Нюжмаркьини Лакрал театрдануву хьунни Аьрасатнал лайкь хьусса артист Аслан МахIаммадовлул оьрмулул 60 шинал юбилейран хас бувсса бенефис.
ХьхьичIунсса артист ва режиссер барча унни культуралул министрнал хъиривчу Мурад ХIажиевлул, Дагъусттаннал Театрал ишккаккултрал союзрал хъунама, Аьрасатнал халкьуннал артист Айгум Айгумовлул, Лакрал райондалул бакIчи Зураб Куччаевлул.
Махъру лавхъминнал кIицI лавгунни артист хIисаврайгу, режиссер хIисаврайгу Аслан МахIаммадовлул Дагъусттаннал театрал магьирлугъ хьхьичIуннай даврил ххуллий бивхьусса захIмат, Аьрасатнал критиктурал ванал цIа хьхьичIунсса ххуттай дихьлай бушиву.
Бенефисрал лагрулий ккаккан бунни М. Кьурбановлул «Малла Насруттин», ацIра шинал лажиндарай театрданул репертуардануву тамашачитуран ца яла ххирамур спектакль. Асланнул цал уттигу ккаккан дурунни цалла усттаршиву ва сахIналухсса духкъалагайсса ччаву.
КIицI бан багьлай бур, Аслан МахIаммадовлул мукьцIалунниха лирчусса шинну хас дурну дур магьирлугъраха дакI тIайлану зий, захIмат буллай. Цумур роль ласурчагу дур ларайсса пишакаршиврул, хьхьичIуннайшивурттал ва халкьуннал ччаврил мугьру бивщусса, так ца Дагъусттаннай бакъасса щалагу Аьрасатнал сахIналул дунияллий лайкьсса кIану хIалал бан бювхъусса. Ванал творчествалул биографиялуву дур арулцIаллийсса агьамми рольлу; Жадов А.Островскийл «Аьгъу кIану»; Альбер – А.Пушкиннул «Бахилсса багьадура; Скапен –Ж. Мольердул «Скапеннул хIилларду»; Данден –Ж. Мольердул «Жорж Данден»; Хлестаков – Н.Гогольлул «Ревизор»; АхIмад-Хан Султан – Бадыкиннул ва Челсил «АхIмад-Хан Султан»; Малла Насруттин» – М. Кьурбановлул «Малла Насруттин»; князь Пантиошвили –А. Цагарелил «Ханума»; АхIмад — Гь. Саэдовлул «Къалайчитал»; Къарат ЦI. Камаловлул «Хан- Муртазааьли» ва чIярусса цаймигу тамашачитуран дакIний лирчIсса ва пишакартурал лавайсса кьимат бивщусса.
Артистнал усттарну хIасул дурсса чIярусса ларайсса художествалул сипатру лайкь хьуну дур республикалул, Аьрасатнал ва дунияллул халкьуннал дянивсса театрал фестивальлал дипломирттан. Му бакъасса, Аслан МахIаммадовлул бивхьуну бур мукьцIалунниха ливчусса спектакльлу, вайннувасса чIявуми лавайсса кьиматран лайкь хьуну бур щалагу Аьрасатнал ва дунияллул халкьуннал лагрулийсса театрал фестивальлай.
Ф.Г. Лоркал «Бернарда Альбал къатта» шанма-шанма дипломран лайкь хьуссар Владикавказрай «Сцена без границ» тIисса дунияллул халкьуннал дянивсса миллатирттал театрдал фестивальданий (2011ш.): «Лучший спектакль фестиваля», «Лучшая режиссура» (Аслан МахIаммадов) ва «Лучшая женская роль» (Дагъусттаннал халкьуннал артистка Жинасат ДинмахIаммадова).
Ва спектакль лайкь хьуссар Аьрасатнал цалчинсса профессионал артист Федор Григорьевич Волковлул цIанийсса Аьрасатнал хIукуматрал премиялун. Премия цурдагу дуллуссар 2013 шинал Ярославль шагьрулий ХIV-мур дунияллул халкьуннал дянивсса Волковский фестивальданий.
А. Цагарелил «Ханума» лайкь хьуссар Владикавказрай «Сцена без границ» тIисса дунияллул халкьуннал дянивсса миллатирттал театрдал фестивальданий «Лучшая женская роль второго плана» дипломран (Дагъусттаннал халкьуннал артистка Луиза Шагьдилова, 2015 ш.).
Х.Халиловлул «Ккурккуллал Щаза» хьуссар «Воспевшие Дагестан» тIисса Республикалул театрал фестиваль-конкурсрал лауреат (2016 ш).
С.Кьасумовлул «Оьтту ва макь» лайкь хьуссар Каспий хьхьирицIухсса паччахIлугъирттал миллатирттал театрдал дунияллул халкьуннал дянивсса фестивальданий «Лучшая режиссура» дипломран (2019 ш.).
А. МахIаммадовлул «Камаллул Башир» хьуссар «Федерация» тIисса щалагу Аьрасатнал миллатирттал театрдал фестивальданул дипломант (Грозный, 2019 ш.).
С. Кьасумовлул «Ччаву ва макь» – «Воспевшие Дагестан» тIисса Республикалул театрал фестиваль-конкурсрал лауреат, «Лучшая женская роль» дипломран лайкь хьуссар Дагъусттаннал лайкь хьусса артистка Зинаида Чавтараева Гъумучиял ПатIиматлул рольданухлу.
А. Островскийл «Бесприданница» лайкь хьуссар мукьва-мукьва дипломран Ивановский областьрал Кинешма шагьрулий «Горячее сердце» тIисса VII-мур дунияллул халкьуннал дянивсса оьруснал классикалул драматургиялул фестивальданий (2025 ш.) : Аслан МахIаммадов – Дагъусттаннал халкьуннал артистка Саният Рамазанова, Дагъусттаннал лайкь хьусса артистка Зинаида Чавтараева ва артист Руслан Ларин.
