Жу танийва баян бувсса куццуй, МухIаммад Майранов СВО-лий «Каспий» батальондалул имамну уссия. ДачIи шин тийхгу дурну, МухIаммад Дагъусттаннайн зана хьунни. Ва шавай ухханнин тIиссакссагу, республикалул муфти АхIмад-хIажи АьбдуллаевлучIан ивунни.

МухIаммад цIуллуну, сагъну СВО-лия зана шаврил савлугъран Муфтиятрал мавлуд дунни. Ваний гьуртту хьунни цува муфтигу. Ванал барчаллагь кунни МухIаммадлухь Ватандалийн дакI тIайлашиврухлу, чувшиврухлу ва аьралий иширттал кIанай рувхIанийсса къуллугъ баврихлу.
– Инсантал къаххуймуния байщун баву ва ххуймунийн кIункIу баву мурадрайсса давриву бигьалагансса чIун жунна дакъассар, – увкунни ванал, МухIаммадлул даврин кьимат бишлай.
Мавлуд къуртал дайхту, МухIаммад ивтунни Централ округрайсса Муфтиятрал вакилну.
МухIаммадлул бувсунни ттупал ххурххулуву ва цIу дирхьусса ккуллардал гъаралунниву кьянкьану бацIан аьралийтуран-бусурманнан кабакьу буллалисса цала опытрая.

ПатIимат Рамазанова