ХIурмат бусса Зулайхат Каримовна!
Лакрал райондалул администрациялул коллективрал ва ттула цIания дакIнийхтуну барча тIий ура вихь юбилей.
50 шин – му, бивтсса ххуллух бурувгун, мунил лагрулун кьимат бищун багьлагьисса дазур. Вил оьрму – пишакаршиврул, буххаву къакIулсса захIматрал ва ларайсса жаваблувшиндарал яргсса эбратри. Гьашину вил дур кIилийнусса юбилей – 25 шин бартларгун дур ина жула миллатрал «Илчи» кказитрайн дакI тIайлану зий. Сахаватлувну кIибачIлай най бура ина буккултращал вила гьунар, аькьилшиву ва магьирлугъраясса кIулшиву. Культуралул отделданул редакторнал даврий ина хъунмасса захIмат бихьлай бура Дагъусттаннал рувхIанийсса аваданшиву дуруччаврил ва хьхьичIуннай даврил ххуллий. Дагъусттаннал магьирлугърал лайкь хьусса зузала, «Мусил барзу» премиялул лауреат – вай цIардал буслай бур уртакьтурал дянив вил бусравшиву цуксса дуссарив.
Ина лайкьссара ца лакрал бакъасса, щала республикалул пахрулун.
ЧIа тIий буру вин цIакьсса цIуллушиву, бухкъалагайсса гьавас, цIу-цIусса тIайлабацIуртту.
ХIурматращал Лакрал райондалул бакIчи Зураб Куччаев
Барча тIий буру Лакрал театрданул литературно-драматический бутIул каялувчи Тахакьаева Зулайхат Каримлул душнихь кIилийнусса юбилей!
БачIи оьрму Зулайхатлул лавгун бур «Илчи» кказитрал редакциялий зий. ЧIивинияцIава театр ххира хьуну, ванил журналистшиврул биялсса бутIа бавхIуну бур театрданул оьрмулуцIун. Зулайхат Лакрал театрданул ца яла дакI тIайламиннавасса тамашачигур, театрданул даву куртIну кIулсса дус-ихтиваргур, за бувчIусса маслитхIатчигур.
ЧIа тIий буру вин, Зулайхат, лахъисса ва цIуллусса оьрму, давриву тIайлабацIу ва хьхьичIуннайшивуртту!
Лакрал театрданул коллектив
Жул ххирасса Зулайхат, барча вил кIилийнусса юбилей.
Винналусса дуниял дусса, му дунияллух вила ябитаву дусса (оьрчIал кунма, гьартану тIивтIусса ярунних) журналист, щихачIав къалавхьхьусса пиш, мугу, чIиви оьрчIал кунма, аьчухсса, дакI хъиншиврул ва лагма-ялттунахсса ччаврил пар бусса. Зулайхат хIисав къавхьуну къаличIай: чIявучиву я бацIансса, цуппагу, цIагу ххуйсса дуну тIий бухьунссар. Заннал нажагьссаннан дакъа къадулайсса, цила аьчухшиврийну, чIиви оьрчIал кунна тIиртIусса дакIнийнугу.
Лакран ина дунияллийн бувккун бура миллатрал магьирлугъ ядулланшиврул. Мукъул бияла гьарнахь бакъассар, миллатрал цIания гъалгъа тIунгу гьарцаннаща къашайссар.
ЧIяру даннав дунияллухсса ччаврил дурцIусса вил шинну. ЛичIаннав ина ва дуниял хъиншиврул ва ххуйшиврул дуцIин дан бюхълай.
М. Илиясовал цIанийсса «Дараччи» клубрал хъунмур Гульшан Хасаева
