МахIачкъалалив, «Гама» тIисса патирдануву, Дагъусттаннал бакIчи Сергей Меликовлул Ниттихъал кьинилущал барча бунни циняв ниттихъул. Ва байрандалий гьуртту хьунни исламрал бизнесрал Дунияллул халкьуннал дянивсса ассамблеялул президент Марат Кабаев, Дагъусттаннал муфтий АхIмад-хIажи Аьбдуллаев, министртал, депутатътал, СВО-лул Аьрасатнал Вирттаврал ниттихъул ва щахъами, мукунма чIявусса оьрчIру тарбия буллалисса ниттихъул.
Сергей Меликовлул кIицI лавгунни СВО-лийсса жула Ватандалул чиваркIуннал гьарцагу гьунарданул чIара нитти-буттахъал тарбия дуршиву.
«ДагъусттанлувтурачIа гьар чIумал ниттил хIурмат лахъну бивкIссар, ниттил мукъул, маслихIатрал биялагу лахъну бивкIссар ва уттигу буссар. Жулва ниттихъул лайкьссар яла лаваймур барчаллагьран. Чувшиврухлу, ссавурданухлу ва яхI-къириятрахлу», – увкунни ванал.
Бувсунни республикалий бушиву мукь-мукьа, ххю-ххюя оьрчI СВО-лий Ватандалул буржру биттур буллай бусса кулпатру. КIицI лавгунни Дагъусттаннай азарунния ливчусса бушиву чIявусса оьрчIру тарбия буллалисса кулпатругу.
Тамансса ихIсандалул проектру бартдигьлагьисса ва Дагъусттаннащал ххуйсса дусшиву дусса Марат Кабаевлулгу лавайсса кьимат бивщунни арсру Ватандалул патриотъталну тарбия буллалисса ниттихъан.
Муфтий АхIмад Афандинал ниттил рувхIанийсса тарбия дулаврил агьамшиврия бувсунни: «Цуксса бюхттулну гьаз хьурчагу инсан, га ниттилли увсса…ХIазран бакъар алжан ниттихъал чIанччанналур бусса учайсса», – увкунни ванал, ниттихъан цIуллушиву чIа тIий.
Ва мероприятиялул сакиншинначиталгу бур исламрал бизнесрал Дунияллул халкьуннал ассамблея.
ПатIимат Рамазанова
