Республикалул бакIчинал, дакIнийхтуну барчагу бувну полициялул зузалт, чIа увкунни бигьа бакъасса пишалул ххуллий ссавур ва тIайлабацIу.

– Зузи кьинирдай бикIу, байраннал гьантрай бикIу, зу лайкьну бартбигьлай буру Ватандалул бивхьусса бурж. Зул хIарачатрайну жучIара чан хъанай дур тахсиркаршивуртту. 2025-ку шинал ацIва зурул дянив сияхIрайн ларсъсса тIулдакъашивуртту 5% чан хьунни хьхьичIмур шинал вара чIумух бурувгун. Ашкара дурну дур 9632 тахсиркаршиву. Вай хъуннасса ва захIматсса даврил ккаккиярттур. Бюхъай зу дуллалимур гьар мудан итталун къадагьлай дикIангу, амма зу бакъассания къадикIантIиссия низам, къабикIантIиссия хIакьинусса тагьарданийсса Дагъусттан, – увкунни ванал.

Сергей Меликовлул бувсунни Дагъусттаннайсса дакьаврил ва паракьатшиврул цIаний 939 зузалал жан дуллушиву. Цала байрандалул кьинигума полициялул зузалт низамрал къаралданий бавцIуну бушиву, инсантуран кумаг бан, тахсиркартуран ххуллу кьукьин вай жандалий хIайп тIий бакъашиву.
Республикалул бакIчинал дуллунни хьхьичIунсса зузалтран «За проявленное мужество» медальлу, ХIурматрал грамотартту, цIа кусса ссятру.
Дагъусттаннал виваллил иширттал министр Аьбдурашид МахIаммадовлулгу цинявппагу зузалтрал цIания барчаллагь увкунни региондалул бакIчинахь муданнасса къулагъасрахлу ва кабакьулухлу.

Андриана Аьбдуллаева