Аьрасатнал президент Владимир Путиннул вай гьантрай «МОСГАЗ» АО-лул коллективран газрал промышленность хьхьичIуннай давриву бивхьусса захIматрахлу дуллунни «За доблестный труд» орден. Аьрасатнаву ца яла хъуннамунин ккаллисса газрал промышленностьрай чIярусса шиннардий каялувшиву дуллай ур жула лаккучу, ГьунчIукьатIрал шяравасса Гьизбуллагьлул арс ХIасан ХIасанхIажиев. Бюхттулсса наградалун коллектив лайкь шаврилгу исват буллай бур ХIасан куртIсса кIулшиву дусса, итххявхсса каялувчи ушиву.
Буниялагу, пахру бан лайкьсса иш бур жула дагъусттанлувнал каялувшиву дуллалисса хъуннасса агьамшиву дусса компаниялул наградартту лайкь даву.
«МОСГАЗ» Москав шагьру газрал дузал буллалисса, билаятрайсса газотранспортрал ца яла хъунмур предприятие хъанахъиссар. Цукунсса бюхъу-даражалул икIан багьлай бур мукун жаваблувсса бигарду цайнма лавсъсса, муксса агьамшиву дусса предприятиялий каялувшиву дан вихшала дурсса пишакар. Кьянкьану учин бюхъанссар, чIумул тIалавшиннардацIун дархIусса каялувчинал хасиятру дусса ур ХIасан ХIасанхIажиев куну.
Ванан кIулли, иш багьсса чIумал, анаварну хIукмугу бувну, мунил жаваблувшивугу цайнна ларсун, захIматсса тагьарданувун багьарчангума, паракьатну маслихIат ккаккан. ХIасанхIажиевлул пикрирдугу куртIри, хъунисса лагрулул информациягу ванал ххуйну лаласай, отраслилул спецификалул давугу щиннияргу ххуйну кIулли. Нажагьсса бухьунссар ва кунма, даврил иширттаву тIайлану къуццу тIун, финансирттацIун дархIусса сурсатру мюнпат буну ишла дан кIулсса каялувчитал. Му исват буллай бур ХIасан ва хъуннасса хозяйствалий 15-нния лирчусса шиннардий цукунчIавсса шилтагъшиву къадурну каялувшиву дуллай ушиврулгу.
Увну ур ХIасан ГьунчIукьатIрал шяраву. Дагъусттаннай ГьунчIукьатIрал шяравалу машгьурну диркIссар 1917 -1922 шиннардийсса Граждан дяъвилул чIумалсса революциялул иширттаву чялишну гьурттушинна даврийну. Муниятур ГьунчIукьатIрайн большевиктурал шяравалу куну учайсса бивкIссагу. 1921 шинал январданул 3-5-нний (шанма гьантлул мутталий) шяравун ххярххун диркIсса, 1700 инсанная хIасул хьусса контрреволюционертурал кьюкьлуйн данди бувккун, цала тархъаншиву дурурччуну, му кьюкьагу махъуннай лихълахъи дурссар ГьунчIукьатIрал жяматрал. Хъуннасса гьурттушинна дурссар ГьунчIукьатIрал жяматрал Буттал кIанттул цIанийсса Хъунмасса дяъвилийгу. Бюхттулсса Ххувшаву гъан дуллай бивхьусса захIматрахлу И.В. Сталиннул гьан дурссар ГьунчIакьатIрал жямат барча буллалисса телеграмма. Колхозрангу цачIава личIансса Занази ЯтIул ттугъ буллуссар. ГьунчIукьатIрал шярава цикссагу бувкссар дунияллийх машгьур хьусса, лакрал миллатрал цIа-кьини бюхттул дурсса аьлимтал. Нажагьсса бухьунссар цIанихсса аьлимтурал Амир Амаевлул ва МахIаммад Дандамаевлул, Социалист захIматрал Виричу Гъази Хинчаловлул цIарду къакIулсса.
МахIаттал хьунсса иш бакъар укун гьунар бусса инсантал бувксса, барачатсса аьрщарай ХIасан ХIасанхIажиевгу ляхъаву.
Буттал шяраву школагу къуртал бувну, ХIасан увххун ур Москавуллал энергетический институтравун. Шикку ванал лавхьхьуну бур «Динамика и прочность машин» тIисса пиша. Ванийну гьашиву къадурну, бувккуну бур Топливно-энергетический комплексрал пишакартурал ва каялувшиву дуллалисса зузалтрал квалификация ларай даврил институт. Пишалул магьиршиву лахьлай ивкIун ур Регионнал дянивсса Строительствалул ва промышленностьрал комплексрал академиялуву.
Ванал захIматрал ххуллу байбивхьуну бур СССР-данул Элмурдал академиялул Дагъусттаннайсса филиалданий. Коллегахъал бусаврийн бувну, ХIасан танийва ивкIун ур даву цила кIанайн руртун дувайсса инсан.
1999 шинал, Москавлив ивзун махъ, ва кьамул увну ур шагьрулул Ччуччиялул ва энергетикалул хозяйствалул департаментрал отделданул хъунама пишакарну. Муния шихунай Москавуллал коммунал отраслилуву зий 26 шин хьуну дур. Ванал цала бакIрайн ларсун дур шиннардий дузрайн дуккан къадурсса агьамсса давуртту, ссуссукьу хьусса фондрал, финансирттал, кадрарду биялну бакъашиврул ва цаймигу масъалартту бусса предприятия. ХIасил, учин мукъун, кьувтIуну ур давривун, луглан ивкIун ур масъалартту чулийн буккан бувансса ххуллу-чараннах. Ванал коллегахъул буслай бур, ХIасаннул нюжмарду шайва хьхьунил ссят кIира-шанна хьуннин зий, кIюрххицIунайгу уххаву къакIулну даврийн учIайва тIий.
2009 шинал ХIасан ивтун ур «Мосгаз» АО-лул гендиректорну, хIакьинусса кьинигу ва идаралий каялувшиву дуллай ур. 2017 шинал, Москавуллал мэр Сергей Собяниннул хIукмулийн бувну, ХIасан ивтун ур Москав шагьрулул ЖКХ-лул департаментрал каялувчину. Шикку зий ванал кIира шин дурну дур. Яла лавгун ур цува каялувшиву дуллай ивкIсса «Мосгазрал» гендиректорну зун.
КIицI лаганну, предриятиялул даву ялу-ялун хьхьичIуннай хъанай най душиву. МуницIун бавхIуну, чIаланну ххуй хъанай най бур шикку зузиминнал ахIвал-хIалгу. ХIакьину зузалтраща, цалла пишакаршиву ларай даврицIун, ишла дан бюхълай бур пишакартуран кумаг хIисаврайсса программартту ва социал хIаллихшиннарду. Гьарица шинал профсоюзрал чулуха кьювкьусса багьлуй итадакьлай бур санаториярттайнсса путевкартту, сотрудниктурал оьрчIангу дуллай бур гъинтнил лагерьдайнсса путевкартту ва личIи-личIисса мероприятиярттайнсса билетру. ЛичIиссара къулагъасрайн ва аякьалийн лавсун бур шикку отраслилул ветерантал.
«Мосгазрай» хъуннасса къулагъас дуллай бур предприятиярттал ва идарарттал дянивсса конкурсирттаву, бяст-ччаллаву гьуртту шаврихгу.
Масалдаран, уттигъанну «Мосгазрал» сварщиктал, «Лучший сварщик России — 2025» тIисса пишалул магьиршиву ккаккан дуллалисса щалагу Аьрасатнал конкурсрай гьуртту хьуну, мусил ва чарвитул медальлу ларсун бувкIунни. Предприятиялий зузисса чIявуми сварщиктал бур дунияллул даражалийсса чемпионатирттай хьхьичIунсса кIанттурду бувгьусса. Шиккува кIицI лаган, вай гьантрай Москавлив хьунни Бюхттулсса Ххувшаврил 80 шинал юбилейран хас дурсса «Волшебная сила голубого потока – «Мосгаз» зажигает звезды» тIисса цIанилусса чIава жагьилтурал балай учаврил гьунарду аьлтту буллалисса щалагу Аьрасатнал фестиваль. Ванийнугу чIалай бур «Мосгазрал» каялувчитал жагьилтурал творчествалул гьунарду ялун личин баву мурадрайсса давуртталгу чIарав бацIлай бушиву. Укунсса мисаллу цикссагу буцин бюхъанссар.
Аьрасатнал президентнал, «Мосгаз» АО-лул коллективрахь 160 шинал юбилей барча дуллай, кIицI лавгунни щалагу дунияллий ва предприятие ца яла хъуннамунин ккаллину душиву. Президентнал ххи бунни «Мосгазрай» захIмат буллалисса цинявппагу пишакартал ларайсса квалификация дусса бушиву, вайннайн хъар хъанахъишиву Москав шагьрулул агьалинал ужагъру газрал дузал баву.
«Зу гьарица кьини шагьрулул къайгъурдаха зий буру. На мукIруну ура Мосгазрал лайкьсса тарихгу, чаннасса бучIантIимургу бушиврий. Вихну ура зул профессионал коллективрал хьхьичI бивхьусса цинявппагу мурадру бартбигьиншиврийн, шагьру хъиннува лащу-щаллу баншиврийн, зул коллективрал захIмат бакIуйн буккантIишиврийн», – увкунни, «Мосгазрал» коллектив барча буллай Сергей Собяниннулгу.
ХIасан хъанай ур И. М. Губкиннул цIанийсса Аьрасатнал паччахIлугърал газрал ва навтлил университетрал Попечительский советрал член, вава вузрал кIулшиву дулаврицIун кабакьу буллалисса Жяматийсса советрал фондрал член. Ва мукуна хъанай ур Москав шагьрулул хIурмат бусса энергетик, Москав шагьрулул ЖКХ-лул хIурмат бусса зузала, Аьрасатнал Федерациялул хIурмат бусса строитель. Мукуна ва хъанай ур АьФ-лул лайкь хьусса энергетик. ХIасанхIажиевлул захIматран лавайсса кьимат бивщуну бур Аьрасатнал профсоюзиртталгу. Ванан дуллуну дур «За содружество» тIисса хIурматрал лишан. Ва бусравсса лишан дулайссар чIярусса шиннардий захIматрал ихтиярду дуруччавриву бивхьусса захIматрахлу ва социал партнерствалул сфералуву чIалачIи дурсса ккаккиярттахлу.
Аьрасатнал Федерациялул Аьралий Гужирдал масъалартту хIасул бавриву бувсса хIарачатрайну ва бажарданийну ХIасан лайкь хьуну ур АьФ-лул Обороналул министерствалул чулухасса «За отличие в военно-политической работе» тIисса медальданунгу.
Букъавсун битан къабучIир, ХIасан ччя-ччяни Донбассрайн аьралийтуран гуманитар кумаг буван лагайшивугу. Вай давурттугу пахру-ххара къабувну, щинчIав кIул къахьунну дуллай ур. ХIасанхIажиевлул аьралийтуран кумаг баврия инсантуран кIул хьуну бия «Россия 24» телеканалданийхчIин. ХIасан хасъсса аьралий операция нанисса зоналийн увкIсса ппурттуву Американал «Хаймерс» снаряд пIякь увкуну, чIявусса жула аьралийтурайн щавурду дирну диркIун дур. Снаряд пIякь увкусса кIанайн цала машиналий лавгун, цIунцIияртту, щавурду дирсса оьрчIру мюхчаншиву дусса кIанайн буккан бувну бивкIун бур ХIасаннул. Та чIумал ванал ххассал увну ур щавурду дирсса 10 аьралийчу.
Яла тамашамур иш хьуну бур 2022 шинал ссуттихунмай. ХIасанхIажиевлул къучагъсса тIул дуршиву буслаcисса сюжетрая цIунилгу бавну бур «Россия 24» телеканалданийхчIин. Ванан Барчаллагь баян бувну бия Баргълагавал аьралий округрал генерал-полковник Сергей Кузовлевлул.
Мажал бакъашиврух къаурувгун, ХIасанхIажиев цала мархрая, буттал шяраваллия арх къауцайсса хIакьсса патриотгу ур. ХIасаннул цува хъуна хьусса, дакIнин ххирасса ГьунчIукьатIрал шяравун учIансса мутта мудангу лякъай. Шяраваллил жяматрал иширттачIагу сахаватлувну ацIайсса инсан ур. ГьунчIукьатIрал жямат ванайн барчаллагьрай бур шяравусса цаппара кIичIирттавух асфальт бутIаврил, шяравун щин дуцаврил ва цаймигу иширттаву дурсса чялишсса гьурттушиннарахлу.
ЧIа учинну ХIасан ХIасанхIажиевлун цIуллушиву, гихунмайгу дакI марцIну къуллугърал мурадру бартбигьлансса каши-кьудрат ва цала каялувшиву дуллалисса компаниялул даву хъиннура хьхьичIуннай шаву.
Зиябуттин ХIажимирзаев, Дагъусттаннал
лайкь хьусса строитель
