Ноябрьданул 7-нний МахIачкъалалив гьайкал дацIан дунни паччахIлугърал хьхьичIунсса ишккакку Желал-эд-Дин Коркмасовлун ванал цIа дирзсса кучалий.

Шадлугърал тагьарданий гьайкал тIитIаврий гьуртту хьунни Дагъусттаннал бакIчи Сергей Меликов, АьФ-лул Госдумалул ва республикалул парламентрал депутатътал, муниципалитетирттал бакIчитал ва мукунма цIа дурксса дагъусттанлувнал мачча-гъанми.

– ХIакьину буниялагу жула республикалул тарихраву личIансса кьини дур. Жува шиккун бавтIун буру Дагъусттаннал халкьуннал цIа дурксса арснал хIурмат буван. Ва гьайкал тIитIаву укунмасса агьамсса иш бакъарча, ва дур хIурмат баврил лишан, жува барчаллагьрай бушиву ва жунма паччахIлугъ ччаннай дацIан дуллай бивкIми дакIний бушиву кIицI баву, – увкунни республикалул бакIчинал, бавтIминнал хьхьичI махъ лахълай.

Дагъусттаннал бакIчинал барчаллагь увкунни ва агьамсса давриву кумаг буллай бивкIсса цинявннахь, хаснува АьФ-лул Госдумалул депутат Султан ХIамзаевлухь ва МахIачкъалаллал бакIчи Жамбулат Салавовлухь.

Республикалул бакIчинал дакIнин дирчунни Коркмасовлул каялувшиврий бартдиргьусса цаппара проектру: хъуншагьру МахIачкъалалийн бизан баву, Октябрьская революциялул цIанийсса къанал дуккаву, «Дагнефть» тIитIаву, МахIачкъалаллал хьхьирил порт лябуккан баву ва цаймигу.
БатIаврий махъру лавхъунни Султан ХIамзаевлул ва цайминналгу.