МахIачкъалалив Мирзабековлул цIанийсса кIичIиравусса, 1962 шинал бувну бивкIсса къатлул магъи ва лажин чул бакьин бунни. Вай бакьин бан ккаккан бувну буссия 2026-2028 шиннардий. Амма шиву ялапар хъанахъиминнал хIарачатрайну давуртту анавар дуккан дан бювхъунни.

Нанисса шинал февраль зуруй Ухссавнил Ккавкказуллал федерал округрайсса Аьрасатнал президентнал полпреднал хъиривчунащалсса хьунабакьаврий квартирардал заллухъруннал тавакъю бунни цивппа ялапар хъанахъисса къатта лекьан нанисса тагьарданий бушиву къулагъасрайн ласун.
– Жу хъунмасса хIаллай ялугьлай буссияв къатта бакьин баннин. Утти дяркъу хъанан диркIукун жун хъиннура асар хъанан диркIунни хьусса дахханашиву. Квартирардаву гъилишиву, рахIатшиву хьунни, чIявусса жу гьаз бувсса масъалартту щаллу хьунни, – тIий бур шиву ялапар хъанахъими.
Подрядная организация «Дагстрой М» ООО-лул икьралданий ккаккан дурсса чIумуй ва техникалул тIалавшиннардай щаллу дунни даву. Капитал фондрал ремонтрал, стройконтрольданул, Дагъусттаннал строительствалул министерствалул ва Управляющая компаниялул вакилтурая хьусса приемная комиссиялун дурсса даврий цичIав аьй къаляркъунни.

КIилчинмур къатта, Юсуп Акаевлул цIанийсса кIичIиравусса № 1б, бакьин бунни ООО «Прогресс» подрядная организациялул. Пишакартурал цIу дуккан дунни къатлул вивсса щинал ва гъилишиврул дузал байсса, инженер системарду. Ванийну къатлуву ялапар хъанахъими хъунмасса хIаллай коммунал ресурсирдал щаллуну бикIантIиссар. Даврил качество ххал дурсса хасъсса комиссиялун аьй къаляркъунни.
Капитал ремонтрал кутIасса чIумуйсса план щаллу даврийну дагъусттанлувтурал ялапаршиндарал шартIру къулай хъанай дур.
Ванийну чIалай бур властьрал органну, подрядный организацияртту ва агьали цачIу зузиний, давуртту бигьану чулийн дуккан дан бюхъайшиву.