Вай гьантрай Москавуллал областьрайсса Люберцы шагьрулий хьунни ­нардырдай буккаврил Аьрасатнал кубок. Шикку гьуртту хьунни 200-нийн бивсса гьурттучитал.

Нардырдай буклай цаннащал ца хьунабавкьунни Москавлив ялапар хъанахъисса Гъумучиял шяравасса Хайруллагь Аьлиев ва Хъусращиял шяравасса Алексей Айгунов.
Шиккува кIицI лаган, гьурттучитураву Дагъусттаннаясса Хайруллагь ва Алексей бакъа къабивкIун бур.Кубокрай цалчинмур кIану бувгьунни Хайруллагьлул, кIилчинмур кIану бувгьунни Алексейл.

– Нардырдай буккаву ттул ­хоббир. Ва бур интеллект итххяххан дуллалисса тIуркIу. Махъсса ппурттуву Аьрасатнаву нардырдай буккаврил тIуркIу машгьур хъанай бур. Му исват хъанай бур нардырдай буккаврил тIуркIу щалагу Аьрасатнал дусшиврул тIуркIурдал лагрулийсса программалувун бутаврийн бувнугу, – буслай ур Хайруллагь.
Турнирданий хьхьичIунсса кIанттурду бувгьуми гьуртту хьунтIиссар ноябрьданул 25-нния декабрьданул 5-ннийн бияннин Москавлив хьунтIисса финалданул чемпионатрай.
ЧIа учинну Хайруллагьлун ва Алексейн гихунмайсса бяст-ччаллавугу тIайлабацIуртту.

Имара Саидова