Итникьини, декабрь зурул 1-нний, хьунни ЦIуссалакрал ветроэлектростанция зий байбишаврин хас дурсса хьунабакьаву. Мероприятиялул спикертал бия Дагъусттаннал ХIукуматрал председательнал цалчинма заместитель Манвел Мажонц ва «Росатом Возобновляемая энергия» АО-лул генеральный директор Григорий Назаров. Ва кьинилия байбивхьуну ЦIуссалакрал райондалул ветроэлектростанциялул буллантIиссар электроэнергия Аьрасатнал цасса сетьрайн. Ва Дагъусттаннал энергетикалул тарихраву хъуннасса агьамшиву дусса ишри.

ЦIуссалакрал райондалийсса «Росатомрал» цIусса мурчай электростанция билаятрайсса хъунисса проектирдавасса ца хъанай бур. Шикку зузи дурссар 150 МВт ливчусса гуж бусса 61 ветроустановка. ЦIусса шиналгу зузи дантIиссар 59. Циняв установкартту зузи дурну махъ миннул гуж 300 МВт бивсса бикIантIиссар. Мунийну 240 азарунния лирчусса хозяйствартту электроэнергиялул дузал дан бюхъантIий бур. Ветроэлектростанция хьун тIий бур Аьрасатнаву яла хъунмамур.
– Инвестициялул проект хIисаврай гъалгъа тIурча, ва хъанахъиссар Дагъусттаннал тарихраву яла хъунмур инвестициялул проект. Энергетикалул объект хIисаврай гъалгъа тIурча – щалагу Аьрасатнавусса хъунмасса ветропарк. Дагъусттан бур энергия биял къахъанахъисса регион.ЦIусса ветропарк зузи баврийну энергиялул гуж 15% ххишала хьунтIиссар (шинай 800 азарунния лирчусса киловатт ссятрай). Проект дузрайн дуккан дансса инвестициярду ацIвахъул миллиардрайн дирсса дур.
Ветропаркрал энергиялийну дузал хъанантIиссар МахIачкъала шагьрулул ухссавнил чул, мукунма ЦIуссалакрал ва Къумтуркъалаллал районну. Жяматрал ишла буллантIиссар марцIсса энергия, – бувсунни Манвел Мажонцлул.
– КIицI лаган ччива, вай давуртту чIирисса чIумул дянив дуршиву. Дахьра ца шинал хьхьичI цалчинсса ветроустановкалул гьану бивзссия. ХIакьину мукун хъунисса ацIвахъул башнярду бацIан бувну бур, гьарица – 50 зивулийсса къатрал лахъшиврийсса ва 320 тонналия лирчусса кIушиву дусса. Ва хъинну захIматсса давур. Инженертурал, строительтурал ва проектировщиктурал му лавайсса ларажалий дунни. Барчаллагь тIий ура «Росатом Возобновляемая энергия» компаниялухь ва генеральный директор Григорий Назаровлухь Дагъусттаннан хъуннасса ­агьамшиву дусса проект щаллу даврихлу. ­Ванийну Дагъусттаннал социал-экономикалул даражагу гьаз хьунтIиссар. ЦIуссалакрал ВЭС – ва так ца энергетикалул объект бакъар. Ванил чIалачIи буллай бур инвестортурал цала хъунисса сиптарду бартдигьин Дагъусттан язи бугьлай бушиву. Жула республика анаварсса бущилий хьхьичIуннай най дур. Дагъусттаннай хIакьину лябукку буну дур туризм, промышленность, шяраваллил хозяйство. Буллай бур миннуцIун бавхIусса цIу-цIусса объектру. Миннун аьркин багьлай бур ххишаласса гужру, электричестволулссагу. ЦIуссалакрал ВЭС кунмасса объектирдая кумаг хъанай бур региондалул энергопотенциал ххишала бан, – увкунни республикалул бакIчинал.
ДакIнин бутан, 2024-ку шинал ноябрь зурул 27-нний шадлугърал даражалий бувтIуссия ЦIуссалакрал мурчай электростанциялул гьану.