Ноябрьданул 27-нний парламентрал спикер Заур Аскандаровлул председательшиврий хьунни Дагъусттаннал Халкьуннал Мажлисрал 7-мур созыврал 49-мур сессия.
Ваний гьуртту хьунни ДР-лул ХIукуматрал председатель Аьбдулмуслим Аьбдулмуслимов, Госдумалул депутат Мурад ХIажиев, ДР-лул ХIукуматрал члентал, федерал властьрал органнал идарарттал каялувчитал ва цаймигу.
Сессиялий махъру лавхъунни партиярттал фракциярттал вакилтурал.
КПРФ-лул чулухасса депутат МахIаммад МахIаммадовлул бувсунни республикалийсса социал-экономикалул тагьарданул хIакъираву. Дагъусттаннайсса инвестициярттал каширдал хIакъираву ихтилат бунни «Справедливая Россия» партиялул депутат Шамил Оьмаровлул. «Единая Россия» партиялул вакил ХIасан ХIусмановлул бувсунни Дагъусттаннал социал политикалул хIакъираву.
Халкьуннал Мажлисрал мандатирттал ва депутатшиврул этикалул масъаларттал комиссиялул председатель Илияс Мамаевлул бувсунни Халкьуннал Мажлисрал депутатну Аьдил Салаватов увчIаврил хIакъираву. Ва увххун ур ДР-лул Халкьуннал Мажлисрал Дуккаврил ва элмулул комитетравун
Яла депутатътурал чIурду буллунни дакьаврил судиятал къуллугъирттай битаврихлу.
Депутатътурал цалчин дуккаврийну кьамул дурунни «О республиканском бюджете Республики Дагестан на 2026 год и на плановый период 2027 и 2028 годов» тIисса закондалул проект.
Депутатътурал вичIи дирхьунни ДР-лул финансирттал министрнал кIанайма Шамил Дабишевлул, Счетная палаталул председатель Билал Жахбаровлул ва Халкьуннал Мажлисрал Профил комитетрал председатель Марат Илиясовлул ихтилатирттах. Вайннал гьартану бувсунни республикалул бюджетрал доходирттал ва харжлугъирттал ккаккиярттая.
Парламентрал спикернал Бюджетрал ва налогирттал комитетрайн ва цаймигу комитетирттайн ва исполнительный властьрал органнайн тапшур бунни бюджетрал проектраха ттинияр тихунмайгу зун. Ялун дуркIсса щаллу бавурттугу хIисаврайн ларсун, проект хIадур дуван кIилчинмур дуккаврийн.
Закондалул проект кьамул дунни цалчин дуккаврийну.
Депутатътурал кIилчин дуккаврийну кьамул дунни Дагъусттаннай эксперимент хIисаврай хъамаллурансса къатри даврил хIакъиравусса ва муницIунсса цаймигу масъаларттал закондалул проект.
Цалчин дуккаврийну кьамул дунни «О дополнительных мерах социальной поддержки участников Специальной военной операции и членов их семей» тIисса закондалул проектраву дахханашивуртту даву. Утти дуруччинтIий бур СВО-лул гьурттучитурал цалашиврий бивхьусса оьрчIал ихтиярду.
Депутатътурал чIурду буллунни «О Прогнозном плане (программе) приватизации государственного имущества Республики Дагестан на 2025 год» тIисса Дагъусттан Республикалул Халкьуннал Мажлисрал хIукмулуву дахханашивуртту даврихлу.
ДР-лул Халкьуннал Мажлисрал Дуккаврил ва элмулул комитетрал председатель Елена Павлюченкол дурккунни «Об организации трудового воспитания и обучения детей и молодежи в Республике Дагестан» тIисса закондалул проект. Ва кьамул дунни цалчин дуккаврийну.
Депутатътурал, ххалгу диргьуну, кьамул дунни цаппара цаймигу законнал проектру.
Халкьуннал Мажлисрал сессиялий депутатътурал цинявппагу 25 масъала ххал бивгьунни.
