Гъилишиву дагьну, гъараллу чан хьувкун, хъуншагьрулул кIичIирттаву аьдатрайн бувну дайдишай асфальт бакьлакьисса, ххуллурдай хьусса хъунтIри дуцIин дуллалисса давурттив. ЦIана шагьрулул ххуллурдайн бутIайсса асфальтрал хъунмур бутIа Красноармейскалийсса асфальтрал ва бетондалул заводрай бувайссар.
2015 шинал зузи бувсса ва заводрал цукссагу бигьа дурну дур коммунал къуллугърал ххуллурду бакьин баврил даву. Цанчирча муданма хIадурсса асфальт жучIава бушиву му –хъунмасса ишри.
Заводрал проектгу дурну, му батIин жучIанма бувкIун бивкIссар Украиннавасса компаниялул АО «Кременчугский завод дорожных машин «Кредмаш» -рал пишакартал.
Ва завод бусса бур уттизаманнул оборудование дусса, цуппагу ва аралуву ца яла тIалавсса, чIявучин машан ласайсса. Ссятрай 60 тонна асфальтрал итадакьайсса дур. Вайннал бувсса асфальт цуппагу хIисав байсса бур уттизаманнул тIалавшиннарду дурурччусса, ххуйсса асфальтран. Шикку инсаннал гьурттушинна аьркин къашайсса дусса дур, гьарзат автоматизированныйсса дуну. Заводрал агьамма муштари МахIачкъалаллал ЖКХ-лул Управление бусса бур. Заводрая цукунчIавсса зарал бакъасса бур тIабиаьтрангу. Дирхьуну дусса дур ххит гьаз хьун къабитансса щинал фильтр. Цуппагу зий бусса бур тIабиаьтрал газрай.
Шикку цIана зий усса ур оборудованиялул ялув авцIусса оператор, автокарданул машинист ,битумрал станциялул мастер ва къаралданийсса электрик.
