Ккуллал райондалул администрациялул бакIчинал бигарду чIумуйну биттур буллалисса Ажуб ХIусмановлул каялувшиврий хьунни террорданийн къарщисса комиссиялул заседание.
Ваний гьуртту хьунни райондалул АТК-лул члентал, ихтияр дуруччай органнал, райондалул администрациялул зузалт, кIулшивуртту дулаврил идарарттал каялувчитал ва шяраваллал администрациярттал бакIчитал.
Заседаниялул даву дайдирхьунни АТК-лул гьашинусса шинал дурсса хIасиллая. Шиккува бувсунни ЦIусса шиналсса байрандалул гьантрай мюхчаншиву дуруччаврил ххуллу-чаранная, ххал диргьунни террорданийн къарщисса комиссиялул даврил ва властьрал органнал тапшур бувну бивкIсса хIукмурду биттур баврил тагьар. ЛичIинува кIицI лавгунни байрандалул гьантрай низам дуруччаврил ва инсантал нигьачIаврия мюхчан баврил масъалартту.
Террорданийн къарщисса комиссиялул гьашинусса шинал дурсса ва 2006 шинал дантIисса давурттая доклад бунни райондалул бакIчинал хъиривчу Анатолий Давдиевлул. Ванал балжину бувсунни республикалул ва муниципал идарарттащал хIала-гьурттуну дурсса давурттая.
АТК-лул аппаратрал хьхьичIунсса пишакар МахIаммад Рамазановлул бунни жаваблувсса хIукмурду биттур бавриясса доклад . Бувсунни протоколданийн лавсъсса цинявппагу хIукмурду биттур баврил ялув кьянкьану бацIаврийну райондалул агьали нигьачIаву дусса иширттаща буруччин бювхъушиву.
Аьрасатнал МВД-лул Лакрал райондалийсса хъунама МахIаммад Рамазановлул райондалул администрациялул зузалтрайн тапшур бунни байрандалун хасъсса мероприятияртту дуллалисса идарарттайсса мюхчаншиву дуруччаврил ялув бацIан.
Ажуб ХIусмановлул тIалав бунни кIулшивуртту дулаврил, культуралул, спортрал идарартту ва чIявусса инсантал бавтIсса кIанттурду нигьачIаврия буруччаву. Ихтилатирттая махъ комиссиялул кьамул бунни цаппара хIукмурду.
Ахирданий Ажуб ХIусмановлул барчаллагь увкунни заседаниялий гьуртту хьуминнахь.
Имара Саидова
