ХIакьину, билаятрайн кьини дурксса ппурттуву, аьралийтурал махъ цивппа бушиву ккаккан буллай, дакIнийхтуну кумаг буллай, чIарав бацIлацIисса, дугърисса тIуллу дуллалисса инсантал чансса бакъар. Вай гьантрай хасъсса аьралий операциялий гьуртту хъанахъисса ЦIуссалакрал райондалиясса ЦIуссалакрал шяравасса Артур Хункеровлун гуманитар кумаг гьан бунни ванал аьралий гьалмахтурал.
Хасъсса аьралий операция байбивхьусса ппурттуву, Артур хушрай лавгун, СВО-лий гьуртту хьунсса контракт чирчуну дур. Аьралий операциялул ишру нанисса зоналий ванащал цIакьсса дусшиву дурну дур Ашттарханнал областьраясса гьалмахтурал. Ца ппурттуву, отпускалий шаппай лавгсса гьалмахтуращал телефондалувух вания-тания буслай, жапрай ивкIун ур Артур. Аьралийтурал шартIру ххуйну кIулсса ванал дустурал, ихтилатрая махъ, чара бакъа кумаг бансса пикри бувну бур.
Вайннал цалва бувсса ххуйсса пикри лахъи лаган къабувну, щаллу бувну бур. Анаварсса мутталий АртурдучIан гьан дурну дур дуки-хIачIия, медикоментру, фонарду, янна-ус дусса ва цаймигу кьай-кьуйлул бувцIусса «Нива» автомашина. Артурдул цала гьалмахтурахь аьркинмуния ссихI-чIитI къадурккун диркIун дур. Хаварбакъулий дустурая бувкIсса ссайгъатрал тIурча, махIаттал увну ур.
– Уссурвал, зунмагу бувчIлай бухьунссар, цуксса уздансса даву дурссарив зура. Вай цимурцаннуяр ттун хъинну асар хьунни ттула махъ дугърисса, аякьалийсса гьалмахтал бушиву, – тIий ур Артур.
Ва иширал буниялагу тасттикь буллай бур дусшиврул дазу дакъашиву. Укунсса гьалмахтурал дуллалисса чумартсса тIуллал дакI дуллай дур ва ххувшаву ласунсса гьавас бутлай бур аьралийтуравун.
Имара Саидова