КьатIаллил билаятирттай яхъанахъисса аьрасатлувтурая чичлачисса журнал бур «Зима» (« ZIMA Magazine») тIисса. Щаллагу дунияллийсса оьрус эмиграциялул оьрмулия, проектирттая, инсантурая, шагьрурдая бусласисса.
Ссуттил итабавкьусса номерданул гьанумур тема дур гъурбатрай даву лякъаврицIун дархIусса. Хасъсса рубрика дур, цума цукун «кризисрал базаллувун» увкссарив, даврийн уххайни цукунсса захIматшивуртту хьунадаркьуссарив бусласисса. Ва рубрикалул автортуравух ур жула лаккучу Загьиди Аьлиевгу, Карашрал шяравасса.
Загьидинал цала кIану лявкъуну бур Парижуллал модалул индустриялул дунияллий. Ва Москавлив цаппара шиннардий люксрал брендирттащал зий ивкIун ур, махъва-махъмур зузи кIану Москавлив бур «Fendi». Амма 2022 шинал бутик лавкьуну бур, ца шинава коллективрал бачIи сотрудникталгу давуртту дакъа ливчIун бур. Загьиди Къазахъисттаннай ивзун ур, «12 Storeez» брендрал давриха зун. Тикку ванан Франциянавун, модалул шагьрулийн гьан маслихIат бувну бур. Загьидигу сивсуну ур француз мазвагу къакIулнува. Документиртталссагу бувну, ва зун увххун ур «Sandro» брендрал даврийн, амма ванан шикку тIайлабацIу къавхьуну бур, «испытательный срокрал» чIун лагайхту, ва муданнасса даврийн увххун ур «Marc Jacobs в Le Bon March» бутикравун.
«Ттун ххирар инсантуращал зун, янналул хъирив увкIсса муштари рязину личIанну янна лаххан уван, агьайкун алгин. «Marc Jacobs» фирмалийн на зун увкIра хъунама консультантнал даврийн, кьамулгу увнав ччиссаксса хIаллайсса контракт цIакь дурну. ХIатта французнан цанмагума укунсса контракт цIакь дуван захIмат шайссар. Ва контрактрал ххуйшиву мунивур, кьамул увма даврия укьан уван захIматссар, хIатта бутик лава-лакьирчагу, жу ххуйсса арцу ласун аьркинссар. Ва ялагу, агар на даву дакъа личIарчангу, кумаг буван хIадурсса инсанталгу чан бакъар. На нава нигь дусса инсан ура, ялун бучIантIимунил буруккин бусса.
ЦIубутIуй, мазгу, кIанттул рынокгу къакIулну, ттун бигьану бакъая. На шикку зузисса ттунма кIулциринная аьркинсса информация кIул буллай ивкIра, агентствардал сайтирдайн ва паччахIлугърал идарарттайн чичлай, бутикирттавух уклай, ци чаран шайрив ххал буллай. Ттуйн собеседованиялийн оьвчайва компаниялул ягу маркетологнал. ЧIявуми кIанттай ттун баяйва: «Резюме гьаксса ххуйри, француз маз багьайкун кIулну бакъар». Ттуннив му ппурттуву баччи бакъая, укунсса тIалавшинна духьувкун, ци журалул даврихун ахчирчангу. Укун къулайсса даврил хъирив авлий уклакисса ттун бувчIуна Елисейнал Къурдарав ттучаннайн агьан бигьашиву, туристътал ила бивчусса кIану бухьувкун, тикку ингилис маз кIулшиву агьамну дунутIий. «Marc Jacobsрай» цIубутIуй захIматшиву муниву дия, логистика щалла француз мазрай дия», – укун буслай ур Загьиди модалул дунияллийнсса цаламур ххуллия. Уртакьтал кумаг буван хIадурсса бушиврулгу биялсса кабакьу бунни тIий ур.
ЦIанакул Загьиди цалла Instagram-рал майдан гьарта буванмуниха зий ур, модалия, брендирттая, стильдания гьарзану чичлай. Агьалинан цIу буну, авурну янна лаххан лахьхьин кумаг буллай.
Ххуйсса харжи бур, коллектив ххуйсса бур, страховка дур, модалул дунияллийсса кIулшивуртту куртIгу, цIакьгу дуллансса сантгу дур, чIунгу дур тIий ур.
«Ттун утти, тиху-шихунай ххяхха къауклай, паракьатну ттула давриха зун ччай бур. Французнал лахьхьин бунни паракьатну зун», — тIий ур.
Жугу ва жула жагьилнан, гъурбатрай чил билаятрал мазгу лавхьхьуну, модалул машлул дунияллий цаламур кIану лявкъусса, инсантуран исвагьийну чIаланну янна лаххан кумаг буллалисса Загьидинан, уттиния тинмайгу дуллалимуниву тIайлабацIу чIа тIий буру. Парижрай модалул бизнесраву учIиману къуццу тIунгу, ччатI ябангу, язиминнал ххуттайн агьангу бигьасса иш бакъахьувкун.
ПатIимат Рамазанова
