Вай гьантрай, ДР-лул кIулшиву дулаврил лайкь хьусса зузала, каруннах бияврил спортрал дунияллул халкьуннал даражалул мастер, МахIачкъала шагьрулул 49-мур школалул директор Аьбдулкарим Айгуновлул каялувшиндарайсса Дагъусттаннал делегация бивунни Белгородский областьрайн.
Делегациялувух бия хIала-ккаласса данди буккавурттал дунияллул 11-ла чемпион хьусса Рамазан Рамазанов, Дагъусттаннал халкьунал артистка, Дагъусттаннайсса «Волонтеры Победы» проектрал каялувчинал хъиривмур Зульфия Илиясова, аьралий иширттал ветеран Арслан Ибрагьимов. Аьрххилул мурад бия регионнал дянивсса культуралул ва кIулшиву дулаврил ххуллийсса опыт кIибачIаву.
Дагъусттаннаясса хъамал хьунабавкьунни Белгородский областьрал кIулшиву дулаврил министр Андрей Милехиннул. Аьрххилул лагрулий жула республикалиясса делегация хьунабавкьунни Белгородский областьрал губернатор Вячеслав Гладковлущал, областьрал культуралул министр Максим Шапошниковлущал, Белгородрал бакIчи Валентин Демидовлущал.
Губернаторнал кIицI лавгунни, ва кIивагу региондалун хъуннасса агьамшиву дусса хьунабакьаву хъанахъишиву. Дагъусттаннаясса хъамал бивунни Белгородрайсса школардайн, гимназиярттайн, спортрал центрдайн ва цаймигу идарарттайн. Шиккугу хьунабавкьунни идарарттал каялувчитуращал, хьхьичIунсса педагогтуращал, дуклаки оьрчIащал. Бувсунни цала сиптардая, гихуннай дуллантIисса давурттая. Хъуннасса къулагъас дунни культуралул, кIулшиву дулаврил, патриот тарбиялул масъаларттах. Аьбдулкарим Айгуновлул бувсунни Дагъусттанная ва халкьуннал культуралия, миллатирттал багьу-бизулия. Зульфия Илиясовал увкунни патриот балайрду. Хъамалу бувкIсса делегациялухь барчаллагь увкунни Вячеслав Гладковлул.
ХIасил, ва хьунни Белгородский областьрал ва Дагъусттаннал агьалинал дусшиврул арарду цIакь дуллалисса, цIусса дустал лякъинсса ва цаймигу пикрирду мюнпат буну бартбигьинсса хьунабакьаву.
Шиккува кIицI лаган, аьрххилул сиптачи хьусса Аьбдулкарим Айгунов ур аьралийтуран гуманитар кумаг буллалисса акциярттавух чялишну гьуртту шайсса инсан.
Аьбдулкарим жагьилтал патриот зумуну тарбия баву мурадрайгу хъунисса давуртту дуллай ушиврия жула кказитрай цимилгу чивчуссия. Барчаллагь ва къабигьасса ппурттуву цащава шайсса куццуй аьралийтуран кумаг буллалисса ва цала даврил бигарду дакI марцIну бартбигьлагьисса чумартсса инсаннан.
Имара Саидова
