Ххуллункьини Лакрал райондалий хьунни хъуннасса субботник. ЦIусса шинал мероприятиярттугу ялун най духьувкун, ва иширах хъуннасса къулагъас дурну дия райондалул бакIчи Зураб Куччаевлул, хьхьичI гьантрайра агьалинайн видеооьвчаву дурну. Агьалигу байрандалийн кунма, гьавасрай куннал кув бувгьуну бувккунни.

Субботникрай гьуртту хьунни райондалул идарарттал зузалт, кIанттул депутатътал ва буттал кIанттуй дакI цIуцIаву думи.
ЧчюрклицIа, мурхьирдая кьатI хьусса чIапIацIа ва цIинцIацIа марцI бунни жямат батIайсса кIанттурду: паркру, скверду, Гъумучиял бярнил ккурккахалу. «ХIакьину жунна чIалай дур агьалинал цашиву. Депутатъталгу, идарарттал зузалтгу, агьалигу цаннацIух ца бувккун райондалун агьамсса давриву гьурттуну – цивппа ялапар хъанахъисса кIанттай марцIшиву дуллай. Субботникру даврийну марцIшиву дуруччаврицIун, жува агьалинаву тарбия дуллалиссару жаваблувшиннагу, цивппа ялапар хъанахъисса хIаятгу, шяравалу, район марцIну ядансса. Райондалул субботникрал исват бунни, цачIу бухьурча, дан къашайсса дакъашиву.
Ва дия унгу-унгусса халкьуннал субботник.
Миллатрал багьа бакъасса ххазина зунттаву ялапар хъанахъисса халкьри. Умудрай ура ва агьалинал кумаграцIух, Аллагьналгу кабавкьуну, ттула ниятру чулийн дуккан дан бюхъантIишиврийн», – увкунни Зураб Куччаевлул.

Зулайхат Тахакьаева