Космина Исрапилова

Ниттил мазрай
чивчуминнува

***
Ттюнгъасса кьакьари кьакьан къабаннав!
Пар-пар тIисса яру лещан къабаннав!
Ттул дакIнил балайрду вичIан бияннав!
ВичIатугу жаваб ттучIан дучIаннав!

Ссавний лелуххантран дурчIай ттул дардру.
КIайннул хъирив лехлай бур ттул пикрирду.
Амма нава леххан, так макIра бакъа,
Къабитара щяллил, ччаннацIун ларчIун.

***
Вил оь паракьатри, бярнил щин кунма.
Цукун бувчIинссар вин ттул щаращи оь?
Виннив, буси, ттуннив аьркинсса кумаг,
Ттуща ччаву хIачIан къаччав, жагьил оьрчI?

Ттул дакIниву кюру, туну, циван бав?
Вил симан даиман ттул хьхьичI циванни?
Паракьатсса ттул оь цан щаращи бав?
Циван хьунаавкьра оьрмулул ххуллий?

***

РахIматри вил ччаву ттул
кьаркьсса дакIнин,
Цими шин ларгривав на вих ялугьлай?
Гъинттулсса баргъри вил ччаву
ттул къюкIлин.
Лещавай дия ва, ина къаукIлай.

ХIакьину ттул оьрму – тIутIайх дирчу ар,
Лахьхьусса кьаркь уртту хъамадиртунни.
«Инагу нагу – цар» ттигу учияр,
Ва ччаву аьркинсса виннияр ттунни.

***
Вил хъазам ххялагивуй,
Ттул дакI дарцуну ливхъсса!
Ттуллагу дакI дуцаннав,
Вил хъирив кIункIу тIисса!

Ссавнийх баргъ экьилаглай,
ДуркIукун чIун лабикIан.
Жагьил оьрму лавгунни:
ЧIунни, ччавуй, кьадикIан.

Ххаришиврун дучIайссар
Жагьилний эшкьи-ччаву.
Мунийн хIасрат учайссар
Завасса оьрмулуву.

Шахьуйми

Шахьуйми учайссар жуйн,
Шавхьсса махъ бусавай тIий.
Яла ххуймур жалингу
Шахьуйннал арнил тIутIир.

Жул чIирисса шяраву
Намус куртIсса халкь буссар,
Жагьилтурал аьралну
Аьрщи ххассал дувайссар.

Шавхьсса оьрму бутайссар,
Шахьуйричу ухьурча,
«Ниттиуссуй», «буттарссуй»
Хъуниминнахь учайссар.

Агълар-ханнал увкуссар:
«Шахьуйми ттун чIалай бур,
Алжаннавува бусса,
На миннал цIакьсса дусра».

Шахьуйннал дустал чIявур –
Щала Лакрал билаят.
Цинявннал дуссар ччаву
Инсаншиву думанах.

Жуйн Шахьуйми учайссар,
Багъравун бювкьун буссар.
Бухьхьи жучIан хъамалу,
ХъамакъабитантIиссар.
Щил хъирив хъювхъу тIува?

ДакIнил щаращуягу
Циминналгу ххув кунни:
Тти, бусира, на чунни,
Тти бусира, на чунни.
КIунтIвагу була учин
Миннатирай гьантIисса?

Ттула дакIнил кIарттуву
Циминнангу ччатI шахьав:
Тти, бусира, щил хъирив…
Тти, бусира, щил хъирив,
Щил хъирив хъювхъу тIува,
Ччаврил каши дуруччин?

***
Вин ттул маз къакIулли,
Ттун къабувчIай вилмур.
ДакIничIансса кIулли –
Хъаттирдай чIемуллул.

Бур вияту ттучIан
Леххаву тIий лехлай,
ТтучIатугу вичIан
Умудру бур ххилай.

ЧIемуллул чIавахьулттийх
Ришлашисса хъару
ДакIничIансса ххуллий
Ччаврил ссаламрур.
Вих ялугьлай

Зунттурдал бакIмикIирай
Дарссуну гьарзат най дур,
Вих ялугьлай.

Никирттайх хъатру ришлай,
Дуниял зума тIий дур,
Вих ялугьлай.

ЧIавахьулттал пюрунтру
Экьинай бур, аьтIий бур,
Вих ялугьлай.

Ттул чурх кIялакьавкьунни,
Яру оьттул ччувччунни,
Вих ялугьлай.

Оьрус мазрай
чивчуминнува
Душнин

Ттул ляълужавагьий, аькьлулул кьуллай,
Бургъил тIимуй, ниттил дакъарчIай хъаруй,
Хханссарахха ина магьлува бувксса,
ЧIюлу дуван вила ниттил дуниял.

Арулла рангирайн гъигу дуркIунни,
Арулла рангирайн дакIгу дурккунни.
Ина хъян бивкIукун, хъян дикIай ссавгу
Арулла рангирай вил яруннаву.

Урттул мяра хханссар мюрщисса кару,
КIункIу тIий дур ттучIан цIана ттюнгъану.
Мархри итабакьи, кьянкьану лачIу
Панасса оьрмулул аьршлул чIануцIун.

Хьхьиривух гьузузу мусил чавахъну,
ЧIивисса тахсиргу багъишла бува,
ГьантIиссар вил чIарах бувккун баларду,
Лахьхьи, ттул чIивитIуй, оьшиву дух дан.

Баргъ кунма хъахъисса чIиви Косминай,
Вих мякьну бур вила мюрщи дусталгу.
Цукун къакIулли вин къабучIишиву
Вила дустурая арх хьун хъисвагу.
Таржума Мирза Давыдовлул

***
Ттуйва нава бакъа, хаварбакъулий,
Вил чIавахьулттичIан бивну лякъара,
ЧIавахьулттил чаннайн я бияйхтува,
Тахсикарсса къюкIгу дачай ссинкьа тIий.

Хъамабитайххурав ттул дакIнин цичIав,
Ххирар га, цалчинсса кьини куна, ттун,
Цалчинсса кьинирдай кунма, кьупIа тIун
Бакъарав бувкIссагу чIавахьулттилун?

Ччайвагу бакъана, къакIулли цаннив,
Вил чIавахьулттичIан бивну лякъара.
Я Зал, ттул язима чаннайн уккан а,
ТтуцIунгу кабакьи га хъамаитан.

***
На бикIара хияллай,
КIяла лелуххи хьуну,
ТIивтIу чIавахьулттивух
ВичIан леххан хIадурну.

Заннан нава ххира ххай,
ЦIурттахь кунма, хъяйва-хъяй,
Дуниял, пюрунт кунна,
Парчари къашайссар тIий.

Пасат хьунни хъяхъаву,
ЛирчIунни дяркъу, къюву –
Аммарив ххуймунийнсса
Хьул-умуд къалевщунни.

ВичIан ияйсса инсан
Гьич акъар дунияллий,
Ттул дуаьгу цар дусса –
Заннал яаннав ина!
Таржума ПатIимат Рамазановал