ЦIуссалакрал райондалул оьрчIал багъирдаву хьунни Ниттихъал кьинилун хас дурсса шадлугърал мероприятияртту.
ОьрчIахь бувсунни байрандалул тарихрая. Вайнналгу бувккунни ниттихъан хас бувсса шеърирду, увкунни балайрду, ккаккан дунни къавтIавуртту. Мукунма хьунни творчествалул мастер-классру, личIи-личIисса тIуркIурду. Мероприятиярттал мурад бия оьрчIру ниттихъаха аякьа ва хIурмат буллай вардиш баву.
Ниттихъал байрандалун хас дурсса мероприятияртту мукунна хьунни райондалул школардайгу. Вай гьуртту хьунни «Ци лахьхьин бувссар ниттил ттун» тIисса щалагу Аьрасатнал акциялуву. Байрандалун хасну «Цалчинми» тIисса суккушиннарал дуллалисса ва акциялул лагрулий оьрчIал ккаккан бунни, бувсунни ниттихъал цанма лахьхьин бувмур.
Райондалул школарду мукунма гьуртту хьунни «Ниттинсса кIюрххилсса» тIисса акциялуву. Ванил лагрулий оьрчIал ва кулпатравуминнал дунни ниттихъан кIюрххилсса. Ва акциялийну оьрчIахьхьун сант диривунни ниттихъахсса ччаву иширайну ккаккан дансса.
Вай дакъассагу, райондалул школардай хьунни «Классные встречи» – хасъсса аьралий операциялул гьурттучитурал ниттихъащалсса хьунабакьавуртту. Вайннул мурад бия хасъсса аьралий операциялий Ватан дуручлай жанну дуллусса ва цIанасса чIумал Ватандалул мурадру буручлачисса къучагътурал ниттихъал хIурмат баву, миннахь ххаллилсса арсру тарбия баврихлу барчаллагь учаву. Ниттихъалгу бувсуна цала арсурваврая, дакIнин бивчуна миннацIун бавхIусса лахIзарду. Хьунабакьаву хъинну асар хьунсса хьунни. Цинявннал чIа увкунни жула аьралийтуран ххувшаву, цIуллуну, сагъну зана шаву.
Школардай классрал ссятурдий оьрчIал ккаккан бунни ниттихъал байрандалийнсса открыткарттал мастер-классру. Вай ссятирдал оьрчIаву ниттихъахсса ччаву ва хIурмат тарбия баву бакъассагу, миннавусса творчествалул гьунардугу ялун личин бунни.
ОьрчIал багъирдаву ва школардай мукунна хьунни «СВО-лул гьурттучитурал ниттихъащал чяй хIачIаву» тIисса, «Вкус заботы» тIисса нацIу пирогру баврил мастер-классру ккаккан буллалисса акциярду. Мукунна райондалий хьунни «Мамы, они как пуговки, на них все держится» тIисса онлайн-флешмоб. Ванил лагрулий райондалул жяматрал дирхьунни цала аватаркардай ягу социал сетирдавусса ва мессенджердавусса статусирттай ниттихъащалсса суратру, чивчунни нинухъру дакIнихтуну барча буллалисса ва миннахь барчаллагь тIисса бюххансса махъру. Флешмобрай гьуртту хьунни райондалул администрациялул зузалтгу.
Андриана Аьбдуллаева
