Хасъсса аьралий операция байбивхьуния шинмай Ватандалул мурадру буруччин аьрайн цивппа кIункIу хьусса чансса бакъар шагьрурдал ва районнал администрациярттай зузиминнал дянивгу. ДачIи-дачIи шинайсса кIийла лавгссар СВО-лийн Буйнакскаллал райондалул администрациялий зузисса жула лаккучу, Гъумучатусса Баширдул арс Мирзахан Башировгу.
Ва аьрайн тIайла уклакисса информация ттул итталун багьуна Буйнакскаллал райондалул сайтрай дукIува. Райондалул бакIчи Уллубий Ханмурзаевлул ванахь увкуна: «Вилла даву ххуйну кIулсса, захIмат ххирасса ва низам дусса ина жунгу акъа чара бакъамара, амма аьрай жуннияр аьркинссара тIий най ухьувкун, итаакьлай буру», – куну.
Райондалул бакIчинал увкумуницIун ххи бан, кIай кIицI лавгсса хасиятирттацIун, ххишала акъа хьхьичIун урувгсса, пахру-ххара бакъасса инсангу лявкъунни. Аьрай унийгу, аьрая увкIун мукьахгу ва хьхьичIунай къавхьунни кказитирттайн информация булун, цаятува бусан, чичин. Гьаннайсса, чувшиврий кьинигу лархъуну, цалва биялалиймургу бувну, паракьатну тинайну авцIунни. Укунминная бусавумур жул, журналистътурал, буржри. Чув, ссаха зий бухьурчагу, ларайсса наградарттангу лайкь хьуну, лакрал цIагу гьаз дуллалиминная буслангу, чичлангу.
Мирзахан «Каспий» батальондалул цалчинминнавассар. Ванал чувшиврун лахъсса кьимат бивщуну бур ХIукуматралгу. ДукIува Барчаллагьрал чагъар буллуну бур ванан Дагъусттаннал Халкьуннал Мажлисрал председатель Заур Аскандаровлул цIанияту. Ва чагъарданий кIицI лавгун бур аьралийчунал бурж биттур буллай Мирзаханнул ккаккан бувсса гьунардая Халкьуннал Мажлисрангу хавар бушиву ва барчаллагьрай бушиву иш багьний цува хIакьсса патриот ушиву ккаккан баврихлу. Вара мяъна-мурадрайсса Барчаллагьрал чагъар бур дукIу октябрь зуруй Лакрал райондалул бакIчи Юсуп МахIаммадовлул цIаниятугу буллуну. ДукIу октябрь зуруй Дагъусттаннал бакIчи Сергей Меликовлул цIаниятугу лайкь хьуну ур АхIмад-Хан Султаннул цIанийсса медальданун. Цаймигу дур кьиматрайсса наградартту ванал. Вайннувух гьашину октябрь зуруй (октябрь барз ванан наградарттал чулуха барачатсса бунуккар) лайкь хьуну ур «За храбрость» 2-мур даражалул медальданун.
Аьрасатнал президент Владимир Путиннул Указрайн бувну, ванан ва паччахIлугърал награда – «За храбрость» 2-мур даражалул медаль дуллусса ппурттуву, Буйнакскаллал администрация цала Телеграм-каналданий укун барча уллай бур: «Мирзахан Баширов – яхI-къириятрал, буржирал инсанни. Яргсса эбратри. Хасъсса аьралий операция байбивхьуния мукьах ва къисттану ия Ватандалул мурадру буруччин аьрайн гьан. Цува хушрай лавгуна, цаятува мюнпат бикIансса кIулну, «Каспий» батальондалул связьрал группалул командирну. Ванал профессионализмалия ва кьянкьану ацIаврия цимилагу ххуйсса кумаг хьушиврий чIурчIав дунни подразделениялул хъуниминналгу. ЗахIмат- жапасса иширттаву ванал аьралий масъалартту магьирну биттур бувайшиврун лахъсса кьимат бивщунни. Ва ларайсса наградагу ванал чувшиврун, къуллугърал бурж лажин кIялану бартбигьаврин бивщусса кьиматри».
Жугу цIакьсса цIуллушиву ва дуллалимуниву тIайлабацIу чIа тIий буру Баширхъал Мирзаханнун.
ПатIимат Рамазанова
