Октябрьданул 30-31-нний Каспийскалий хьунни Дунияллул халкьуннал дянивсса Каспийрал цифралул шамилчинмур форум. Ваний гьуртту хьунни Аьрасатнал регионнаясса ва Каспий хьхьирил чIарахсса билаятирттаясса 1400 инсан.
Форумрал лагрулий ххал бивгьунни Каспий хьхьирил чIарахсса билаятирттал цифралул трансформациялул опыт, Аьрщарал манзилданийсса зондированиялул рынокрал лябукку, миннувух Каспий хьхьирил захIматсса масъалартту дузал баврил, дипфейкирттайн къарши буккаврил хIакъиравусса, маркетплейсру лябуккан баврил хIакъиравусса ва чIявусса цаймигу масъалартту.
Ца яла агьаммур ишну хьунни Дунияллул халкьуннал дянивсса хакатон, микку IT-пишакартурал хIадур дурну дур цифралул экономикалуву, паччахIлугърал управлениялуву ва социал сервисирттал бутIравусса агьамсса масъалартту бакIуйн буккан буллансса ттизаманнул программартту.
Форумрай гьуртту хьунни Аьрасатнавасса ва Каспийрал чIарахсса билаятирттал хьхьичIунми экспертътал, паччахIлугърал властьрал, бизнесрал, элмулул вакилтал, журналистътал.
Форум тIитIаврий гьуртту хьунни ДР-лул бакIчи Сергей Меликов. Ванал, бавтIминнахь аьла-ссаламгу бувну, бувсунни региондалул цифралул лябуккулул стратегиялул приоритетирттая. Дагъусттаннал бакIчинал мукунма бувсунни форумрал программалийсса масъаларттая – экологиялул мониторинграя тIайла хьуну, дунияллул халкьуннал дянивсса транспортрал инфраструктуралийн бияннин. Ванал тIимунийну, региондалий хъуннасса даву дуллай бусса бур IT инфраструктура дузал даврин хасну: цифралул масъалартту дузал буллай бур 1834 школалий. Проект бартдигьин итадаркьуну дур 1,5 млрд къуруш федерал субсидиялул. IT-пишакартал хIадур буван ялун нанисса шинал республикалий тIитIинтIий бур 500 инсаннансса «Школа-21».Тикку хIадур буллантIий бур экономикалул иширттан тIалавсса программистътал. Му бакъассагу, республикалий бувантIий бур Ухссавнил Ккавкказнаву яла хъунмурну хьунтIисса «Центр обработки данных» (Ккаккияртту зана-кьала дайсса центр). Проект бартдигьлай байбишинтIий бур Хасавюртуллал райондалий. Гьашинуния шинмай регион гьуртту хъанай бур ца куццуйсса журалул пилотрал проектру щурущи дуллантIисса давурттавух. Ми давуртту бартдигьлантIий бур Аьрасатнал Цифралул министерствалул цифралул платформалий. Мунийну бюхъантIий бур чан дуван паччахIлугърал информациялул системартту дузал даврил чIун ва хъун дуван ми системартту хъинну зуншиврийнсса вихшала.
«Жула форумрал лагрулий мюнпат хьунссия Каспийрал чIарахсса паччахIлугъирттал бартдиргьусса цифралул трансформацияртту ххал дигьирча. Миннал буссар цифровизациялул личIи-личIисса бутIраву так цанма хасъсса опыт, ми лахьхьаврия хъунмасса хайр хьунтIиссар шиккусса циняв гьурттучитуран», – увкунни Сергей Меликовлул.
АьФ-лул цифралул лябуккулул министр Макьсут Шадаевлул онлайн низамрай бувсунни жула билаятрал цифралул экономикалун цуксса мюнпат буссарив Каспийрал региондалул форумрай ххал бигьлагьисса масъаларттая.
Шадаевлул бувсунни «Север-Юг» транспортрал коридорданун цуксса мюнпат хьунтIий буссарив цифровизация даврия. Министрнал мукунма бувсунни Национал цифралул транспортно-логистикалул платформалул проектрая ва ххал бигьин аьркинну бушиву Каспий хьхьирил чIанулух Къазахъисттаннащалсса оптоволоконная линиялийнусса дахIаву дузал даврил масъала. Муния хъунмасса мюнпат хьунтIий бур региондалул лябуккулун.
АьФ-лул МИД-рал ляличIиссса тапшурлугъирттал посол Николай Удовченкол тIимунийну, Каспийлул регион хъанай бур Евразиялущалсса дахIаву дайсса бурхIлуну (связующее звено). Миннун хъинну аьркинну бур цифралул решенияртту. Ванал бувсунни форумрал хIасиллу лахъан дуван аьркинну бушиву хьхьирил лагмасса регионнал ххуллул карталийн.
Форумрай гьуртту хьунни мукунма АьФ-лул транспортрал министрнал хъиривчу Алексей Шило, АьФ-лул Президентнал СКФО-райсса полпреднал хъиривчу Владимир Надыкто, Дунияллул халкьуннал Ассамблеялул генсекретарь Андрей Бельянинов. КIира кьинилул мутталий форумрал гьурттучитурал ххал бивгьунни цифровизациялул бутIуйн багьайсса тамансса масъалартту. ЛичIинурасса къулагъас дурунни экологиялул мониторинграх ва хъинну ялув бавцIунни къарал бувайсса тIабиаьтрал территориярттах, мукунна «щюллисса» энергетикалуву цифралул технологияртту щурущи даврих. Форумрал гьурттучитурал ххал бивгьунни цаймигу масъалартту.
Каспийскаллал цифралул форум: хIасиллу ва ялун бучIантIимур
Форумрал мурад бия Каспийлул регондалул цифралул экономика лядуккан даву ва дунияллул рынокрай ми билаятирттал конкуренция духIан бюхъаву.
СНГ-лул билаятирттащалсса жула паччахIлугърал дазу цIакь даврил вакил Михаил Петраковлул тIимунийну, Каспийрал региондалул дазуцIухсса билаятирттал маша баврил давуртту гьарта дансса ишну хъанай бусса бур миннул документирттал аьмсса стандартру кьамул баву. Аьрасатнал МИД хIадурну бур му давриву чялишну кумаг буллан цифралул компаниярттан. Аьрасатнавусса Къазахъисттаннал вакил Даурен Абаевлул бувсунни Къазахъисттаннал трансграницалийсса цифровизациялул операциярттал хIакъираву. Ванал тIимунйну, му даврий тIалавну бур хъинну дурккусса пишакартал. Къазахъисттаннай Астаналий дузал бувну бусса бур IT-пишакартал хIадур бувайсса ва тичча давурттайн буцайсса цифралул кластер.
Ванал пикрилий, Дагъусттаннангу аьркинну бур мува ххуллийх бачин.
Дагъусттаннал бакIчи Сергей Меликовлул бувсунни МахIачкъалаливгу буллай бушиву мукунсса идара. «Школа-21» кунмасса дуккаврил центр бувну бур ва чIал къавхьуну зунтIий бур.
Аьрасатнал цифралул лябуккулул министр Макьсут Шадаевлул бувсунни паччахIлугърал хъунмасса кумаг бувантIий бушиву цифралул бутIун, хаснува ипотекалул кредитирттайну. Аьмну ванал хъинчулийсса кьимат бивщунни республикарттал цифралул бутIун. Форумрал программалуву дия ялагу укунсса темарду: «Дистанционное зондирование Земли», «Транспорт» ва «Инфраструктура обслуживания».
Форумрай гьуртту хьунни 500-ннаяр ххишаласса инсантал.
