Ноябрьданул 1-2-нний Грециянал Лутраки шагьрулий хьунни 18 шинавун бияннинсса жагьилтурал дянивсса дунияллул чемпионат. Муний ххув хьунни лаккучу, Дюкъуллал шяравасса Алхаслул арс Жамал Алхасов.
Финалданийн ияннинсса ххуллий Жамал бакIрай ххув хьуну ур грекнаяр, яла польшанал спортсменнаяр, хъирив украиннал лачIунуккуяр (грепплинг лачIун буккавривун дагьайссар), финалданий ххув хьуну ур испаниянал гужсса грепплер Родригеслуяр.
Дунияллул чемпионатрайн гьан хьхьичIгу Жамал Дагъусттанналгу, Аьрасатналгу даражалийсса бяст-ччаллавух гьуртту хьуну ур. 2019 шинал Жамал ххув хьуну ур грепплинграл Дагъусттаннал чемпионатрай, яла мура шинал хьуну ур Щалагу Аьрасатнал чемпион. 2023 шиналгу хьуну ур цал Дагъусттаннал чемпион, яла — СКФО-рал чемпион, мура шинал Аьрасатнал первенствалий арцул медальданун лайкь хьуну ур.
2024 шинал мусил медальлу ларсун дур Дагъусттаннал, СКФО-рал ва Аьрасатнал чемпионатирттай. 2025 шиналгу мукуна ххув хьуну ур Дагъусттаннал, СКФО-рал ва Аьрасатнал первенствардай, му чIумал Жамаллухьхьун дуллуну дур дунияллул чемпионатрайнсса путевка.
Жамаллул нинугу, ппугу Рутуллал райондалийсса Дюкъуллал шяравассар. Ва увну ур МахIачкъалалив. Ванан 15 шин дур.
Жамал дуклай ур МахIачкъалаллал 29-мур школалий 9-мур классраву. 2-мур классраву дуклакисса чIумал ва занан ивкIун ур «Прайд» тIисса спортрал школалийн грепплинграй иян лахьлан. Ванал тренерну ур Бразилиянавасса спортсмен Марко Машидо (суратрай). Жамал спортрахун агьну 10 шин хьуну дур, амма тренер гава га ур.
Жамаллул хиял бур цалва язи бувгьусса спортрал журалий оьрмулул хъуниминнал дянивгу чемпион шаву.
Бартлаганнав вил хиял!
ХIасан Аьдилов
