Октябрьданул 30-31-нний Дагъусттаннай хьунтIий бур Дунияллул халкьуннал дянивсса шамилчинсса Каспийскаллал цифралул форум. ВаницIун кабакьлай бур Цифралул лябуккулул министерствалул ва Аьрасатнал КьатIаллищалсса билаятирттал иширттал министерствалул.

ДР-лул цифралул лябуккулул министр Юрий ХIамзатовлул октябрьданул 28-нний хьусса пресс-конференциялий бувсунни ва агьамсса мероприятиялийн хIадур шаврил хIакъираву. Ванал тIимунийну, форумрай гьуртту хьунтIий бур жула билаятрал 15 региондалиясса делегатътал ва сайки 1000 инсан Ираннава, Къазахъисттанная, ва Узбакисттанная.
Форумрал хъунмур мяънагу, мурадгу хъанай бур Дагъусттаннай цифралул бутIуву национал проектру бартдигьинсса давуртту ва ми дузал дувансса ххуллурду лякъаву.
Программалуву бур дипфейкирттайн къаршисса, экологиялул мониторинграл масъалартту ххал бигьлагьисса, цифралул технологиярттал хIакъиравусса дискуссиярттал секцияртту, мукунма дунияллул халкьуннал дянивсса «Север-Юг» транспортрал коридорданул лагрулий маркетплейсру ва онлайн машлул давуртту лядуккан даврил масъалартту.
Юрий ХIамзатовлул бувсунни, Дагъусттаннал экспертътурал цайми билаятирттал уртакьтал кIул бувантIий бушиву ва бутIуву мурчай зузисса электростанциярттал ва искусственный интеллект ишла даврил давурттащал.
Миннуяр ххишалагу, министрнал бувсунни форумрал лагрулий республикалул ният душиву цаппара рязишиврул кьутIирду чичин «Роскосмос» госкорпорациялущал ва «ЭРА- ГЛОНАСС» компаниялущал.

ХIасан Аьдилов