ДР-лул Халкьуннал Мажлисрал председательнал хъиривчу Камил Давдиев хьунаавкьунни Аьрасатнал лайкь хьусса тренер, «Справедливая Россия — За Правду» партиялул хъунмур советрал член Валерий Гъазаевлущал ва Ккуллал райондалийсса Вихьуллал школалул директорнал хъиривчу, СВО-лул гьурттучи, «Доблесть гор» программалул вакил Оьма Чариновлущал.

Хьунабакьаврий Камил Давдиевлул бувсунни «Доблесть гор» программалул хьхьичIун лавсъсса агьамсса мурадирттая, ттининнин дурсса даврил хIасиллая, региондалий иширайну зузи дурсса проектирдая. КIулшивуртту дулаврил программалул бутIуву даврил опыт кIибачIлай, Оьма Чариновлул насихIатчину ур Камил Давдиев.
– Жу хъинну ялув бавцIуну хIадур буллай буссару каялувчитурал кадрарду, кIулшивуртту дуллай буссару хасъсса аьралий операциялул гьурттучитуран. Ца шинава программалул гьурттучитураща хайр-мюнпат буну зун бюхъантIиссар районнал, республикалул ва властьрал органнаву, – увкунни Давдиевлул.
Оьма Чариновлун ккаккан бунни Халкьуннал Мажлисрал батIавуртту дайсса заллу.
Валерий Гъазаевлул кIицI лавгунни Оьма Чаринов, цала аьралий опытгу ишла бувну, хьхьичI бивхьусса мурадру бартбигьавриха зунсса вихшалдарай ушиву. ДакIнин бутанну, сентябрьданул 15-нний байбивхьушиву программалул лагрулий кIулшивуртту дуллалисса цалчинмур модуль.

Имара Саидова