ТIайланнасса линиялийн бувкIунни сайки 2 азарва суал, чIявуми бия МахIачкъала, Каспийск, Дарбант шагьрурдаясса, Ахттиял ва ЦIунтIиял районнаясса.
Дагъусттанлувтурал чIявуми буруккинтту бур ЖКХ-лул масъаларттал, аьрщарал ва хъус-хъиншиврул арардал, ххуллурдал, СВО-лул гьурттучитуран ка-кумаг баврил, ичIаллил шартIру ххуй даврил ва цIуллушиву дуруччаврил хIакъиравусса.
Биттуршиндарал властьрал органнал каялувчитал видеоконференцсвязьрал низамрай хIадурну бия жавабру дулун региондалул каялувчинал цачIанма тIайла бувкми суаллахьхьун.
Гьашину Сергей Меликовлул тIайланнасса линия хьунни Боевой славалул музейраву. Миккусса конференц-зал дузал бувну бур гьарца аьркинлугърал. Залданувун бавтIун бия жяматийсса ишккаккулт, экспертътал, СВО-лул гьурттучитал ва миннал кулпатирттал члентал.
БакIрай Сергей Меликовлул дурунни Ватан дуруччул шинал хIасиллу, бувсунни лаглагимур шинал хьхьичIуннайшивурттая.
«Ва дия сивсуну хьхьичIунмай шаврил шин, жула циняв хIарачатру цачIун баврил шин, гьашину жунма уттигу цал бувчIунни жува гъагъан буван къашайшиву, жува цачIу бушиву, жула традициярттайн дакIру тIайлану бушиву, жула билаятрал бакIрачIан бувкIсса хъунисса иширттайн дакIру тIайлану бушиву», – увкунни республикалул бакIчинал.
ДакIнин бутанну, Буттал кIанттул цIанийсса Хъунмасса дяъвилий ларсъсса Ххувшаврин 80 шин шаврил шадлугъирттан ва Ватан дуруччул шинан хас дурсса мероприятиярттал пландалийн ларсун дур 127 мероприятие. Миннувасса чIяруми бартдиргьуну дур, лирчIмигу дантIий бур шинал ахирданийнин. Щала Дагъусттаннай хьуссар личIи-личIисса хъунисса мероприятияртту: акциярду, выставкарду, конференцияртту, спортрал тIуркIурду, концертру. Хъун дяъвилул ва СВО-лул гьурттучитурал савлугъиндаран тIиртIуссар гьайкаллу ва мемориалданул ултти. ЦIу буккан бувну махъ цIунилгу зун бивкIссар Боевой славалул музей, буккан бувссар виртталсса дагъусттанлувтуран хас бувсса луттирду.
Ватан дуруччул шинал сайки 7 азара аьраличунал кулпатирттал члентуран дурну дур 282,9 азарунниха лирчусса социал хIаллихшинну.
ЛичIиссара къулагъас дурну дур СВО-лул гьурттучитурал кулпатирттах.
Гьарта-гьарзану дурссар акция «БивкIу бакъасса полк» ва цаймигу дакIний личIансса мероприятияртту: автопробегру, концертру, гьайкаллу ва Славалул аллеяртту тIитIавуртту.
Къулагъас дурссар мукунна жагьилтуращалсса давурттахгу: дурну дур 100-нниха лирчусса хъунисса мероприятияртту, миннувух гьуртту хьуну бур 400 азарунния ливчусса инсантал.
Сергей Меликовлул бувсунни дузал бувну бушиву ихIсандалун кумагрансса информациялул портал.
Оьруснал географиялул обществалул Дагъусттаннал отделениялул Экспертрал советрал член Залина Шариповал бувсунни СВО-лийсса дагъусттанлувтуравату цалчин Виричу хьусса НурмахIаммад ХIажимахIаммадовлул савлугъран Самурдул даралувусса зунттал ссиртлил цания ца лахъшиврун ганал цIа дизансса сипталия.
«Мунихун дахчинсса цукунчIавсса захIматшиву чIалай дакъар», – увкунни Сергей Меликовлул ва бувсунни му масъала ласун аьркиншиву РГО-лул региондалул отделениялул хъиривмур заседаниялийн.
Республикалул бакIчинал цаппара тапшурлугъру дунни властьрал органнал каялувчитурайн. Хъуншагьрулул бакIчинайн тапшур бунни Лаптиевлул кучалийсса ца хIаятрал территория дузал даврил ялув ацIан. Мукуннасса тапшурлугъру дурну дур муниципалитетирттал каялувчитурайнгу.
Сергей Меликовлул бувсунни Дагъусттаннай цукун дузал буллай буссарив ЖКХ-лул масъалартту.
ВичIи дирхьунни дагъусттанлувтурал къатри газрацIун дазин захIмат хъанай бушиврул масъаларттах, минначIа ихтиярдал документру хIадурну бунува. Тапшур бунни ми иширттал хъирив лаян ва захIматшивуртту духлаган дуван.
Ххал бивгьунни муниципал ххуллурдал масъалагу. Хаснува Ххунзахъиял райондалийсса Мочох-Очло ххуллу бакьин баврил масъала. Цамургу масъала бия ТюбелучIансса дуламанттучIа муххал ххуллу лахъайсса кIанай машинарттал чIутI хъанай бушиврул хIакъиравусса. Сергей Меликовлул бусаврийну, Герзель-Аул шяравату Ярагъ-Къазмалярдайн бияннинсса щала ххуллу бувантIий бур мукьва ща бусса. МахIачкъалалив Березка пляжрал райондалий буллай бур портрачIансса ххуллу. Ва ххуллу цинявннанссар, ва зун бикIайхту, цайми ххуллурдайх машинартту заназаву чан хьунтIий дур.
Сергей Меликовлул тапшур бунни Къарабудахкантуллал райондалиясса инвалиднан кумаг буван коляска ласун. МахIачкъалаллал къирагърайн заназисса жяматийсса транспорт гьарза дуван. Сарыкум бархандалучIасса вокзал цIу буккан буван. Дунни цаймигу тапшурлугъру.
ТIайланнасса линия къуртал хъанахъисса чIумал, Сергей Меликовлуйн лаивзунни ца оьрчI, ванал мурад бия ЦIусса шинацIунсса шадлугъ яргсса, дакIний личIансса даву. Сергей Меликовлул бакIрайн лавсунни оьрчIал мурад бартбигьин: «ОьрчIру хIакьну тIий бур. ЦIусса шинал байран дикIан аьркинссар ххари-хъиншиврул видурцIусса. Ттул умуд бур ва ттул лаизаву цинявннан баяншиврийн: бачира оьрчIан дуван байран! ОьрчIан пишкаш дуванну марцIсса, чаннасса, хIазсса ва мюхчансса ЦIусса шин! Кабакьинну ва оьрчIал тавакъюрацIун ва, захIматшивурттахгу къабурувгун, ЦIусса шинал дайдихьу хьун дуванну ххуйсса, ххарисса ва тирххандарансса!».
Сергей Меликовлущалсса тIайланнасса линия лахъи ларгунни шанна ссятрай. Региондалул бакIчинал гьарза-гьартасса жавабру дуллунни сайки 40 суалданухьхьун. Миккура ванал чIявусса масъаларттал хIакъиравусса тапшурлугъругу дурунни властьрал органнал каялувчитурайн.
Эфирданул чIумал кIицI къабувну ливчIсса масъалартту чара бакъа ххал бигьинтIиссар ва миннухьхьун дулунтIиссар жавабру.
