Ттигъанну МахIачкъалалив Оьруснал театрданул хъунмур залдануву хьунни Дагъусттаннал халкьуннал артистка Саният Рамазановал творчествалул вечер.
ХьхьичIунсса артистка ва балайчи барча бан бувкIун бия республикалул магьирлугърал ишккаккулт, ванил творчествалул кьимат кIулми, шяравучутал, архIал дуклай бивкIми ва гьалмахтал.
ЦачIа творчествалул кьимат лавайсса ванил шяравучу, «Дагъусттан» ГТРК-лул хъунама директорнал хъиривчу Ссалам Хавчаевлул ванил Дагъусттаннал театрал магьирлугъ хьхьичIуннай даврил ххуллий бивхьусса захIмат кIицI лаглай, бувсунни Саниятлуйн гьунар буттая бивну бушиву:
«Вил ппу Санихъал МахIамма ия шеърирду чичаврил ва балай учаврил гьунар бусса чув. Шаэршиврий машгьур къахьурчагу, аьпа бивул, жунма кьабивтунни лакку аьрщарахасса ххаллилсса шеърирду. Амма на учивияв, МахIаммалул яла ххуймургу, ххаллилмургу произвение инара куну. Ина дургьуцири цаннияр ца ххаллилсса рольлу кIицI къадулланна, амма Лакрал театрданул 80 шинал юбилейрал мажлис ттун бия вил бенефис кунма чIалай, цанчирча цавагу спектакль бакъая ина агьаммур рольдануву гьуртту бакъасса. ЦIана тIурча, на кIицI давияв ттунна хъинну асардай лирчIсса вил кIира роль – «Ромео и Джульетта» спектакльданувасса Кормилицал ва «Ниттил хъу» спектакльданувасса Аьрщарал. Учин бюхъанссар, Лакрал театрданул жува магьирлугърайну буччин буллалиссару куну. КIилчинмур роль ласурчагу, учин бюхъанссар, ина лакку аьрщарал пахрулунсса душра куну.
Саниятлущал архIал ца классраву дуклай бивкIми кIицI лаглай бия ванил шеъри буккаврил усттаршиврул хIайран байсса бивкIшиву учительталгу, дуклаки оьрчIругу, ванил сочинениярттурив куннаща кув зехлай, ккалан бикIайсса бивкIшиву.
ХьхьичIунсса артистка ва балайчи барча бунни Лакрал райондалул бакIчи Зураб Куччаевлул, ванил творчествалул кьимат бусса Магьди Айналовлул, шяравучу Нурислан Хавчаевлул ва цайминнал.
Саниятлул цила творчествалул мажлис байбивхьуна буттал, МахIаммалул, Кьукуннал шяраваллиха чивчусса балайлийну. Программалуву бия халкьуннал балайрду, вичIидихьултран ххира хьусса ва цIу-цIусса балайрду. Увкунни СВО-лул цалчинсса Аьрасатнал Виричу НурмахIаммад ХIажимахIаммадовлун хас бувсса балайгу. Ва балайлул махъру ва макьан чирчуну дур Аьлим Раджабовлул. Ккаккан бунни артисткал агьамми рольлу дургьусса «Ханума», «Чеховлул хъярчру», «Тамаша» спектакльлавасса бутIри.
Балайрдайну Саният барча бунни Лакрал театрданул артистътурал ва Дагъусттаннал цаймигу балайчитурал.
Зувиллий шанна шин хьуну дур Саниятлул Лакрал театрданул сахIналий, миллатрал, оьруснал ва кьатIаллил билаятирттал классикалул драматургиялул произведениярттаясса спектакльлаву хьхьичIунсса рольлу дугьлай. Ванил хIасул бувну бур яргсса ва личIи-личIисса хасиятирттал сипатирттал щаллусса галерея. КIицI данну миннувасса язими: К. Мазаевлул «БурцIурдил хъатIи» спектакльданувасса Ассадагур – ва рольданухлу 1993 шинал Саният лайкь хьуссар «За лучшую женскую роль» дипломран ва и премиялун; М. Чариновлул «Шагьалай»; Афет – М. Щамххаловлул «Ласнал нину»; Полина А. Островскийл «Аьгъу кIану»; Щялмахъ – Р. ХIамзатовлул «Оьрмулул чарх» – ва рольданухлу «Поэтический театр» тIисса республикалул фестивальданий ва лайкь хьуссар дипломран ва арцуйнусса бахшишран; Фаина – Бадыкиннул ва Челсил «АхIмад-Хан Султан»; Кормилица У. Шекспирдул «Ромео и Джульетта» – ва рольданухлу лайкь хьуссар «За лучшую женскую роль второго плана» дипломран; Пура – А.Портеслул «Кунпаякун хьусса къатта»; Магдалена – Ф.Г. Лоркал в «Бернарда Альбал къатта»; Ханума — А.Цагарелил цIанихсса музыкалул комедиялуву – ва рольданухлу лайкь хьуссар Барият Мурадовал цIанийсса театрал конкурсрал дипломран «За лучшую женскую роль»; Гертруда – У.Шекспирдул «Гамлет»; Анна Андреевна – Н. Гогольлул «Ревизор»; Жумайсат – М. Кьурбановлул «Малла Насруттин»; Харита Игнатьевна – А. Островскийл «Сунчи»; Мирчуткина – «Чеховлул хъярчру»; Бернарда – цIу буккан бувсса «Бернардал къатта»; Амату С. Кьасумовлул «ЛухIи кьини».
Саниятлун дазу дакъа ххирар театр, сахIна, цила рольлу ва тамашачитал. Мунияту духьунссар цумур-цагу ванил роль тамашачитуран тирххандарансса.
Зулайхат Тахакьаева
