн цIусса шин дурххун лякъиннав Аллагьнал рахIму-цIимилущал, барачатращал ва дакьаврищал. Хасъсса аьралий операциягу къуртал хьуну, тийх талатисса жула чиваркI цIуллу-цIакьну, сагъ-саламатну зана хьуннав жула ялун.
Шамил Рамазанов, Ккуллал райондалул бакIчи (2018-2025 ш.ш):
Ларгсса 2025-ку шин ттун ляличIисса, чIярусса, оьрмулуву дакIний личIансса дахханашивурттацIун дархIусса дия. Шинал хIасиллу дуллай, жяматращал цачIу дурмуния ххарину ва пахрулий ура. Нава каялувшиву дуллай ивкIсса райондалул социал сфералуву, инфраструктуралуву чIалансса мюнпатсса дахханашивуртту дан бювхъунни. Вихьуллал шяраву бувну къуртал барду чIярусса шиннардий ялугьлай бивкIсса, 220 инсаннансса кIану бусса ттизаманнул школа. Вара шяраву «Бизнес-спринт (Я выбираю спорт)» федерал программалул лагрулий тIивтIуссар инновациялул «аькьлу бусса» спортплощадка. Ва хъанахъиссар ларгсса шинал щалагу республикалий тIивтIусса укунсса ххюва площадкалувасса ца. Хъуннасса даву дан бювхъунни ххуллул отраслилуву. Бакьин бувссар агьамшиву дусса «Мамраш – Ташкапур – Араканский мост» республикалул трассалул ЧIяту Ккулув бияннинсса ххуллу. Райондалул хьхьичIуннайшивурттавасса цану ккалли дан бучIиссар Ккуллал шяраву цIусса ламу баву.
Райондалул агьалинал цIуллу-сагъшиврул масъала къулагъасрайн лавсун, гьануцIакул бакьин барду Ккулувсса участокрал азархана ва Вихьливсса амбулатория, 1-мур ЦIувкIуллал шяраву барду ттизаманнул тIалавшиннардайсса цIусса ФАП.
Дагьайсса къулагъас дарду гьарица кьини жула мюхчаншиврул къаралданий бавцIуминнахгу. Лавайсса даражалий кIицI дарду Ккуллал райондалий пожарная часть (ПЧ-32) тIиртIуну 15 шин хьусса кьини. Вай цаппарасса агьамсса ишру бакъа кIицI къалагарчагу, дурссар цаймигу райондалул даража гьаз бансса чIири-хъунсса цикссагу давуртту. Вай циняв райондалул агьалинал цачIу хъунмасса захIмат бивхьуну чIалачIи дурсса ккаккиярттур.
Ларгсса шин дакIний лирчIунни ттуйнма жаваблувшинна дусса, лавайсса къуллугъ тапшур баврийнугу. Республикалул бакIчинал хIукмулийну, на ивтунна Дагъусттаннал шяраваллил хозяйствалул ва дуки-хIачIиялул министрну. Ва хъуннасса вихшалар тIиссара ттуйнна дурсса, хIарачат банна му лайкь дан, ттула бюхъу-бажаргу, опытгу республикалул агропромышленный комплекс хьхьичIуннай даврил цIаний ишла бан.
Барча буллай ура цинявппагу лак ЦIусса 2026-ку шинащал. Гьарица инсаннан цIуллушиву дулуннав, гьарнал ужагърай барачат ликканнав, дунияллий дакьаву хьуннав.
МаматIи ХIамзатов, ЦIуссалакрал райондалул бакIчи:
Ларгсса шин жун бигьасса дакъая, амма райондалул жяматращал цачIу жуща бювхъунни чIярусса агьамсса проектру дузрайн дуккан дурну, ххуйсса хIасиллу хьун дан. ЧIярусса сиптарду щаллу дан бювхъунни кIулшивуртту дулаврил ва цIуллу-сагъшиву дуруччаврил, инфраструктуралул, экономикалул ва экологиялул, культуралул ва социал сферардаву.
ГьануцIакул бакьин барду ЦIуссаккуллал 2-мур школа. ЦIуминалийсса Аьхъардал ва ДучIиннал школардай магъивгу даххана дурну, котельныйрдугу бан бювхъунни. Цаппара школардай цIу дуккан дурссар оборудование, школарду бусса кIичIирттаву бивхьуссар чирахъру. ЦIанасса чIумал гьануцIакул баххана буллай буссар ЦIуссалакрал шяравусса ОьрчIал ва чIава жагьилтурал спортрал школа. Райондалул агьалинал цIуллу-сагъшиврул къайгъурдай ЦIуссачIурттащиял ва Шушиннал шяраваллаву бувссар ФАПру, ЦIуссаккуллал шяраву – врачебная амбулатория.
ЧIярусса давуртту дурссар шяраваллил кIанттурдайсса шартIру ххуй даву мурадрай. Бакьин бувссар шяраваллавусса 12 кIичIиравалу (5 километралийсса манзил). Дайдирхьуну дуссар ЦIуссалакрал шярава Гиляни шяравалличIан бияннинсса ххуллу (5км.ливчусса) бакьин буллай, асфальт бутIлатIисса , мукунна Ямансу шяравун щин дуцлацисса давуртту. Дакьин дурссар райондалул администрациялул ва ЕДДС-лул (Единая дежурно-диспетчерская служба) къатри.
ХьхьичIмур шинах бурувгун кIанттул бюджетравунсса налогру 12, 5%-рал ххишала хьунни. Ларгсса шинал райондалий чIярусса культуралул ва спортрал мероприятияртту хьунни. Райондалиясса оьрчIал хьхьичIунсса кIанттурду бувгьунни спортрал личIи-личIисса бяст-ччаллаву. Хъуннасса даву дурссар райондалул жяматрал хасъсса аьралий операциялийминнан ва миннал кулпатирттан кумаг баврил ххуллий. Шинал лажиндарай цикссагу гуманитар кумагру тIайла буккарду хасъсса аьралий операциялийн. Мукунма арцуйнусса кумагру барду СВО-лул гьурттучитурал кулпатирттан. Вай давурттан 5,5 миллиондалия лирчусса арцу харж хьунни. СВО-лул мяйцIаллий арула гьурттучинан дуллуссар аьрщи. АцIния ххюя аьралийчувнал къатрал чIирттай ларчIссар мемориалданул ултти. Бакьин бувссар хасъсса аьралий операциялий жанну дуллусса райондалиясса къучагътурал аьпалунсса кIива багъ.
Шинал лажиндарай дурсса даврил хIасиллал чIалачIи бунни властьгу, жяматгу куннацIун кув бавкьуну зурча, чIярусса мюнпатсса дахханашивуртту дан бюхъаншиву. Уттиния тихуннайгу райондалул даража гьаз баву мурадрай щаллу дуллансса чIярусса давуртту ва дузрайн дуккан дансса проектру дуссар. Заннал ка бавкьуну, миннухагу зунну.
ЦIусса шинал гьарнал оьрмулуву яргсса ххарисса ишру чIяву баннав, хьхьичIуннайшивуртту, тIайлабацIурду, мюнпатсса цIушиннарду ва ххуй чулиннайсса дахханашивуртту хьуннав. Гьарица ужагърай барачат ликканнав.
Сабина ХIусайнова, Дагъусттаннал медициналул университетрал кафедралул хъунмур, медициналул элмурдал доктор, профессор:
Ларгсса шинаву нава ххарисса, щалагу жула кулпатран тIааьнну дакIний ливчIсса ишну хьунни Дагъусттаннал медициналул университетрал Н.Курдюмовлул цIанийсса анатомиялул музейраву ттула буттан, цIанихсса аьлимчу ва педагог, профессор ТIагьир Сайдуллаховичлун хас бувсса кIантту тIитIаву. Ва хьунни чIявусса бусравсса хъамалгу, буттал даврил уртакьтал ва студентъталгу бавтIсса шадлугърал даражалийсса мероприятие.
Ттула пишалуцIун дархIусса мероприятиярттал чулуха авадансса шин дия. Хьунни нара гьурттушинна дурсса Аьрасатнал ва Дунияллул даражалийсса личIи-личIисса конференцияртту, хьунабакьавуртту, республикалул ва билаятрал кьатIувсса аьрххирду. Октябрь зурул ахирданий Москавлив, И.М.Сеченовлул цIанийсса 1-мур Медициналул университетраву хьунни М.Сапиннун 100 шин шаврин хас дурсса Дунияллул халкьуннал дянивсса элмийсса ва методикалул конференция. Микку гьуртту хьун ттуйнгу оьвкунни.
Конференциялий на Буттал кIанттул цIанийсса Хъунмасса дяъвилул шиннардий Дагъусттаннал медициналул зузалтрал бивхьусса захIматраясса, миннал хьхьичIуннайшивурттаясса доклад бувссия. Шинал ахирданий Аьрасатнал ЦIуллу-сагъшиву дуруччаврил министерствалул чулуха на гьуртту хьура Рязаннайсса «Обучение анатомии: взаимодействие теории и практики в высшей школе» конференциялий. Декабрь зуруй аьрххи багьуна Самаркьаннайн, VI -мур Дунияллул халкьуннал дянивсса медициналул вузирдал студентътурал олимпиадалийн. Ва хьунни Самаркьаннал паччахIлугърал медициналул университетраву. Шикку лечебный факультетрай дуклакисса жул студенткал кIилчинмур кIану бувгьунни. ДачIи шинал дянив кIийлла хьунни укунсса олимпиада. КIийлагу жул студентътал ххув хьуссар. ХьхьичIмур олимпиадалий цалчинсса кIану бувгьуссия. КIирагу олимпиадалий на жюрилувун бувчIунна. Шикку Дагъусттаннал медуниверситетрал анатомиялул кафедралун 90 шин шаврин хас бувсса докладгу бав. Жула вуз, нава каялувшиву дуллалисса кафедра чув-бухьурчангу лайкьну ккаккан бан хIарачат буллай бура. ЦIусса шинаву цинявннан чIа тIий бура чаннасса ссав, ххарисса ишру ва тIааьнсса хаварду. Цинявппагу жунма ххирами, гъан-маччами цIуллуну битаннав.
Гульшан Хасаева, М.Илиясовал цIанийсса «Дараччи» ихIсандалул фондрал президент:
Ларгсса шин чIярусса мюнпатсса давурттайну дакIний лирчIунни. Нава каялувшиву дуллалисса фондрая тIурча, шинал лажиндарай куннил хъирив кув чIярусса чирилул давуртту дан бювхъунни. Ми ххаллилсса давурттан дайдихьугу дунни Палестиннал активист, профессор Мазен Нуралдиннун бувсса кумаграл. Фондрал кабакьулийну мунаща бювхъунни Палестиннал масъаларттал хIакъираву Стамбуллайн гьан. Жул аякьалула тачIавгу къабувкссар хасъсса аьралий операциялул гьурттучитал ва миннал кулпатру. Вайннан кумагру буллай бивкIру «Дараччи» фондрал Москавливсса филиалданийхчин. Фондрал душру цимилагу бивссар, щавурду дирну, Москавуллал госпиталлай хъин хъанахъисса аьралийтурачIан. Му бакъассагу, кумагру бувссар хасъсса аьралий операциялий жанну дуллуминнал кулпатирттан, буттахъацIа хьусса оьрчIан.
Ватан дуруччул кьини Москавлив дарду «Герои нашего времени» тIисса, аьралийтуран хас дурсса вечер. Мукунна фондрал кабакьулийну дурссар Дагъусттан Республикалул лайкь хьусса артистка Загьидат Муслимовал ихIсандалул концерт. Ваний хьусса арцу хасъсса аьралий операциялийминнан кумагран ишла дурссар.
«Дараччи» фонд мудангу гьуртту шайссар ва чIарав бацIайссар лакрал культуралул цинярдагу мероприятиярттал. Арцуйнусса кумаг барду Лакрал театрданул юбилей дан. «Дагестан» Москавуллал культуралул центрданул президент Арсен Буйдалаевичлущал филиалданул вакилтал лавгссар цIанихсса композитор Ширвани Чаллаевлул юбилей барча дан муначIан шаппай.
Гьашинугу Москавлив, тийхсса чIявусса лакгу, Дагъусттанная бувкIсса бусравсса хъамалгу гьуртту хьуну, чирчуссар аьдатравун дагьсса лакку мазрайсса диктант. Ва хьунни ххюйлчинсса юбилейный диктант. Ванил лагрулий, гьар мудан кунна, бахшишру дарду Москавуллал вузирдаву хьхьичIунну дуклакисса дагъусттанлувтуран. Аьмну дурсса давуртту къахIисавну, «Дараччи» фондрал душваврал оьрмурдавугу хьунни ккалли дан бучIисса хьхьичIуннайшивуртту ва лайкьшивуртту.
ЦIусса шинаву цинявннан чIа тIий бура паракьатсса оьрму. Хасъсса аьралий операциялул ахир хьуннав . Жула оьрчIру сагъ-саламатну зана хьуну, ниттихъал дакIру рахIат дукканнав.
Тутубава Башанаева, Лазерный хирургиялул клиникалул хъунмур хIакин, остеопатиялул доктор, лавайсса даражалул хIакин-невролог:
Ларгсса шин пишалул ххуллий ва жяматийсса давурттал чулуха хьхьичIуннайшивуртту хьусса, тIайлабацIусса дия. ЧIярусса шиннардийсса захIмат дузрайн бувккун, ттул ччянивасса мурад щаллу хьунни. Остеопатиялул медициналул лавайсса даражалул Оьрус школалий ласав Дунияллул халкьуннал дянивсса остеопатнал диплом. Ххаришивугу, пахругу бия ва школалул хьхьичIунсса выпускниктуравух ттула цIагу душиврия. Щалагу билаятрай Школалул арулва филиал буссар. Миннул мукьа хьхьичIунсса выпускниктуравух нагу бияв. Ва ттул пишалул ххуллий хъуннасса агьамшиву дусса ишну хьунни. Лайкьну дипломрал защита дурну махъ, РВШОМ-лул ректор, медициналул элмурдал доктор Тамара Кравченкол тапшур бунни ттуйн цIусса шинал январь зуруй Санкт-Петербургливсса симпозиумрай ихтилат бан. Хъунмасса барчаллагь учин ччива Школалул ректорнахьгу, циняв преподавательтурахьгу ччимур тагьарданийсса пациентътуран лавайсса даражалул кумаг бан бюхъансса ххуйсса, куртIсса кIулшивуртту дулаврихлу. Шикку ларсъсса остеопатнал кIулшивуртту ва опыт ххуйну бучIи лявкъунни ттун хасъсса аьралий операциялул гьурттучитурал реабилитация дуллалиний. Вай давурттаву чялишсса гьурттушинна дурну тIий, Медициналул зузалал кьинилун хасну, ттун дуллунни Гиппократлул орден.
Ялагу кIицI лаган ччива,«Дагестан» МЦК-лул Медициналул зузалтрал ассоциациялул вакилтуращал, Центрданул президент, техникалул элмурдал доктор, профессор Арсен Буйдалаевичлул ва Ассоциациялул хъунмур, психологиялул элмурдал кандидат Гулизар Башанаевал каялувшиннаралу, шинал лажиндарай жу цимилагу бивру госпитальлай хъин хъанахъисса жула аьралийтурачIан. Н.Н.Бурденкол цIанийсса госпитальданий Закарья Аьлиевлущал ва цаймигу аьралийтуращал хьунабавкьусса чIумал, хъиннува бувчIунни жула ка-кумаггу, чIарав бацIавугу тайннан цуксса аьркинну ва бусравну дуссарив.
ЦIусса шинаву чIа тIий бура цинявннан цIакьсса цIуллушиву, кулпатирттаву нахIу-хIалимшиву. ДакIний битияра: ласун ка тIиртIуманал витIянхъру дуцIин дайссар, дулун ка тIиртIуманал дакI дуцIин дайссар.
Супиян Оьмаров, Дагъусттаннал Чичултрал союзрал хъунаманал хъиривчу, шаэр:
Ххирасса лакрал жямат, ниттил мазгу, миллатрал аьдатругу, хасъсса жула культурагу ядуллай, машгьур дуллай къаралданий бавцIусса «Илчи» кказитрал зузалт, буккулт!
Цалчин, дакIнийхтуну ЦIусса шингу барча тIий, чIа тIий ура оьрмулуву тIайлабацIу, талихI, давурттай хьхьичIуннайшивуртту.
Ларгсса 2025-ку шинал жунна чIярусса кьурчIишивурттугу, ххаришивурттугу ккарккунни. Бигьасса дакъая шин Дагъусттаннал Чичултрал союзрангу. Шинал дайдихьулий кьувкьуна Союзран ва миллатирттал секциярттан хIукуматрал чулухасса чIиви-хъунсса кумаг баву. Зеххавай лирчIуна Союзрал къатригума. Амма харж бур-бакъар къаувкуну, Союзрал хъунмур Марина АхIмадовагу, секциярттал хъунимигу хIарачат буллай бивкIунни личIи-личIисса мероприятияртту дан. Гьашину тIурча, Союзрал даву хIукуматрал цIунилгу цила хъаттиралун ласун хIукму бунни уттигъанну хьусса щалагу Аьрасатнал Чичултрал союзрал съездрай. Дагъусттанналмур Союзрайгу хьунни аьмсса мажлис. Шикку цIакь бунни Союзрал цIусса устав. ЦIунилгу председательну бувчIунни Марина Анатольевна АхIмадова. ЦIу бунни правлениялул членталгу. Лакрал чулуха мивун кьамул бунни Мирза Давыдов, Руслан Башаев, Супиян Оьмаров. БувчIунни мукунма Союзрал Хъунисриннал совет. Лакрал чулуха Советравун увчIунни Шалласу Шалласуев. Ва ивтунни Советрал председательнугу. Вай дахханашивурттайн бувну, Союзрал даву хьхьичIуннай хьунссар тIий умудрай ура. ХIакьинусса кьини лакрал секциялуву ур 25 член, 4 Дагъусттаннал халкьуннал шаэр. Союзравун кьамул ан хIадурну уссар 4 жагьилсса чичу. Секциялул даврий каялувшиву дуллай ивкIсса на утти Союзрал председательнал хъиривманугу увчIунна. Муниягу хьунхьуви жула лакрал чичултран къулайшиву.
ЦIусса шинаву ва пасатсса дяъвигу къуртал хьуну, гьарица къатлувун ххаришивуртту духханнав тIий, дуаь дуллай ура.
ПатIима Аьлиева (Магьдиева), хIакин-невролог, ш.Москав:
Гьарица шинал кьабитайхьунссар инсаннал дакIниву тIааьнссагу, къатIааьнссагу иширттацIун бавхIусса асарду. Ттунна ларгсса шин ххарисса иширттацIун дархIусса хьунни. ЧIивимур душ, лавайсса баллай экзаменнугу дуллуну, бувххунни Москавуллал университетрал (МГУ) паччахIлугърал аудитрал факультетрайн. Дянивмур душнилгу лавайсса кьиматирттай къуртал бунни МГИМО-лул (Московский государственный институт международных отношений) дунияллул халкьуннал дянивсса экономикалул арардал факультетрал (МЭО) 1-мур курс. Жувагу, цинявппа жунма ххирамигу цIуллуну, сагъну бушиву, мугу Заннайн щукру бансса иш бухьунссар цIанасса заманнай.
ЦIусса шин цинявннан ларгмурнияр ххуйсса хьуннав. Ххаришивуртту, хъиншивуртту чIяру даннав. Пашманмур, тIааьн бакъамур ларгсса шинаву ливчIун лякъиннав. Гьарнал мурадру ва хияллу бартлаганнав.
Светлана Кудаева, ЦIуссалакрал райондалул КIулшивуртту дулаврил управлениелул хъунмур:
Ларгсса шин жула билаятрай Ватан дуруччул шинну баян бунни. Шинал лажиндарай щала билаятрайгу, жула региондалийгу хьунни мунин хас дурсса, личIи-личIисса никирттал вакилтал лагма лаган буллалисса, Ватан дуруччайми лахъа-хъун буллалисса ххаллилсса мероприятияртту. Бусраврай дакIнин бивчунни Буттал кIанттул цIанийсса Хъунмасса дяъвилий Ватан дуручлай бивкIсса жула ттаттахъул ва хIакьину хасъсса аьралий операциялий гьуртту хъанахъими.
Шинал лагрулий ЦIуссалакрал райондалул кIулшивуртту дулаврил идарарттал ва нава каялувшиву дуллалисса Хъаннил союзрал чIярусса мероприятияртту ва акциярду дурссар хасъсса аьралий операциялий Ватандалул мурадру буручлачисса жула аьралийтуран ва миннал кулпатирттан кумагру баву мурадрайсса. Жу хIарачат барду укунсса къучагътал тарбия бувсса ниттихъал чIарав бацIан ва захIматсса чIумал.
ЦIусса шинал цинявннан чIа тIий бура талихI-ттирханну, цIуллушиву, ххарисса хаварду. Яла-яла, хасъсса аьралий операциялий Аьрасатнал билаят ххув шаву.
ПатIимат Аьлиева, Лакку мазрал центрданул хъунмур:
Ларгсса шин ссайну дакIний лирчIссарив бусларча, хьхьичIва-хьхьичI кIицI лагавияв ччянияцIавасса ттула мурад бартлагаву. ЧIярусса шиннардий Лакку мазрал центр тIитIинсса хияллай буссияв. Ва хиялгу бартлавгунни хIурмат лавайсса Сапарбаг Аьбдуллаевлул кумаграцIух, цан хъунмасса, дакIнийхтунусса барчаллагь.
Му бакъассагу, шагьрулул школардал дянивсса, миллатирттан хас дурсса конкурсирдай на хIадур бувсса оьрчIал хьхьичIунсса кIанттурду бувгьунни.
ЦIусса шинаву лакрал миллатран чIа тIий бура цIакьсса цIуллушиву, цинявннал кулпатирттаву нахIушиву.
Мисиду Гьарунова, «Солидарность и Свобода» жяматийсса организациялул вакил:
МахIачкъалаливсса Хуршиловлул (Юсупова) кIичIиравусса «Солидарность и Свобода» тIисса жяматийсса организациялул штабраву зий буссара на ттула ласнащал 2022-ку шиная шихунмай. Жул группалул диян дурссар хасъсса аьралий операция нанисса кIанттурдайн 900-ннийн дирсса тонна гуманитар кумаграл: дука-хIачIанмур, янна-ус, рацияртту, строительный материаллу, пачру, генераторду ва чIярусса цаймигу тикку аьркин дагьлагьисса кьай. Щарщун, тIайла дуркссар 1300-ннийн дирсса къертту.
Ларгсса шинал ноябрь зуруй ххюцIаллий кIилчин тIайла буккарду кумаг СВО-лийн. Му бакъассагу, жула къатран «Тазиятран» бувсса кIанттурдай хьунабакьару ва тIайла буккару отпускалийн бувкIсса аьралийтал.
Уттигъанну жучIан барчаллагьращал увкIунни МахIаммад Аьбдуллаев тIисса аьралийчу. Ва сайки зуруй, дука-хIачIанмургу, дакъа, окоправу жуламиннан кумагру буллай ивкIссар. ДакIний личIансса хьуна ванащалсса хьунабакьаву. Хъинну асар хьуна ванал ттухьва увкумур: «Мисиду-ниттирссий, ина гьан бувсса гьайчали — аятул курси хьхьичI ххуттайн наниний мудан ттущалва бикIайссар. Мунил на уруччара. Му лавсний ялун нанисса дрон чIарах лагай». Гьайчали ттун хIажлия ссайгъатран бувкIуна, нагу, ттучIаванияр цIаравусса аьраличувначIа хъиннича куну, тIайла бувкссия. ДакIний ливчIунни Ингушетиянавунсса аьрххи.
Аьралуннан кумаг баврицIун, цамургу бусравсса даву дуллай буссару. ЖучIа зий буссар «группа поиска». Уттинин вайннал лявкъунни ятIа-тIар бакъа бивкIсса 70-ннийн бивсса аьралийтал. Жул захIматрангу, хIарачатрангу кьимат бивщуну, шагьрулул администрациялул дакьин дурну, чIюлу дунни жул хIаят.
Я Аллагь, ЦIусса 2026-ку шинал хасъсса аьралий операция къуртал хьуннав, жула оьрчIру цIуллуну, сагъну ххувшаврищал зана хьуннав.
Зинаида Чавтараева, Лакрал театрданул артистка, Дагъусттаннал лайкь хьусса артистка:
Ларгсса шинал ттул оьрмулуву хьунни яргсса лахIзарду, дакIниву – яла тIааьнми асарду. Шин ттун ляличIинура тIайлабацIусса дия, хаснува театрданувусса ттула цалчинсса бенефисрайн бувну. Ва ттунма дакIний-мазрай къабивкIсса, цийнува цуппа хьусса иш хьунни. Ва ттул ххувшавунугу, хIарачатрал ва гьавасрал вибувцIусса творчествалул ххуллул лишаннугу хьунни.
Ларгсса шинаву дакIний личIансса иш хьунни жула театрданул юбилей. Ва агьамсса иширацIун бавхIусса гьавасрал цачIун бунни, лагма лаган бунни циняв, артистътал ва тамашачитал. Жува архIал ххари хъанай ва пахрулий бивкIру жула тарихрая ва хьхьичIуннайшивурттая. Ва дия цила дикIайкунсса искусствалул байран. Ванил чIалачIи бунни цуксса бияла буссарив жура дуллалисса даврийн тIайлашиврул ва куннал чIарав кув бацIаврил.
Ххирасса буккулт, ссаячIав нигьа къабувсун, захIматшивурттах къабурувгун, зула мурадру, хияллу бартбигьлагьияра! Дуллалимунил дакI ххари дулланнав, гьавас тачIав къалещаннав.
Кьадру бара оьрмулувусса гьарица кьинилун.
ЦIухху-бусу бувссар
Андриана Аьбдуллаевал