2016 шинал цалчинмур кварталданий Дагъусттаннай навт буккан баву, дукIумур шинах бурувгун, чан хьуну дур 17,8 процент­рал, ми хъанай дур 32 азаллий 653 тонна. Мунил хIакъираву бувсунни ДР-лул транспортрал, энергетикалул ва связьрал министерствалул. Мура чIумал газ буккан буллан бивкIунни 3% ххишалану – 59 млн. куб.метра.

ХIасан Аьдилов
Гава ведомствалул вакилнал увкусса куццуй, навт буккан баву гьашинугу чан хъанан тIий дур. Мунил савав дур навт бу­ккан байсса къувирду (скважинарду) кугьна шаву ва цIусса къадуклай бушиву.
2015 шинал республикалий навт буккан баву, газрал конденсат хIалану, хьуну дур 175 азаллий 900 тонна (2013 шинах бурувгун 95,1%), тIабиаьтрал ва попутный газ – 252 млн. 100 куб.метра (2013 шинах бурувгун 87,5%).
Республикалий мюнпатсса мяъданну буккан баву гьарза баншиврул, экспертътурал пикрилий, аьркинссар навтлил ва газрал компаниярттал инвестортал кIункIу буллан, мукунма Каспий хьхьирил шельфрай углеводородирттал луртанну лякъин.
Дагъусттаннал территориялий навтлил ва газрал мяъданнал потенциал бур 509 млн. тонна, миннувату шельфраву – 340 млн. тонна. ТIабиаьтрал газрал потенциал бур 877 млрд. куб.метрарду, миннувату шельфраву – 540 млрд. куб.метрарду.