ЦIуссалакрал райондалий ссуттилсса призыврал кампаниялул лагрулий жагьилтал аьралуннаву къуллугъ буллан тIайла буклай бур. ДакIнин бутанну, октябрьданул 1-нний дайдирхьусса ссуттилсса призыврал кампаниялул даву декабрьданул 31-ннийн бияннин дикIантIишиву.
Аьралуннаву къуллугъ бан буцлациссар 18 шинава 30 шинавун бияннинсса оьрчIру. Шиккува кIицI лаган, аьралуннаву къуллугъ бан буцлацисса оьрчIру, хасъсса аьралий операциялул ишру нанисса Донецкаллал ва Луганскаллал Халкьуннал Республикарттайн, Херсонский ва Запорожский областирдайн гьан къабуллалиссар.
Къуллугъ буллалиссар ца шинайсса. Повестка дуркIун махъ призывник 20 гьантлул мутталий военкоматрайн учIан буржлувссар. Багьана-савав дакъана военкоматрайн къабувкIминнай, призыврая махъаллил хьуминнай, 10-30 азарда къурушрайн дирсса аьчIа дишин ккаккан бувну бур. Зузисса ягу дуклакисса кIану баххана бувшиврия баян къабувминнайгу 10-20 азарда къуруш аьчIа дишин ккаккан бувну бур.
Медкомиссия баврия махъаллил хьуминнайгу 15-25 азарда къуруш аьчIа дишин ккаккан бувну бур. ДачIи шинал хьхьичI Аьрасатнава нанишиву баян къабувминнайгу 5-15 азарда къуруш аьчIа дишлантIий бур.
Жагьилтал аьралуннавун тIайла буклай, миннахь ххуллухъин тIутIисса ихтилат бунни ЦIуссалакрал райондалул бакIчи МаматIи ХIамзатовлул.
– Аьралуннаву къуллугъ баву, гьарицагу чувнал оьрмулуву лахъан аьркинсса буржри. Му зун бучIи лякъинтIиссар ихтияр дуруччай органнащал дахIаву дусса даврийн бухлахийнигу. ДакIний битияра, зу аьралуннаву къуллугъ булланну нанисса.
Буттал улклуя архсса кIанттурдай зу хьунабакьинтIиссару личIи-личIисса миллатирттал ва диннал инсантуращал. Зун гьарица инсаннащал маз лякъин, тIайлану къуццу тIун кIулну бикIан аьркинссар. ХIакьину аьралуннаву къуллугъ буллан нанисса дагъусттанчунал цIа лайкьну дуруччин аьркинссар, – увкунни ванал.
ХIакьинусса кьини Хасавюрт шагьрулул, Хасавюртуллал ва ЦIуссалакрал районнал аьралий комиссариатрайн призывниктал букIлай бур медициналул комиссия бан. Аьралуннаву къуллугъ бан наниминнавух ур ЦIуссалакрал райондалийсса ЦIуссачIурттащиял шяравасса Зайнуттин МахIаммадов. Ванахь ххуллухъин учин бувкIун бия ванал мачча-гъанми.
ЧIа учинну жула жагьилтуран лайкьну къуллугъгу бувну, нитти-буттачIан цIуллуну-сагъну зана шаву.
Имара Саидова
