Вай гьантрай Дагъусттаннал ПаччахIлугърал профессионально-педагогический колледжраву лавайсса даражалий хьунни «Будущее – за дружбой народов» цIанилусса дунияллул халкьуннал дянивсса студентътурал V-мур форум ва мунищала архIал колледжрал юбилейран хас дурсса мероприятие.
Гьашинусса форум тIайла бавцIунни колледжрал 50 шинал юбилейрайн. Мукунна, гьашину щалагу Аьрасатнаву кIицI лаглагиссар дянивсса профессионал образованиялул идарартту тIивтIуну 85 шин шаву. Дагъусттаннай ва системалул дайдихьу дурссар 1922-ку шинал Буйнакскалий цалчинсса паччахIлугърал техникум тIитIаврийну.
Студентътурал форумрай гьурттушинна дан бувкIун бия личIи-личIисса министерстварттал ва ведомстварттал, дуккаврил идарарттал вакилтал, Аьрасатнал регионнаясса, Беларусьнавасса, Ухссавнил АьсатIиннавасса (Алания), Луганскалиясса бусравсса хъамал. Мероприятие тIиртIунни Аьрасатнал гимнрайну.
Хъирив гьурттучитал барча буллалисса ихтилат бунни колледжрал директор, экономикалул элмурдал кандидат Марьям ХIамидовал. Ванил кутIану бувсунни колледжрал тарихрая. Дагъусттаннал ХIукуматрал 2021-ку шинал сентябрьданул 16-нний цIакь бувсса хIукмулийну Дагъусттаннал промышленно-экономический колледжрая бувну бур профессионально-педагогический колледж. ХхюцIалла шинал лажиндарай шикку хIадур бувну бур азарахъул лавайсса даражалул пишакартал ва педагогтал.
Колледжраву дуклакиминнан ва преподавательтуран тIайлабацIу ва хьхьичIуннайшивуртту чIа тIисса ихтилатру бунни Дагъусттаннал кIулшивуртту дулаврил ва элмулул министрнал хъиривчу ХIажимурад МахIаммадовлул, Дагъусттаннал Халкьуннал Мажлисрал председатель Елена Павлюченкол, Дянивсса профессионал кIулшивуртту дулайсса идарарттал директортурал советрал председатель, Р. Ашураьлиевлул цIанийсса Техникалул колледжрал директор Мафият Рахмановал.
– Педагогика – тарбия ва кIулшивуртту дулаврил агьамсса сферар. Жула бучIантIимур кIулшивурттайнни хъар хъанахъисса. Билаятрал кIулшивуртту дулаврил системалул ца бутIа ва колледжгу хъанахъиссар. Укунсса дянивсса профессионал кIулшивуртту дулайсса идарарттал хIакьину хъуннасса хъар лахълай буссар жула экономика ва общество хьхьичIуннай дансса лавайсса даражалул пишакартал хIадур буллай, – кIицI лавгунни ихтилатчитурал. Хъамаллурал чIа увкунни колледжран ххуйсса ккаккияртту, гьунар бусса студентътал ва пахрулунсса выпускниктал.
Ихтилатру къуртал хьуну махъ Марьям Сулаймановнал колледжрал ветерантал ва лайкьсса педагогтал барчагу бувну, Барчаллагьрал чагъарду буллунни. Миннавух бия Хьурттал шяравасса Рабият Бижутуевагу.
Профессионально-педагогический колледжрал байран чIюлу дунни Рукьият ХIамзатовал, Даниэл Гьаруновлул балайрдал, Б. Мурадовал цIанийсса Дагъусттаннал Культуралул ва искусствалул колледжрал студентътурал къавтIавурттал. Луганскаллал чIяру профильлу дусса педагогический колледжрал студентътурал хIадур дурну дия «Мы вместе: единство в разнообразии» тIисса композиция, Ухссавнил АьсатIиннавасса хъамаллурал миллатрал къавтIаву. Колледжрал хIаятраву лахълай бия пагьламан.
Андриана Аьбдуллаева
