Вай гьантрай щалвагу Аьрасатнавасса дуклаки оьрчIру гьуртту хьусса сочинениярттал конкурсрал хIасиллу дунни: 442 чIава авторнава ххув хьуми бавтIун Москавлий, бахшишругу дуллуну, барча бувантIиссар. Ххув хьуминнавух бур жулва лаккудуш, Пятигорск шагьрулий № 6 школалий 11-мур классраву дуклакисса ХIажиева Фаина, Расимлул ва Светланал душгу.
Ванил «Бюхттулсса аьрщарал къюкI» тIисса сочинениялуву Аьрасатнал халкьуннал авадансса аьдатирттая ва цашиврия бувсун бур. Сочинение цурдагу магьлул кьяйдалий чирчусса дур.
«Аьвзал заманнул Дух – Ватан Ядувул (Хранитель) гьарца миллатрал ца-ца вакилнайн оьвкуну, миннахь увкуну бур: «Бухьхьияра ттучIан лавгзаманнул балайрду дакIниву бума, цаманал къюкIлил чIарав къюкI ришлай ччима». БувкIун бур Кьиблалия къазак Савелий, Чачаннал шяравасса Аида, Дагъусттаннаясса МахIаммад, Башкортосттаннаясса Тимер, Бурятиянавасса Баир, Якутиянавасса Нургуяна, Татарсттаннаясса Лайли, оьруснал шяравасса Таня. Гьарманал кIунттихь бивкIун бур цалла аьрщарал чару ва цала тухумрал тарих. Ватан Ядувул увкуну бур яла вайннахь: «Зуватусса гьарма бюхттулсса къалалул чIирайсса чарур, ца чарил цилалу чIира къабугьайссар, цачIу цIакьну бацIавривур гуж бусса. Буккан бара зулва чарттугуча, миннува Ватандалул къюкIру дуккан дувара».
ЦIунилгу экьилавгун бур аьвзал заманнул азарва журасса балайрду. КъавтIий булувкьуну бур инсантал, ккавккун бур куннан кув, азарва журасса бунугу, куннан кув язисса. Инсантал куннайн кув хIусут буллалисса Марчгу бакъа-къатIа хьуну лавгун бур. ЛирчIун дур Аьрщарай дусшиву, нахIушиву».
Ва сочинениялул ца парчар, ванивагума чIалай бур Фаина чичаврил гьунар бусса ва пикри куртIну байсса, лагма-ялттумунил хIисав ласайсса, личIлулсса душ бушиву. Литературалул ххуллий тIайлабацIу ва цIу-цIусса ххувшавуртту чIа тIий буру.
Бусанна Фаина Читтурдал шяравасса, цIанакул Ханты-Мансийск шагьрулий мина дирхьусса шаэр, журналист Кьурбан Кьурбановлул хъунмур душнил Светланал душ бушивугу.
ПатIимат Рамазанова
