Октябрьданул 30-нний парламентрал спикер Заур Аскандаровлул каялувшиврий хьунни ДР-лул Халкьуннал Мажлисрал 48-мур сессия. Ванийн бувкIун бия «Доблесть гор» тIисса республикалул программалул гьурттучитал, вайннал наставникталну бур Халкьуннал Мажлисрал депутатътал.
Сессиялий махъру лавхъунни партиярдал фракциярттал вакилтурал. КПРФ-лул чулухасса депутат МахIмуд МахIмудовлул бувсунни республикалийсса социал-экономикалул тагьарданул хIакъираву. Жагьилтурал политика бартдигьаврия бувсунни «Справедливая Россия» партиялул депутат Марат Алияровлул. «Дагъусттаннал зунттал районну кьянкьану лядуккан даврил чаранная» бувсунни «Единая Россия» партиялул вакил Аьлимурад ХIажиевлул.
Яла депутатътурал ДР-лул Счетная палаталул аудиторнал къуллугърай цIакь унни ХIажимуса Жалилов.
Муния махъ депутатътурал чIурду буллунни ДР-лул Халкьуннал Мажлисрал депутат МахIаммад МахIаммадов чIун дучIаннина депутатшиврул ихтиярдацIа аврихлу.
Депутатътурал ххал бивгьунни ятинсса оьрчIан кумаг баврил хIакъиравусса, СВО-лул гьурттучитуран ва миннал кулпатирттал члентуран кумаг баврин хасъсса масъалартту, мировой судиятурал давурттал хIакъиравусса ва цаймигу законнал проектру.
ДР-лул финансирттал министрнал чIумуйсса кIанайма Шамил Дабишевлул бувсунни «О республиканском бюджете Республики Дагестан на 2025 год и на плановый период 2026 и 2027 годов» тIисса ДР-лул Закондалуву дахханашивуртту дуллалишиврул хIакъираву.
Ххал диргьунни мукунна «О проведении на территории Республики Дагестан эксперимента по предоставлению услуг гостевых домов» тIисса закондалул проект. Сессиялий ххал бивгьунни цаймигу масъалартту.
