ЦIусса шин дайдихьулул гьантрай МахIачкъалаллал администрациялул Машлул, рекламалул ва муштаринал хIаллихшиндарал управлениялул вакилтал бивунни СВО-лий шагьидну жан дуллусса АсхIад ХIажиевлул нину Саният ХIажиевачIан шаппай.

Саниятлул лявма арс Исламлул хьхьиривун бюкьлакьисса инсантал ххассал буллай, кьура шинал оьрмулуву жан харж дурссар. КIицI лавгсса управлениялул хъунама специалист Аьбдулзагьир Бийболатовлул Саният барча бунни МахIачкъалаллал мэр Жамбулат Салавовлул цIанияту. Дуллунни байрандалун бахшишругу. Уссурваврал цIарду чирчусса мармарчарил ула дусса лажинчIира бакьин бувну, фасад ххуйсса даражалийн дуцин махъ буллунни гъили дагьайхту.
«Вил хъунама арснал АсхIадлул, Дагъусттаннал университетрал худграф къуртал буварчагу, аьралийчунал пиша язи бувгьунни, гьалмахтал ххассал буллай Харьковрал областьрай жан дуллунни интту 2022 шинал. Хъиривма арснал Исламлулгу, гьалаксса хьхьирил щатIавун ххявххун, ца инсан ххассал увну, гама ххассал уллай унува чувшиврий жан дуллунни. Укунсса жагьилталгу, вайннал гьунардугу жунма хъамакъабитантIиссар. Укун виртталсса арсру тарбия бувсса ниттихъал хIурматгу жучIава лахъну бикIантIиссар», – увкунни Бийболатовлул.
Саниятлул шамилчинма арс Муса дуклай ур МахIачкъалаллал ххассал бувулт хIадур буллалисса колледжраву, дуккавриву хIарачат бусса, низам дусса жагьил ур. Ва колледж багьлухсса бухьувкун, хъамаллурал махъ буллунни, ниттин кумагран, ялун нанисса шинал колледжравусса ванал дуккаврихлусса багьагу булун.
«МахIачкъалаллал администрациялул, хаснува Машлул ва рекламалул управлениялул вакилтал аякьалий ттул чIарав бацIай мудангу. Байрандалул гьантрай ичIунмай бувкIун барча бувара, бучIансса сант дакъанийгу, оьвкуну барча бувара. На барчаллагьрай бура ттухрасса ва нава кунмасса ниттихъахсса, кулпатирттахсса къулагъасрахлу. Хаснура байрандалул гьантрай, язисса арсурваврацIа хьусса жул дакIурдиву къумашиву цIунил цIулаглан дикIай, укун дакIцIуцIаврий щавуй ка дишин хьхьичIунмай хьуминнал аякьагу, асаргу, бусрав шай. ЦIусса шин гьарцаннал къатлувун ххаришиврущал, буллугъшиврущал ва цIуллушиврущал духханнав, дяъвилул цIу ччяни лещаннав, СВО-лийсса оьрчIругу цIуллуну шаппай бучIаннав», – увкунни Саният ХIажиевал.
ПатIимат Рамазанова