Бюхттулсса Ххувшаврил 80 шинан, Расул ХIамзатовлун 102 шин шаврин, Аьрасатнал халкьуннал мазурдил кьинилун ва Дагъусттаннал Халкьуннал цашиврул кьинилун хасну Саха (Якутия) Республикалий Мирный шагьрулий хьунни «Гамзатовские чтения – 2025» тIисса райондалул конкурс. Шикку 1-мур даражалул дипломран лайкь хьунни Карашрал шяравасса Марат ХIусайнов.

«Гамзатовские чтения» конкурсрал сакиншиндаралсса бувну бия Мирнинский райондалул, М.М. Софианидил цIанийсса шагьрулул хъунмур библиотекалул ва Дагъусттаннал национал-культуралул «Имамат» сакиншиндарал.
Конкурсрай Мирный шагьрулул 7-мур школалий дуклакисса Карашрал шяравасса ХIусайнов Марат Зураблул арснал оьрмулул 14-17 шиннардил категориялий бувгьунни цалчинсса кIану.

Назмурду дуккаврил конкурсрай 95 оьрчIава хьхьичIун ливчусса 12 оьрчI (вайннавух Маратгу) гьурттусса батIаву хьунни сентябрьданул 19-нний шагьрулул хъунмур библиотекалий.
Ххувшавугу барча тIий, чIа тIий буру Маратлун цIу-цIусса хьхьичIуннайшивуртту.

Бадрижамал Аьлиева