Ниттихъал байрандалул гьантрай Дагъусттаннал Росгвардиялул управлениялул подразделениялул зузалт ва МахIачкъалаллал соединениялул аьралийтал бивунни къуллугърал ва аьралуннал бурж бартбигьлай жанну дуллусса аьралий дустурал ниттихъачIан.
«Горец» ОМОН-далул зузалт бувкIунни 2016-ку шинал Табасараннал райондалий къуллугърал бурж биттур буллай жан дуллусса полициялул сержант, Къучагъшиврул ордендалул заллу ХуламахIаммад Кьурбановлул ниттичIан. Зайнаб ТIагьировал бувсунни хъамаллурахь арсная, хасъсса подразделениялуву къуллугъ буллансса ванал хиялдания. Росгвардиялул зузалтрал дуллунни ниттин бахшишру, барчаллагь увкунни ххаллилсса арс тарбия аврихлу.
«Ястреб-Каспий» СОБР-ал хIаписартал Дагъусттаннал Халкьуннал Мажлисрал депутат Имран Аваевлущал бувкIунни полициялул хъунама лейтенант, Къучагъшиврул ордендалул заллу Жавраил Кьурбановлул ниттичIан. Жавраиллул жан дуллуну дур хасъсса аьралий операциялий.
– Ина тарбия увну ур хIакьсса патриот. Му жяматран абадлий дакIний икIантIиссар. Аьркинний жу мудангу вил чIарав буссару,- увкунни СОБР-ал командирнал хъиривчу, полициялул подполковник Аьбдулвагьаб Имаковлул.
Вай мукунма бивунни кьюкьлувасса, личIи-личIисса шиннардий жанну дуллусса аьралийтурал ниттихъачIан. Циняв ниттихъан дуллунни тIутIив ва арцуйнусса бахшишру.
Росгвардиялул кIанттул управлениялул вневедомственный къаралданул зузалт бувкIунни милицанал майор Даитбек Вазирхановлул, полициялул лейтенант Рустам Салиевлул, хъуними сержантътал ХIусайн Маккашариповлул ва Оьмар Исрапиловлул нинухъру барча бан. Вайннал кIицI лавгунни даврил уртакьтурал гъан-маччанаха аякьа давугу цала къуллугърал бурж бушиву.
«Ягуар» тIисса транспортрал ОМОН-далул аьралийтал бивунни хасъсса аьралий операциялий жан дуллусса полициялул лейтенант, Къучагъшиврул ордендалул заллу ХIасан Гаргацевлул ниттичIан.
Вара ведомствалул МахIачкъалаллал соединениялул зузалтрал барча бунни аьралий бурж бартбигьлай жанну дуллусса аьралийтурал нинухъру. Дуллунни миннан тIутIив ва арцуйнусса бахшишру.
Ниттихъал барчаллагь увкунни Росгвардиялул зузалтрахь цала арсру хъамакъабитлай тIий ва цахрасса къулагъас чан къадуллай тIий.
Андриана Аьбдуллаева
