Итникьини Лакрал райондалул магьирлугърал къатлуву ацIансса кIану бакъая. АцIния мяйра шинай лажин кIялану райондалий каялувшиву дуллай ивкIсса Юсуп МахIаммадовлухьгу барчаллагь учин, цIуну увчIусса бакIчи Зураб Куччаевлун, ва къуллугърай цIакь уллай, тIайлабацIу чIа учин бувкIун бия ватанлувтал, Дагъусттанная бакъасса, Аьрасатнал шагьрурдаяссагу.
Шадлугъ тIитIлай, райондалул хъунама Явсупи ХIамзаевлул бувккуна Зураб Куччаев райондалул бакIчину увчIавриясса хIукму.
Муния махъ, илданул хьхьичIун увккун, Зураб Куччаевлул бувна цала цалчинсса хъинну бюххансса ихтилат:
«ХIурмат бусса лакрал жямат! ХIакьину ттул оьрмулуву дур хъинну агьамссагу, жаваблувссагу кьини – ттун багьну бур Лакрал райондалул тарихрал луттирай тIитIин цIусса чIапIи. Зу ттул хъачIрай хъачI дирхьуну къабачирча, ттул дакIнийсса мурадру личIантIиссар чулийн къабувккунма. Цайми районнаха къалавхьхьуну, шиккун халкь яхьун бучIан хьурдай тIунсса даражалийн дуцин бюхъан хьунтIий дур жущара район, агарда цинявппа цачIун хьурча. ЧIаланну хьхьичIуннай хьуссар район Юсуп ХIамидовичлул бюхъу бусса канилу, ванал даврил опыт ва аькьилсса маслихIатру жунма гихунмайгу бучIи лякъинтIиссар».
Бувсунни дакIний ушиву гьарца шинал август зуруй шинал лажиндарай цала дурсса даврил хIасиллащал агьалинал хьхьичIун уккаван».
Хъирив хIурматрай агьалинал хьхьичIун увккуна Юсуп МахIаммадов. ЦIуну увчIусса бакIчинал, ванал хъачIунттай «Лакрал райондалул бусравсса гражданин» тIисса аьтIласрал ятIул лентагу бавхIуну, ларчIуна хьуву му цIа тасттикь дуллалисса лишан.
Муния махъ Юсуп МахIаммадовлул бувуна, ацIния мяйра шинал манзилданий цала чIарав бивкIминнахь барчаллагьгу тIий, Зураб Куччаевлун тIайлабацIу чIа тIисса ихтилат:
«Ттун Зураб Куччаев кIулли ччянияцIава, кIулли ванал бюхъу ва потенциал. Кьуния кIира шин хьуну дур на ва райондалий зий, цIубутIуй – шяраваллил хозяйствалул управлениялий, яла – шяраваллил хозяйствалия дучIаймунил ялув авцIусса инспекциялул каялувчину. АцIния мяйра шинал мутталий – райондалул бакIчину. Жу даврил уртакьтуращал ва гьалмахтуращал хIарачат буллай бивкIру агьалий ца пикрилий цачIунмай бан – социал экономика хьхьичIуннай даврил ххуллий зун. Бигьасса бакъая на зий айивхьусса цалчинсса барзру, амма район хьхьичIуннай даврил ххуллий ттула бакIрайн лавсъсса мурадирттая махъаллил хьунсса пикригу бакIравун къабувххуна.
На, махъ нанисса, иш бавчусса ватанлувтуращал хьунаакьлай, гайннащал ттула пикри-мурадру кIибачIлай айивхьувкун, ттул чIарав бацIанми чан къавхьуна. На дакIнихтуну барчаллагьрай ура Сиражуттин Илиясовлуйн, аьпа баннав цал, Аьбдурашид МахIаммадовлуйн, Зарема Буттаевайн, Артур Исрапиловлуйн, Марат Илиясовлуйн, Сапар Аьбдуллаевлуйн, Рапи Абакаровлуйн, Аслан ва ХIасан Аьлиевхъайн, ттул даврил хъуннасса хъар цайнна ларсун най ивкIсса ттула ччянияцIавасса гьалмахчу Абубакар Къюннуевлуйн ва чIявусса цайминнайн. Хьунаакьлай айивхьура шяраваллал агьалинащал, захIматкашнащал, гайннал пикрирдахгу вичIи дирхьуну, ттулами пикри-мурадирттаягу буслай. Ми хьунабакьавурттал хIасиллайн бувну, лахъисса чIумул мутталийсса социал-экономика хьхьичIуннай даврил план ххал диргьуну, мунил гьанулий байбивхьуру зий. Хъунмур къулагъасралун лавсун буссия социал сфералул мурадру. Шинава байбивхьуру ххуллурду бакьин буллай, шяраваллал ва Гъумучиял чIалачIин цин лархьхьусса даражалийн дуцлай. На барчаллагьрай ура шяраваллал агьалинайн, субботникру дуллай, санитар тагьар цил кIанттайн дурцусса.
Хъунмасса барчаллагь учин ччай ура культуралул министр Зарема Ажуевнахь, ванил кабакьаврицIух бювхъунни цаппарасса щархъаву Магьирлугърал къатри цIу буккан бан. Муданмасса кумаг асар шайва Экономикалул министерствалул чулухагу, барчаллагь ХIажи Руслановичлуйн. Райондалул буруккинттал чIарав даин уссия Халкьуннал Мажлисрал депутат Марат Илиясов. Дазу-зума дакъасса барчаллагь зуйн цинявннайн.
Хаснува хъунмасса барчаллагь Лакрал райондалул агьалинайн, на Лакку билаятрал къюкIливу – ттунма аьзизсса Гъумук ххарину кьамул аврихлу. Ва аьрщигу, ва аьрщарай ялапар хъанахъимигу ттул гьанугур, ттул пахругур. Пахрулий ура район хьхьичIуннай даврил ххуллий зий, занай бивкIсса инсантурал кьюкьлуву чIярусса шиннардил манзилданий бивхьусса ттула захIматрал бутIагу бушиврия. ДакI дарцIуну ура жагьилсса, гьавас буну зий айивхьусса Зураб Куччаевлул каялувшиндаралу Лакрал район цIу-цIусса ккаккиярттайн лахъанссар тIий», – увкунни Юсуп МахIаммадовлул.
Муния махъ ккаккан дурунни 2007 шинал Юсуп МахIаммадов бакIчину авцIуния шиннай, ацIния мяйра шинал манзилданий, дурсса давурттая ва хьхьичIуннайшивурттая бусласисса сурат.
Муния махъ ДР-лул ХIукуматрал чулухасса Лакрал райондалул куратор, культуралул министр Зарема Буттаевал, барчагу бувну райондалул агьали, Юсуп МахIаммадовлухьхьун ва Зураб Куччаевлухьхьун буллунни социал-экономикалул ккаккиярттахлу лахъсса зунттал районнал дянив кIилчинмур кIану бувгьушиврул диплом.
«Райондалул бакIчишиву дан му хъинну жапасса, чIявусса буруккинтту хьхьичI бавцIусса мурадри. Микку багьлагьиссар, райондалий саргъунсса тагьаргу ядурну, инфраструктура хьхьичIуннай даврил ххуллийсса федерал ва республикалул программарттаву, проектирдаву гьуртту хьуну, цума-цагу инсаннал дакIниймур лаласун. Ва диплом тапшур бан ччай бур Зураб ХIусайновичлуйнгу, Юсуп ХIамидовичлуйнгу, хьуннав тIий цув никирттал дянивсса дахIаврил лишанну, хьхьичIуннайшивурттал ва ххувшавурттал эстафеталул лишанну», – увкунни министрнал.
КIицI лавгунни Юсуп МахIаммадов каялувшиву дуллалиссаксса мутталий район хьхьичIуннай хьуну душиву гьарцагу аралуву. ЧIалансса цIушиннарду ва дахханашиннарду хьушиву культуралул аралувугу – дакьин дурну дур райондалул магьирлугърал къатри, ацIра шяраваллил магьирлугърал къатлуву цIу бувну бур материал-техническая база, «Единая Россия» партиялул щурущи бувсса «Культура малой родины» тIисса проектрал лагрулий гьануцIакул бакьин бувну бур Совет Союзрал Виричу Муса Маннаровлул цIанийсса Гъумучиял тарихрал ва краеведениялул музей, музыкалул инструментирттал лащу-щаллу бувну бушиву Гъумучиял оьрчIал магьирлугърал школа.
Гъумучиял школалул директор Соня Макьаевал педагогтурал цIания Юсуп МахIаммадовлухь, дуккаву дулаврих дуллай ивкIсса къулагъасрахлу барчаллагьгу куну, кIицI лавгунни ва бакIчину зун увкIсса чIумал райондалий 85 процент школардал бивкIшиву лекьавайсса тагьарданий, бярай пачру лахълай. Гьарца шинал федерал ва республикалул программарттаву гьуртту шаврийну хIакьинунийн райондалий капитал ремонтругу дурну, оьрчIан дуккавринсса къулайсса шартIругу дузал дурну, материал-техническая базалулгу лащу-щаллу бувну бушиву цинявппагу школарду.
Юсуп МахIаммадов бакIчишиву дуллалисса щала манзилданий ванал урчIакану ивкIсса, хIакьинугу райондалул цIусса бакIчинал цалчинма хъиривчуну зузисса Абубакар Къюннуевлул, Зураб Куччаевлун тIайлабацIу чIа тIий, кIицI лавгунни идарарттал каялувчитал, шяраваллал бакIчитал райондалул администрациялул команда, цIусса бакIчинал чаннасса умудру чулийн буккан бан канил ка дургьуну бачин хIадурну бушиву. Барчаллагь увкунни Юсуп МахIаммадовлухь район хьхьичIуннай даврил ххуллий лавсун най ивкIсса шаттирдахлу ва аькьилсса пикрирдахлу.
Юсуп МахIаммадовлухь барчаллагь тIутIисса ва Зураб Куччаевлун тIайлабацIу чIа тIисса ихтилатру бунни ДР-лул Жяматийсса палаталул хъунаманал хъиривчу Ссапарбаг Аьбдуллаевлул, Халкьуннал Мажлисрал Законодательствалул комитетрал хъунама Артур Исрапиловлул, жяматийсса ишккакку Шалласу Шалласуевлул, СВО-лул Аьрасатнал цалчинсса Виричу НурмахIаммад ХIажимахIаммадовлул ниттил, Сапижат Мазаевал, чIаххувсса районнал каялувчитурал. Ихтилатру буллалими циняв ятIулсса ххуттай кIицI лаглай бия Юсуп МахIаммадовлуща, лажин кIялану цала къуллугърал буржгу биттур бувну, илданучIа хъунмасса хIурмат ва бусравшиву хIалал дан бювхъушиву.
Лакрал райондалул чулухасса ДР-лул Халкьуннал Мажлисрал депутат депутат Марат Илиясовлул Халкьуннал Мажлисрал хъунама Заур Аскендеровлул чулухасса Барчаллагьрал чагъар буллунни М. Илиясовал цIанийсса «Дараччи» клубрал хъунмур Гульшан Хасаевахьхьун, лакку маз ябаврил ва магьирлугъ хьхьичIуннай даврил ххуллий бихьлахьисса захIматрахлу.
Гульшан Хасаевал «Дараччи» клубрал цIания барчаллагь увкунни
Юсуп МахIаммадовлухь лакрал миллатрал магьирлугъ ва маз ябаврил ххуллийсса иширттаву дуллай ивкIсса чялишсса гьурттушиндарахлу. Шиккува барчаллагь увкунни щала Лакрал райондалул хъамал ххирашиврул лишанну хьусса Юсуп МахIаммадовлул ужагърай цIу-ччатI бихьлай бивкIсса ванал кулпатрахь ПатIиматлухь.
Муния махъ Гъумучиял магьирлугърал къатлул зузалтрал ва ОьрчIал магьирлугърал школалул тарбиялувтурал ккаккан дурунни ххаллилсса концерт.
Зулайхат Тахакьаева
