Райондалул цIусса каялувчи КIундив

Лакрал райондалул цIусса каялувчи Зураб Куччаев даврил аьрххилий ивунни КIундиннал шяравун.
Шикку ва най уна хьунаавкьунни шяраваллил бакIчи МахIаммад МахIмудовлущал ва администрациялул зузалтращал. Ххал бивгьунни шяраваллил масъалартту ва вай щаллу бувансса ххуллу-чаранну.
Хъирив Зураб ХIусайнович ивунни КIундиннал школалийн. Ванил директор Абакар Гуйдалаевлущалсса, педагогтурал коллективращалсса ва дуклаки оьрчIащалсса ихтилатрай, райондалул каялувчинал кIул бунни ва шяравусса дуккаврил даву ци даражалий дуссарив, ци диялну дакъассарив.
КIундиннал шяравунсса аьрххилул ахирданий Зураб Куччаевлул увкунни:
– Укунсса аьрххи-ххуллурдал хъуннасса агьамшиву дуссар. Вайннул кумаграйну инсантурая цаява баяйссар, кIул шайссар иш-тагьар ци даражалий, ци хIалданий дуссарив, къулагъас ссах дуван аьркинссарив. КIундиннал шяраваллил жяматрал кIицI лавгсса цинявппагу масъалартту жу хIисавравун ласарду. ДакI дарцIуну учинна, каялувшиндарал ва шяраваллал жяматирттал цачIусса гужрайри жулла шяраваллаву оьрму бигьа-рахIатсса, къулайсса ­буван хьунтIисса.

Кьубав

Райондалул администрациялул бакIчи Зураб Куччаев ивунни Кьубиял шяравунгу.
Шикку ванал дунни батIаву. Ваний гьуртту хьунни райондалул бакIчинащал архIал бивзсса ванал хъиривчувтал, идарарттал вакилтал, Кьубиял шяраваллил администрациялул бакIчи Артур МахIаммадов ва ванал каялувшиндаралу зузими.
Вания махъ Зураб Куччаев ивунни шяравусса социал объектирдайн: ФАП-райн, клубравун, школалийн, цIухху-бусу бунни диял къахъанахъимунил, щаллу дуван багьлагьимунил ялув.

Ниттил кьини – лакрал шяраваллаву

Щалвагу билаятрай кунна, лакрал щархъавугу хьунни ноябрьданул махъра-махъсса алхIаткьини кIицI лагайсса Ниттил кьинилул шадлугъру. Лакрал райондалул ЦСОН-рай хьунни СВО-рай талатиминнал ниттихъащалсса ва хъаннищалсса хьунабакьаву.
Байран барча учин увкIунни райондалул бакIчи Зураб Куччаевгу.
– Ххирасса ниттихъул, хъамий! Байрангу барча тIий, кьамул бувара барчаллагьрайсса дакIнийхтунусса махъру. Зул кьянкьашиву, зул хьул-умуд ва ахир дакъасса ччаву – вайри жулла Ватан дуруччултрансса яла мюхчанмур ва кьянкьамур къинтта. ЧIа тIий ура зун цIакьсса цIуллу-сагъшиву, ссавур ва зулва вирттавращалсса ччясса мутталийсса хьунабакьаву. КIулну бикIира зу зувалу бакъашиву, жугу чIарав бушиву.
Байран барча тIисса ихтилат бунни ЦСОН-рал директор Рамазан Майрановлулгу.
Ахирданий райондалул Культуралул къатлул зузалтрал ккаккан дунни концерт.

* * *
Гъумучиял Центральный библиотекалий, ОьрчIалмур библиотекалущал архIал хIадур дурну, хьунни «Ниттил ччавриллу жува гъили бувсса» тIисса цIанилусса батIаву. Шиккун оьвкуну бия библиотекалул буккултрайн, чIаххув-чIарах ялапар хъанахъисса хъаннийн.
Ниттихасса лакку мазрайсса назмурдайну шадлугъ дайдирхьуна ПатIимат ЛухIуевал. Ниттихъул барча буллалисса ихтилатру бувна ОьрчIал библиотекалул хъунмур Зарема Исяевал, мизитрал вакил Идрис Дибировлул. Библиотекалул ччяния шинмайсса букку Абризат Оьмаровал дурккунни оьруснал шаэр Сергей Есениннул ниттиха чирчусса назму.

* * *
Ххюлуссуннал шяраваллил библиотекалий хьунни «Быть матерью большая честь…» тIисса цIанилусса шадлугъ. Шиккун оьвкуну бия чIярусса шиннардий Ххюлуссуннал школалий муаьллимну зий бивкIсса Написат Михадовнайнгу, ванил дарсру дирхьусса, тти ниттихъул, амухъул хьусса хъаннийнгу. Вайннал цалва учительницая учинсса хъин-хъинсса махъругу чан бакъая. Написат Исмяиловнал цилагу пасихIну ва дюхханну дурккуна ниттихасса назму.

* * *

ШавкIрав Аьрасатнал Халкьуннал аслийсса культуралул центр ва библиотека цачIуну дунни Ниттил кьинилун хасъсса шадлугъ. Ва дачин дурну ия Гъумуксса ЦТКНР-лул директор Нажвадин Халилов. Ваналгу, ШавкIуллал шяраваллил бакIчи Закир Асабовлулгу, библиотекалул хъунмур Фрунзина Кьадиевалгу, цайминналгу ва кьини лахълахъисса дакIнийхтунусса махъругу бия ниттихъан хас бувсса. Ва кьини барчаллагьрайсса ляличIисса махъру тIий бия ХIурия Зугуновахь, цил арс, Ватандалул мурадру буручлай, СВО-рай талатисса.
Ихтилатирттая махъ ЦТКНР-лул зузалтрал ккаккан дунни концерт.

* * *
Ниттил кьинилун хасну ЧIарттал шяраваллил библиотекалий хьунни «Все я делаю для мамы» тIисса цIанилусса мастер-класс. Ванил дайдихьулий оьрчIру кIул хьунни байрандалул тарихращал, яла библиотекалул хъунмур Диана ХIажиевал дурккунни оьруснал ва совет чичултрал ниттихъан хасну чирчусса назмурду. ОьрчIал бувсунни ниттихъацIун бавхIусса учалардугу, цанна вайннул мяъна дурчIлачIисса куцгу. Дианал бувна ниттихъансса открыткартту даврил «Единственной маме на свете» тIисса цIанилусса мастер-класс.

Бадрижамал Аьлиева