ЦIусса шинал бухкIуллий Гъумук хьунни аьдатравун дагьсса Елкалул байран.
Ваний гьуртту хьунни райондалул бакIчи Зураб Куччаев, ДР-лул Халкьуннал Мажлисрал депутат Марат Илиясов, идарарттал каялувчитал ва зузалт, шяраваллал бакIчитал, дуклаки оьрчIру. Зураб Куччаевлул, бавтIми барча буллай, кIицI лавгунни район хьхьичIуннай шаврил ххуллий ялун нанисса шинаву яла агьамну ккаклакисса мурадру ва сиптарду.
Умуд бивхьунни, хасъсса аьралий операциягу тIайлабацIу буну къуртал хьуну, бусса гужру райондалул социал-экономика хьхьичIуннай даврил ххуллий зузи бан бюхъантIишиврийн.
«Умуд бур ЦIусса шинаву жухра ялугьлай душиврийн ххуйчулийннайсса дахханашиннарду. Жула кIунттихьри бусса райондалул ялун бучIантIимур – хIарачатраха лархьхьуссар ккаккиярттугу дикIантIисса. Жува гихунмайгу зунтIиссару шяраваллал инфраструктура хьхьичIуннай даврил ва агьалинал хIал-ахIвал лавай баврил ялув», – увкунни ванал.
Агьали барчагу бувну, ЦIусса шинаву тIайлабацIуртту ва хьхьичIуннайшивуртту чIа увкунни Марат Илиясовлул ва райондалул Хъунисриннал советрал хъунама Юсуп Рамазановлул.
Муния махъ райондалул бакIчинал, идарарттал каялувчитурал ва бувкIсса хъамаллурал «Мурадирал елкалия» ливккунни оьрчIал мурадру чIа тIисса конвертру.
Хасъсса къулагъас байрандалий дурну дия оьрчIах – райондалул Магьирлугърал къатлул зузалтрал хIадур дурну дия Дякъил Ттаттащалсса, Марххаладушнищалсса ва магьлул персонажирттащалсса яргсса, тяхъасса ва хIаз дизансса программа. Ваний чялишсса гьурттушинна дунни Гъумучиял школалул дуклаки оьрчIал ва ОьрчIал магьирлугърал школалул тарбиялувтурал. ЦIусса шинахасса назмурду ккалай, балайрду тIий, къавтIий, гьунарду ккаккан буллалисса оьрчIан цала кьуцурттава сахаватлувну ссайгъатру бачIлай бия Дякъил Ттатта ва Марххаладушгу.
Байрандалул сий хъиннура ягин дуруна лакрал машгьурсса балайчи Рашид Багатаевлул.
Укун тяхъану ялунгу дуркIун, ххаришивурттал ва тIайлабацIурттал кIутIу тIий тIайла дуккан нясивну ккакканнав Лакку билаятран 2026 шин, жувагу цIуллуну, хIакьину Ватандалул мурадру буруччаврил ххуллий талатисса жула чиваркIгу сагъ-саламатну кIура бавну!
