Декабрьданул 23-нний МахIачкъалалив, Профсоюзирттал къатлуву, хьунни цIанихсса журналист Алик АьбдулхIамидовлун хас дурсса Дагъусттаннал журналистътурал конкурсрал хIасиллу дуллалисса мажлис.

Мажлис тIитIлай, конкурсрал хIакъиравусса ихтилат бунни ванил сиптачи ва сакиншинначи, политолог, тарихчи, телерадиоведущий Ханжан Кьурбановлул ва Дагъусттаннал Профсоюзирттал организациярттал союзрал председатель Аьбдулла МахIаммадовлул.
Мукунма Алик АьбдулхIамидов дакIнин утлатисса, ванал творчествалия бусласисса ихтилатру бунни ДГУ-лул журналистикалул отделениялул кафедралул хъунама ХIамид МахIаммадовлул, «Дагестанская правда» кказитрал хъунмур редактор Бурлият Токбулатовал, «Дагестан» РГВК-лул гендиректор Камила ХIамзатовал, тележурналистътал Хатима Нисредовал, Ума Ибрагьимовал, Аликлул уссу, Москавуллал физика-технический вузрал преподаватель Низами АьбдулхIамидовлул ва мукунма цайминнал.
Ихтилатру хьуну махъ, конкурсрай ххув хьуминнан ва хьхьичIунсса кIантту бувгьуминнан буллунни дипломру ва арцуйнусса бахшишру.
Бахшишран лайкь хьунни «Илчи» кказитрал журналистътал Андриана Аьбдуллаева ва Имара Саидова.
Мероприятиялия гьарта-гьарзану бусанну хъиривмур номерданий.
Андриана Аьбдуллаева