Вай гьантрай МахIачкъалалив ДР-лул Энергетикалул министерствалий хьунни, декабрьданул 13-14-нний гьавалул тагьар даххана шаврийн бувну, МахIачкъалалив, Каспийскалий, Дарбантлив, Къизлярдай, Къизилюртлив, Дагъусттаннал Огнилив ва зунттал районнай ттукIрал ххаллу рурцун, чани бакъа ливчIун бивкIсса иширттан хас дурсса брифинг.
Шикку гьуртту хьунни Дагъусттаннал энергетикалул ва тарифирттал министр Марат Шихаьлиев, «Россети Северный Кавказ» — «Дагэнерго» ПАО-лул филиалданул директорнал бигарду чIумуйну биттур буллалисса МахIаммадшяпи Шяпиев, Региондалул управлениялул центрданул директор Исрапил Исрапилов ва журналистътал.
Министрнал кIицI лавгунни, республикалий хIасул хьусса захIматсса тагьарданийн бувну, ттукI бакъа ливчIун ивкIшиву 76,6 азара инсан.
ТтукIрал линиярттай хьусса аварияртталсса буллай бивкIун бур 28 бригада ва 28 хасъсса техника. Вайннал хIарачатрайну 9 ссятрал мутталий ттукIрал щаллу бувну бур 95% агьалинал. Цинярдагу линияртту дакьин дуллай 20 ссят хьуну дур.
БатIаврий министрнал кутIану бувсунни электросетирттал инфраструктура цIакь даван дуллалисса давурттая.
МахIаммадшяпи Шяпиевлул кIицI лавгунни МахIачкъалаливсса электросетирттайн гуж багьлай бушиву, ми куклу шаву мурадрай цаппарасса линиярттай ярглий ттукI лешлан багьлай бушиву.
– ХIакьинусса кьини ттукI лешлай, хъинну аварану дур вай микрорайонну: Семендер, Хушет ва Пальмира. Шиккусса трансформаторду кIири бичлай, ччучлай бунутIий, чIумуйнусса ттукI лешлай, вай бигьалаган буллан багьлай бур. Мукун къабулларчан, подстанциярттан ва шиккусса оборудованиярттан хъунисса зараллу хьун най бур, ваницIун бавхIуну инсанталгу хъунмасса хIаллай ттукI бакъа личIан най бур, – увкунни МахIаммадшяпи Шяпиевлул. Ванал мукунма бувсунни 2026 шинал 11 фидер гьануцIакул цIу дуккан дантIий душиву.
Исрапил Исрапиловлул бувсунни, декабрьданий ттукI лешлашаврийн бувну, чIявусса аьрзарду Семендердай, Ахъушинскийл, имам Шамиллул цIанийсса проспектирдай, Редукторный поселокрай, ЦIусса Хушетрай, Пальмира кварталданий ялапар хъанахъисса инсантурал чулухасса бивкIшиву.
Имара Саидова
