Ларгсса шинал ахирданий, ца-кIива зурул хьхьичI, Ккурккуллал шяраву Сулаймановхъал ва КьурбанмахIаммадовхъал кулпатирттал дянив аьрщарал ялув бяст-ччал багьунни. Мунил хIакъираву Лакрал райондалул бакIчинайн бувксса КьурбанмахIаммадовхъал гъан-маччаначIан Зураб Куччаевлуя укунсса жаваб дуркIунни:
«ХIурмат бусса Ккурккуллал жямат, Тимур Кьурбан­махIаммадовлул гъан-маччамий! На личIлулну ххал бав ттучIанма бувкIсса ва социал сетирдаву бивщусса, хасъсса аьралий операциялул гьурттучи, Жуковлул ордендалун лайкь хьусса Тимур КьурбанмахIаммадовлулли тIисса, бяст-ччаллихун дагьсса участокрал хIакъиравусса информация. Баян буллай ура нава му масъалалул ялув авцIуну ушиву. Ва бяст-ччаллил хIакъираву на хьхьичIгу, ттула пикри-зикригу бувсун, маслихIат бувссия, ттигу мунийва авцIуну ура. Ватандалухлу жан дуллусса жула къучагътурал кулпатирттал ихтиярду дуруччаврил масъала хьхьичI ххуттайн лавсун бикIан аьркинссар. Миннал хъуслийн кьаст лархIусса кIанттурду цукунчIав хьун битан къабучIиссар. Ва иширал хIакъираву ттул сипталий дурссар ххал бигьавуртту. Зат кIулсса инсанталгу кIункIу бувну, хъирив лавну ххал бантIиссар аьрщарайн багьайсса циняв документру, похозяйственный луттирайн бияннин, цIухху-бусу бантIиссар бардултрахь. Ххал бантIиссар шяраваллил администраторнал дурмур закондалул ххуллийсса дурив. Ххал бигьавурттал хIасиллая на баян банна.
ХIурматращал Лакрал ­райондалул бакIчи
Зураб Куччаев»

Хъиривва райондалул бакIчинал ва масъалалул хIакъираву укунсса баян баву дунни:
– ХIурмат бусса Лакрал райондалул жямат!
Баян буллай ура хасъсса аьралий операциялул гьурттучи Тимур КьурбанмахIаммадовлухь диркIсса аьрщарал хIакъиравусса бяст-ччал къуртал хьушиву.
Ккурккуллал шяравасса Юсуплул душ Анисат Гарайхановал граждан позициялийн, инсаншиврийн ва чумартшиврийн бувну, кIицI лавгсса масъала инсаншиврий щаллу бан бювхъунни.
Бяст багьсса аьрщарал закондалийнусса заллу Анисат Гарайханова рязи хьунни аьрщи, цичIав тIалавгу къадурну, КьурбанмахIаммадовхъал кулпатран дулун.
Райондалул администрациялул ва ттула чулуха барчаллагь баян буллай ура Анисат Гарайхановайн, чумартсса ва аькьилсса даву дурну тIий. Аьрщарал хIакъиравусса бяст-ччал къурталссар, СВО-лул гьурттучинал кулпатрал ихтиярду дурурччуссар.
Барчаллагь ва масъалалул ялув бакI цIуцIаву дуллай бивкIминнайн цинявннайн.
ХIурматращал Лакрал ­райондалул бакIчи
Зураб Куччаев

Аьрщарал ялувсса бяст-ччаллил ва Лакрал райондалул бакIчинал чивчумунил хIакъираву на цIухху-бусу бав Сулаймановхъал ва КьурбанмахIаммадовхъал кулпатирттахь.
Ариза Сулайманова:
– Цалчинва-цалчин, бувчIин бан ччива, ихтилат 19-мур ттуршукулия шихуннайсса ттул ниттил агьулданул Гумуевхъал леркьсса къатрая ва миккусса аьрщарая бушиву. Гумуевхъал кулпатрал бачIи танийва бивзун бур Щурагьун, бачIи, миннавух ттул ниттил нину Гумуева (Гарайханова) Аьйшат Исрапиллул душгу, ливчIун бур буттал къатлуву. Куявнал, ттул буттал ХIасан Сулаймановлул, цIусса къатри дурну, гиккун бивзукун, ниттил ниттил цила духми къатри ишла дуллан, ятту-гъаттара бакьин укра дулайва шяраваллил инсантурахьхьун. Ччя-ччяни шяраваллил зумания (яла цуппа ялапар хъанай бивкIсса кIаная) къатрах буруган, кIайннул тагьар ххал дан занан бикIайва. Му тачIав къатри даххансса пикрилий бакъая, ялунгума жухь тIун бикIайва, чара хьувкун, кIай къатралсса бара, кIай кIукун ­маритару тIий.
Рязира Ватандалухлу жан дуллусса вирттаврал мурадру ва ихтиярду дуруччаву хьхьичI ххуттайн ласун аьркинссар тIисса (ихтилат Тимур КьурбанмахIаммадовлуяр) Лакрал райондалул бакIчи Зураб Куччаевлущал. Амма, циваннив, Лакрал райондалул бакIчи кIицI лаглай акъар ттул ниттил, Анисат Гарайхановал (1941 ш.б., сайки 50 шинай Дагъусттаннал аграрный университетраву дарс дихьлай бивкIсса биологиялул элмурдал кандидат, кафедралул доцент), ппу кадровый хIаписар ивкIшиву, му, Киеврал аьралий округрай къуллугъ буллай, аьралий подразделениялул политрукну ивкIшиву, муналгу Буттал кIанттул цIанийсса Хъунмасса дяъвилий жан дуллушиву. Ягу Буттал кIанттул цIанийсса дяъвилий Ватан дуручлай жан дуллуми утти къучагътуран къаккаллиссарив? Ттул ниттин цила буттал лажин къаккаркссар. Ва бувссар ппу дяъвилийн лавгун ца-кIива зурува. Юсуп Гарайхановлул жан дуллуну дур Западный фронтрай. Душнин аьвкъун-бутта ккаккан къаитан щаргу къавхьуну, хъунмасса захIмат колхозрал давурттайгу буллай, цилалу хъунма бувссар дяъвилул ятин бувсса душ (ттул нину) Хъундахъал (Гумуева) Аьйшатлул.
Бяст-ччаллихун дагьсса аьрщи жу ниттил нину дунияллия ларгун махъгу укра инсантурал ишла дуллай бивтун бивкIру. Шяравун бувкIсса чIумал къатрах ябитан ларгсса жул нину дакI зия хьуну дучIайва.
Ларгсса шинал гъинттул шяравун лавгсса чIумал ванин бавну бия цила ниттил кIану чIумуйсса ишла буллай бивкIсса КьурбанмахIаммадовхъул бахлай бур тIий. 2025-ку шинал декабрь зурул 4-нний ванил тIалав бунни шяраваллил администрациялия ниттия бутIурай цинна дирсса аьрщарайн документру бан выписка дулара тIий. Закондалул ххуллий выпискагу ларсун бунни документру. Мичча байбивхьунни жул бяст-ччалгу.
Му къуртал хьуссар учин къахьунссар. Амма хIарачат банну куннай кув бавкьуну, цалийн бучIан.
Якьут Мусаева (Кьурбан­махIаммадова):
– ЦIана бяст-ччаллихун багьсса эяллу дусса кIанттурду ттул ниттил КьурбанмахIаммадова Сибрижатлул 1984-ку шинал машан лавсъссар, гъаттара бакьлан тIий, шяраваллил колхозраву зий бивкIсса Бадрижат тIисса инсаннаща.Та ппурттуву вай къатраву Бадрижат ялапар хъанай бикIайва, къатрал заллу Хъундахъал Аьйшатлул (Гумуева) мунин бавххуссар тIий. Жул чIаххулгу бур му иширал барашинна дуллай. КIай къатрай ттул ниттил, усттар увцуну, магъигу дирхьуссия.
Масъала уттигу ца чулийн ­къабувкссар. Умуд бур, маслихIат ккавккун, бавкьуну ца чулийн багьанссар тIисса.
Андриана Аьбдуллаева