Сентябрьданул 28-нний МахIачкъала шагьрулун там хьунни 168 шин. Ва иширан хасъсса шадлугърайсса батIаву хьунни Сулайман Стальскийл цIанийсса паркраву – Яруссаннал театрданул хьхьичIсса майданнив.

Ва дачин дурну бия Арсен ЛухIуев ва Влада Алешина. Вайннал бакIра-бакIрах кIицI ларгунни СВО байбивхьуния махъ Аьрасатнал Виричунал цIанин лайкь хьусса дагъусттанлувтурал цIарду.

Байрандалул программа тIиртIунни Росгвардиялул аьралуннал 102-мур бригадалул аьралий оркестрданул.
Дагъусттанлувтурахь, республикалул хъуншагьрулул хъамаллурахь ва кьини барча тIисса ихтилат бунни шагьрулул бакIчинал буржру чIумуйну биттур буллалисса Жамбулат Салавовлул. Цалва ихтилатраву ванал кIицI лавгунни шагьрулул тарихрацIун бавхIусса агьамсса ишру, республикалул ва шагьрулул яла хъунмур хазнану тIурчарив, хъанахъишиву гьарца кьини зий-заназисса инсантал.

Гихуннай республикалул цIа дурксса балайчитурал ва къавтIалтрал ккаккан дунни хъуннасса концерт. СахIналийн бувккунни Зайнаб Махаева, Кристина, Марина Аьлиева, Зульфия Архилаева, Аьйшат Айсаева, къавтIаврил ансамбльлу «Дагъусттан», «Эхо гор» ва цаймигу. Ахирданий – Дагъусттан Республикалул искусствардал лайкь хьусса ишккакку Рамазан Фаталиевлул каялувшиндаралусса оьрчIал хор. Шиву къачансса бия СВО-рал гьурттучитурал оьрчIругу.
Байран дайлиртIунни МахIачкъалаллал гимн щаллу даврийну.

Бадрижамал Аьлиева