Ларгсса шинал ахирданий МахIачкъалалив Профсоюзирттал къатлуву хьунни Дагъусттаннал журналистикалуву яргсса лажин чирчусса машгьурсса журналист Алик АьбдулхIамидовлул аьпалун хас дурсса, Дагъусттаннал журналистътурал дянив баян бувну бивкIсса конкурсрал хIасиллу дуллалисса мажлис.
Алик АьбдулхIамидов увну ур 1956-ку шинал майрал 10-нний МахIарамкантуллал райондалийсса Юхари-Яраг тIисса шяраву учительтурал кулпатраву. Шиккува школагу къуртал бувну, увххун ур Художествалул училищалувун. Аьралуннаву къуллугъ бан гьаннин шяравусса школалий рисованиялул ва черчениялул дарсру дихьлай ивкIун ур.1985-ку шинал Ростоврал паччахIлугърал университетрал журналистикалул отделение къуртал дурну махъ, зун ивкIун ур «Дагестан» ГТРК-лий корреспондентну. ИвкIун ур жяматийсса ва политикалул программардал ведущийну. Ва ур аваза багьсса репортажирттал ва документал фильмардал автор.1998-ку шиная айивхьуну зун ивкIун ур Цалчинмур каналданул Ухссавнил Ккавкказнавусса собкорну. Буслай ивкIун ур Дагъусттаннайсса ва Чачаннавусса дяъвилул иширттая, хIадур дуллай ивкIун ур Дагъусттаннал жяматийсса ва политикалул оьрмулиясса , культуралиясса ва аьдатирттаясса репортажру. 2014-ку шиная айивхьуну зий ивкIун ур МахIачкъалаллал хьхьирил машлул флотрал генеральный директорнал СМИ-рдащал дахIаву даврил кумагчину.
Журналистнал даврищал архIал зий ивкIун ур Дагъусттаннал университетрал электрон СМИ-рдал кафедралул хъунама преподавательнугу. Шанна шинай лув-ялув ва увчIуну ур республикалул Жяматийсса палаталувун. Алик АьбдулхIамидов ивкIун ур «Каспий-Медиа» тIисса Региондалул журналистика хьхьичIуннай даврил центрданул хъунаманал хъиривчувнугу.
Алик кIийла лайкь хьуну ур «Честь. Мужество. Достоинство» тIисса Дунияллул халкьуннал дянивсса Артем Боровиклул премиялун. Мукуна кIийла лайкь хьуну ур Дагъусттаннал Журналистътурал союзрал «Мусил барзу» премиялун. Ва ур Дагъусттаннал паччахIлугърал премиялул лауреат. Алик АьбдулхIамидовлул мукунна лайкь дурну дур «Профессиональное признание» тIисса Юрий Щекочихиннул цIанийсса хасъсса приз.Алик аьпалухьхьун лавгссар 2025 шинал мартрал 26-нний.
Шиккун бавтIун бия республикалул СМИ-рдал, профсоюзрал организациярттал вакилтал, Аликлул дустал, даврил уртакьтал, гъан-маччами, ванал дарс дирхьусса студентътал. Мажлис тIитIлай, конкурсрал хIакъиравусса ва журналист дакIнин утлатисса ихтилатру бунни конкурсрал сиптачитал ва сакиншинначитал хьусса журналист, политолог, жяматийсса ишккакку Ханжан Кьурбановлул ва Дагъусттаннал Профсоюзирттал федерациялул председатель Аьбдулла МахIаммадовлул.
Алик АьбдулхIамидовлул оьрмулия, творчестволия бусласисса, ванацIун бавхIусса лахIзарду дакIнин бутлатисса ихтилатру бунни Дагъусттаннал университетрал журналистикалул отделениялул кафедралул хъунама ХIамид МахIаммадовлул, «Дагестанская правда» кказитрал хъунмур редактор Бурлият Токболатовал, «Дагестан» РГВК-лул гендиректор Камила ХIамзатовал, тележурналистътал Хатима Нисредовал, Ума Ибрагьимовал, Белла АхIмадовал, Карим Тамаевлул Аликлул уссил, Москавуллал физикалул ва техникалул вузрал преподаватель Низами АьбдулхIамидовлул ва м.ц.
Цинявппагу кIицI лаглай бия Алик тIайлашиву ччисса, цала принципирттайн хаин къашайсса, цала мукъул заллушиву дан кIулсса хIакьсса журналист, профессионал ивкIшиву. Ванал дарс дирхьуми буслай бия Алик АьбдулхIамидов цала учительнугу, пишалул ххуллийсса эбратнугу хъанахъишиву. Шиккува кIицI лаган, Аликлул дарс дишин бахтти къахьурчагу, бахтти хьуссар ттунгу ванал, Руслан Гусаровлул ва Тимур ЖахIпаровлул мастер-классру ххал бан. Ми бия на журналистикалул отделениялий дуклакисса шиннардий яла сий думи журналистътал.
– Алик цанма, цала къушлин, оьрчIан аьркинну тачIав щилчIав хьхьичI къаацIайва. Мунан бувчIлай бия яла цува буржлувну личIантIишиву. Алик щинчIав буржлувну икIан, щилчIав биялдарай икIан ччисса акъая. Цума-цагу хIакьсса журналист куна, властьрал органнал ялув бувхIумур чичлан къаикIайва.
Коллега хIисаврай тIурча, Алик цала даврил уртакьтурай дакI цIуцIисса, аякьа дусса ия. Буслан икIайва цалчинсса кIяла чIара цайра Руслан Гусаров ва Тимур ЖахIпаров сававну хьушиву. ДакIнин бутан,1996-ку шинал Къизлардайсса иширттаву, террористътурал бувгьусса хъами ва оьрчIру тархъан баншиврул вай цивппа рязину заложникталну лавгун бивкIссар. Та чIумал цува миннаясса буруккинттарал къазразан увну ивкIшиву буслан икIайва. Аликлун тIааьн бизайва студентътурал ва коллегахъал цайнма учитель учаву. Ва журналистътуран буниялагусса учитель ия. Ванал кумаг байва жагьилсса журналистътуран цалва ххуллу лякъин, – бувсунни ХIамид Аьбдуллаевичлул.
Бурлият Токболатовал кIицI лавгунни, властьрал органнан къаччан хьунссара тIий нигьабувсун, Аликлул макьала кказитрай къарирщусса иш тачIав къавхьушиву. Ванал чивчумур хIакьмунийн чул бивщусса, хъирив лавсса бикIайшиву. Укунсса даражалул журналистнащал кIулну, хIала-гьурттуну бикIаврия ххарину бушиву, цивппа мудангу куннан кув бувчIайсса бивкIшиву.
– Алик АьбдулхIамидовлул бивтун бур укунасса репортерная Цалчинмур каналданул Ухссавнил Ккавкказнавусса собкорнайн ияннинсса ххуллу. Ванал репортажру хьуссар дахханашивурттал эпохалул ва тIайласса мукъул лишанну. Миннул кьиматгу лавайсса бия, тIайласса ва инсаннай дакI цIуцIисса дуну тIий. ХIакьину цинявннан кIулли чичлан, амма хIакьсса журналистикалун аьркинссар гьарта-гьарзасса кIулшивуртту, аьркинссар лайкьми чIалан ва миннал тIимур баллан. На гъирарай дуккав «Илчи» кказитрал корреспондентътал Андриана Аьбдуллаевал ва Имара Саидовал медициналул сфералул зузалт ХIусайновхъал династиялиясса «Медицина в наследство: код преданности профессии» тIисса очерк, –увкунни ЦIуллу-сагъшиву дуруччаврил зузалтрал профсоюзрал рескомрал председатель Зумруд Бучаевал.
Ва конкурс хьунни Алик АьбдулхIамидовлул дайдирхьумур гихуннайгу лайкьну дачин дансса, цIусса никирал журналистътуравун тIайламур чичлансса шавкь рутансса ца чаранну.
Конкурсрал бия шанма номинация:
– захIмат;
– социал тIайлашиву (агьалинал оьрмулул даража, харжру);
– захIматрал династиярду.
Вай масъалартту хьхьичIунну бия Аликлун пишалул ххуллий. Аьмну зувинния лирчусса давуртту ххал диргьунни жюрилул конкурсрал лагрулий.
Ихтилатру къуртал хьуну махъ, ххув хьуминнан ва хьхьичIунсса кIанттурду бувгьуминнан буллунни дипломру ва арцуйнусса бахшишру.
Наградарттая ихтилат багьсса чIумал, жу, журналистътал, жула дянив хъярчру буллан бикIайссару, бахшиш дакъахьурча, бачIвасса дипломрал ци бави тIий. Ва базилухьрив жун бахшишнияр диплом хьхьичIунну, бусравну бия, цанчирча, цал цIа тIайлашиврул ва принципиальностьрал лишанну хьусса, Алик АьбдулхIамидов куна гьунар бусса журналистнал цIанийсса дипломрал сий, кьимат медиа-пространствалуву ляличIину хъунмассар.
Жугу, на ва ттул коллега Имара Саидова, ххарину бивкIру укунсса конкурсрал призертал хьун бюхъаврия.
Андриана Аьбдуллаева
